Nuttarnerulersitsinissamut ikiorsiissutit

Nalinginnaasumik paasissutissiineq 

Sulisartut tamarmik sumi inunngorsimaneq peroriartorsimanerlu apeqqutaatinnagit suliffissaqarfiusunut qinnuteqarsinnaanissamut assigiimmik periarfissaqarnissaasa qulakkeerneqarnissaa, Kalaallit Nunaanni nunami sumiiffiit taamannerisa pisariaqalersippaa.

Nuttarnerulersitsiniarluni tapiissutit naapertorlugit atorfininnissamut isumaqatigiissummi, pingaartumik sulisussanut ilinniagaqarsimasuunngitsunut atugassaritinneqartartutut, ilinnut sulisussamut atorfininnermi angalaneq aamma pequtit nassiunnissaat ilaatinneqarsimanngippat, ilinnut sulisussamut ikiorsiissutaassapput.

Piumasaqaatit 

Nuttarnerulersitsiniarluni tapiissutinik pisinnaanissamut tunngavissarititaasut arlallit naammassineqarsimasussaapput:
    • 18-ileereersimassaatit
    • Suliffeqanngitsutut suliffissarsiuussisarfimmi nalunaarsimassaatit
Suliffissaq najukkami najugaqartunik inuttassarsineqarsinnaasimassanngilaq. Atorfimmut naleqquttunik piginnaasalinnik najukkami suliffissaaleqisoqarpat, Suliffissarsiuussisarfimmit pineqartut innersuunneqassapput.

Ikiorsiissutit annertussusaat 

Atorfininnermut atatillugu angalaneq
Ilinnut, katissimallugulu aappannut aamma qitornannut 18-iliisimanngitsunut angerlarsimaffinni najugaqartunut atorfininnermut atatillugu angalaneq tamakkiisumik matussusertissinnaavat. Atorfininnermi angalaneq angerlarsimaffiulersussamut sapinngisamik angallatit tamanit atorneqartartut akikinnerpaat atorlugit pissaaq. Allatut assartuusseriaatsimik atuissaguit, aningaasartuutit uppernarsarneqartut akilerneqassapput, taamaattoq angallatinut tamanit atorneqartartunut billetsip akikinnerpaap akia sinnerneqassanngilaq.

Pequtit nassiunnissaat
Pequtit nassiunnissaannut makkua akilertissinnaavatit:
    • Kisermaat 15m3 tikillugu akiliunneqartarput, nalinginnaasumik imarsiornermut assartuussinermullu sillimmasiisoqartarpoq, 182.500 koruunit tikillugit sillimmasiissutitaqartumik
    • Aappariit 30 m3 tikillugu akiliunneqartarput, nalinginnaasumik imarsiornermut assartuussinermullu sillimmasiisoqartarpoq, 364.800 koruunit tikillugit sillimmsiissutitaqartumik
    • Qitornat ataasiakkaat tamarmik immikkut 5m3 tikillugu pequtit nassiunnissaannut akiliutsinneqartarput, nalinginnaasumik imarsiornermut assartuussinermullu sillimmasiisoqartarpoq, 60.800 koruunit tikillugit sillimmasiissuteqartartumik
Malugiuk
Pequtit nassiunnissaannut akuersissuteqartoqaraangat, atorfininnermulli atatillugu angalanermut ingerlaannaq ataqatigiissillugu pequtit umiarsuarmik assartorneqarsinnaanngippata, tamatumunnga peqqissaartumik uppernarsaasiinikkut inummut ataatsimut 10 kg tikillugit nassatat amerlanaarlugit nassarsinnaanissamut akiliussisoqarsinnaavoq.

Pequtit nassiunneranni ilaatinneqarput poortuineq, poortuusersuutit, assartuineq aamma pequtinik puuiaaneq. Pequtinik nassiussinermi nuunnermut atatillugu sullinneqartarnerit nalinginnaasut saniatigut pequtinik toqqorsivimmiititsineq ilaatinneqanngilaq.

Aningaasassat aningaasanut inatsimmi nuttarnerulersitsiniarluni tapiissutinut atugassatut akuersissutigineqartut, Inuussutissarsiornermut Suliffeqarnermut Niuernermullu Naalakkersuisoqarfimmit qaangerneqartussaanngillat. Tamannalu ima paasineqassaaq aningaasanik atorneqarsinnaasunik suli peqarpat, qinnuteqaatit taamaallaat akuersissutigineqarsinnaapput.

Qinnuteqarneq 

Illit nammineerlutit killilersorneqanngitsumik suliffissarsiornissamut periarfissaqarputit. Illoqarfimmi imaluunniit nunaqarfimmi allami suliffissarsiguit, atorfininnermut atatillugu angalanissat aamma pequtinik nassiussinissaq matussusertinniarlugu qinnuteqarsinnaavutit.

