Kommune Kujalliup nittartagaanut uummammit pisumik tikilluarit!

Kommune Kujallermi inuk qitiuvoq. Pisuussutivut pingaarnerpaat tassaapput innuttavut. Inuit nukii piginngikkutsigit nikeriangaarnavianngilagut. Taamaammat ilinniartitaaneq maani assut pingaartitaraarput. Inuusuttut ilinniarluarsimasut siunissaraavut, utoqqaalli inuiaqatigiinnik tunngaviliisorisavut puigussanngilavut. Inuussutissarsiorneq pingaartitarigatsigu kommunip inuussutissarsiortullu suleqatigiilluarnissaat pingaarteqaarput.

Pisortat suliffeqarfiutaat ukiorpassuarni nunatsinni sunniuteqarsimaqimmata tamatumani namminersortut ukiuni makkunani peqataaleriartuinnarnissaat ineriartornerup ilassaraa. Aalisarneq inuussutissarsiutaavoq pingaarutilik, nunalerinerlu ukiorpassuarnissaaq sunniuteqarluarsimavoq. Ukiuni makkunani inuussutissanik imminut suli annerusumik pilersortunngornissarput ilungersorluta sulissutigaarput.

Ukiuni aggersuni inuussutissarsiutit ineriartorfigisinnaalluakkavut pingaaruteqartut tassaapput uuliasiorneq aatsitassarsiornerlu. Taamattaaq aamma takornariartitsineq ineriartortissavarput. Pinngortitaq najugarput pinningaarmat allanut aamma takutikkusupparput. Taamatullu sulisussat piginnaanngorsartariaqarput sulisitsisut pisariaqartitaannut naapertuuttunik piginnaaneqaleqqullugit. Inuiaqatigiinni ineriartornermut qangarnit annerusumik peqataalerumalluta sulisussat eqqortumik piginnaasaqalernissaat ilungersorluta sulissutigaarput.

Inuiaqatigiinni marluinnik oqaasilinni inuuvugut, oqaluttuarisaanerput kulturerpullu inuit europamiullu suleqatigiinneranit sunnigaavoq. Kikkut tamarmik maani tikilluaqqusaapput. Neriuppunga nittartagaq una kujataamioqatigiinnut nukittorsaaqataassasoq aammalu kommuni pillugu paasissutissanik ujaasinermut oqilisaataassasoq. Nittartakkap pitsannguallaatigisinnaasaanik siunnersuutissaqaruit nassiutiinariannguakkit.

Kujataa nuannersuuvoq toqqissisimanartuullunilu - ataatsimoorluta suli pitsaanerulersitsigu!