Nuttarnerulersitsiniarluni tapiissutinik qinnuteqarnissaq pillugu immersugassaq immersussavat, taannalu najukkanni suliffissarsiuussisarfimmut tunniutissavat.

Nuttarnerulersitsiniarluni aningaasaliissutinik qinnuteqaat

Suliffissarsiuussisarfiup periarfissanik misissuinissannut aamma immersugassap immersornissaanut ikiorsinnaavaatit. Aamma suliffissarsiuussisarfiup suliffimmut qinnuteqaativit suliarinissaanut ikiorsinnaavaatit.

Makkua nassarnissaat isumagissavat:
    • Sulisitsisoriligassanni aalajangersimasumik atorfinissimanermut uppernarsaat
    • Sulisitsisoriligassavit angalanermut aamma pequtit nassiunnissaannut aningaasartuutit akilertussaanngikkai uppernarsaat
    • Pequtit assartorneqarnissaannut tunngatillugu aningaasartuutit annertussusaannut neqeroorut
Sulisitsisumut tunngatillugu immikkut ittut
Illit sulisitsisutut suliffissarsiuussisarfik aqqutigalugu sulisussarsioruit, illoqarfimmili piukkunnartunik nassaartoqarani, sulisussarsiornissamut allagarsiussassamik suliaqarsinnaavutit suliffissarsiuussisarfinnut allanut nassiussorneqartussamik.

Kommuninit allanit qinnuteqaatinik takkuttoqarpat, suliffissarsiuussisarfimmit attavigineqassaatit.

Piukkunnaatilimmik qinnuteqartumik nassaartoqarpat, sulisussarsiortup qinnuteqarnissaa atorfittaarnissaalu pillugit isumaqatigiissusiorsinnaavusi, taamaattorli illit sulisitsisutut angalanissaanut pequtaasalu nassiunnissaannut akiliissanngitsutit. Tamatuma saniatigut aningaasarsiassat atorfinitsitaanermullu atugassarititaasut isumaqatigiissusiorfigineqassapput, aammalu ineqartitaanissaq qulakkeerneqassasoq.

Ingerlatseriaatsit 

Suliffissarsiuussisarfiup nuttarnerulersitsiniarluni tapiissutit pillugit qinnuteqarnermi immersugassaq immersoriigaq Inuussutissarsiornermut, Suliffeqarnermut Niuernermullu Naalakkersuisoqarfimmut nassiutissavaa.

Qinnuteqartoq nuttarnerulersitsiniarluni tapiissutinik pisinnaatitaanersoq Naalakkersuisoqarfiup misissussavaa. Qinnuteqartup piumasaqaatit malissimappagit, ikiorsiinissaq akuersissutigineqassaaq aammalu suliffissarsiuussisarfik nalunaarfigineqassaaq nuunnissaq sulissutigalugu aallartittoqarsinnaasoq.

Suliffissarsiuussisarfiup nuunnermut atatillugu aningaasartuutit akilissavai aammalu akiligassiissut ataatsimoortoq Inuussutissarsiornermut, Suliffeqarnermut Niuernermullu Naalakkersuisoqarfimmut nassiutissallugu.

Naalakkersuisoqarfiup aningaasartuutit kommunimut innuttaasup nuunneranut attuumassuteqartut utertillugit akilissavai.

Naalakkersuisoqarfiup uppernarsaatit pisariaqartut tigoreersimappagit, akissutissap nassiunneqarnissaanut sapaatip-akunnera ataatsimiit ullut suliffiusut qulinut sivisussuseqassaaq.

Allannguineq 

Qinnuteqaatinnut tunngatillugu allanngortoqassappat, kommunerisannut attaveqassaatit. Allannguutit tassaasinnaapput:
    • Atorfininngitsutit, taamaattumillu suliartorfissaraluannut aallanngitsoorlutit
    • Pequtit nassiunnissaannut aningaasartuutit qinnutigisannit annikinnerupput
    • Aningaasaliissutigineqartut saniatigut immikkut aningaasartuutissaqalerputit
Nikingassutaasoq pillugu kommune Naalakkersuisoqarfimmut qinnuteqaasiussaaq, tassanilu akuersissutigineqassanersoq nalilerneqassaaq.

Naammagittaalliuteqarneq 

Nuttarnerulersitsiniarluni tapiissutit pillugit Inuussutissarsiornermut, Suliffeqarnermut Niuernermullu Naalakkersuisoqarfimmit aalajangiunneqartut naammagittaalliutigineqarnissaannut periarfissaanngilaq.

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl