PKU-mi pikkorissarnerit

Nalinginnaasumik paasissutissiineq 

Inuussutissarsiutit ilaat piorsaaffiullutillu annertusaaffiusut allat ingerlariaqqiffiunatillu appariartorfiupput. Suliffeqarneq allanngoriartorfiujuartoq naleqqusaaffigiumallugu pisariaqarsinnaasarpoq ilinniagaqaqqittoqarnissaa – aamma suliffeqareeraluaraanni. PKU (Projekt Kompetenceudvikling for Ufaglærte – Ilinniagaqarsimanngitsunut Piginnaasanik Ineriartortitseqqinneq) ilinnut ilinniagaqaqqikkumasumut neqeroorutaavoq.

PKU suliamik ilinniagaqarsimanngitsut piginnaasaminnik piffissami sivikitsumi ineriartortitseqqinnissamut pikkorissartitsisarnermik aaqqissuussineruvoq. Pikkorissartitsinerit sivikinnerpaamik ullunik pingasunik sivisussuseqartarput, siunertaavorlu inuit inuussutissarsiutini akunnattoorfiusuni taakkunani inuussutissarsiorfigisaanni imaluunniit inuussutissarsiutini piorsaaffiullutillu annertusaaffiusuni piginnaasaqarnerulersissinnaanissaat. Taamaalilluni suliffissaaleqinissap aarlerinartoqarsinnaanera annikillisinneqarsinnaaqqullugu, ilutigalugulu inuussutissarsiutini piorsaaffiullutillu annertusaaffiusuni sulisussarsiornerit inissaqartinniarsinnaaqqullugit, assersuutigalugu inuussutissarsiutini ukunani:
  • Sanaartorneq
  • Takornariaqarneq
  • Aatsitassarsiorneq
  • Kommunini ulluunerani paaqqinnittarfiit
  • Peqqinnissaq

Siunnerfigisat tassaapput inuit ilinniarsimasuunnginnerusut 25-it sinnerlugit ukiullit suliffeqareersut imaluunniit suliffissaaleqisut. Sulisitsisorisaq pikkorissartitsinermut taartisianik pissarsitinneqassaaq, akerlianillu pikkorissartoq piffissami pikkorissarnermini aningaasarsiaqaannassalluni.

Suliffissaaleqisut PKU-mi pikkorissartitsinerni aamma peqataasinnaapput. Pikkorissarnerup nalaani pikkorissartitsinermut taartisianik pissarsitinneqassapput.

Suliamik ilinniagaqarsimasut aamma qinnuteqarsinnaapput pineqartuni inissaqartitsisoqarpat. Ilinniarsimasulli tapiissutisisinnaanngillat PKU-mi pikkorissaqataanerminni.

PKU-mi pikkorissartitsinerit Qitiusumik Ilinniarfinnit neqeroorutigineqartarput. Qitiusumik Ilinniarfiit maannamut PKU-mi pikkorissartitsisarnernik neqerooruteqartartut tassaapput:
  • KTI Aatsitassarsiornermut Ilinniarfik, qaarusulerinermut, entreprenørimut aamma aatsitassarsiornermut pikkorissartitsinerit, assersuutigalugu aatsitassarsiornermut tunngaviusumik (common core) aamma maskiinanik aqutsisutut (maskinfører) pikkorissarnerit
  • KTI Sanaartorneq, neqeroorutigalugit assersuutigalugu Ruujorilerinermi Saliinermut teknikki, Qisuit aamma Asbest, PBC aamma oqummut pikkorissartitsinerit
  • Isumaginninnermi Ilinniarfik, isumaginninnermi ulluunerani paaqqinnittarfinnut utoqqarnullu paarsinermut sammisunik pikkorissartitsinerit
  • Oqaatsinik Pikkorissarfik, tuluttut pikkorissartitsinerit
  • Campus Kujalleq Qaqortumi, niuernerup takornariaqarnerullu, aallartisaanerup qarasaasialerinerullu iluini pikkorissartitsinerit
  • Peqqissaanermik Ilinniarfik, peqqinnissamut ikiortinut pikkorissartitsinerit
  • INUILI, nerisassat, neriniartarfinni aamma akunnittarfinni suliat pillugit pikkorissartitsinerit
  • KTI Saviminilerinermik Ilinniarfik, assersuutigalugu truckernermut kranimillu atuisinnaanermut pikkorissartitsinerit kiisalu lastbilernermut nutaatut pikkorissarnerit
  • Imarsiornermik Ilinniarfik, inuussutissarsiutigalugu aalisarnermi isumannaallisaanermut pikkorissartitsinerit

Malugiuk
PKU-mi pikkorissartitsisarnerit najukkami aallaaviatigut ingerlanneqartarput. Pikkorissartitsinissallu atortussatigut piumasaqaatitallit pineqarpata, Qitiusumik Ilinniarfinni pikkorissartitsisoqartarpoq.

Piumasaqaatit 

PKU-mi pikkorissartitsinermut qinnuteqarsinnaanissannut piumasaqaataavoq 18-inik ukioqalereersimassasutit, ajunnginnerussallunilu 25-nik sinnerlugilluunniit ukioqartuunissat.

PKU-mi pikkorissartitsisarnerit suliamik ilinniagaqarsimanngitsunut sammititaapput, taamaattumillu nalinginnaasumik qinnuteqarnermi akuerisaanissamut piumasaqaatitaqarfiusaratik. Pikkorissartitsinerilli ilaat ilaatigut Aatsitassarsiornermut Ilinniarfimmi tamakkiisumik ilaannakortumilluunniit tuluttut ingerlanneqartarput. Taamaattumik piumasarineqaqqaassaaq pineqartuni akuerineqaqqaartinnak tuluttut pikkorissarnermi angusaqarsimassasutit.

Pikkorissartitsinerni siunertarineqarpoq suliffeqarfinni periarfissannik pitsanngorsaanissaq, imaluunniit suliffissaaleqisuugaanni suliffeqalernissaq. Naliliineq naapertorlugu pikkorissarnissamut qinnuteqarninni siunertarineqartut naapertuutsinneqanngippata pikkorissaqataasinnaanngilatit.

Pikkorissartitsinerit ilaat immikkoortukkuutaanut, tassa modulinut, arlalinnut aamma aaqqissuussaasarput. Taakkunani piumasaqaataasarpoq assersuutigalugu modul 1 angusiffigisimassagit modul 2-mut ingerlariaqqissinnaassaguit.

PKU-mi pikkorissaqataaguit pisussaaffigissavatit:
  • Pikkorissarnermut takkuttarnissat
  • Pikkorissartitsinermi tunniusimallutit peqataasarnissat
  • Pikkorissarnermik naliliinerup peqataaffigisarnissaa
  • Aammalu pikkorissartitsineq inaarutaasumik misilitsinnermik naggaserneqassappat tassani peqataanissat

Pikkorissartitsinermut takkutinngikkuit pikkorissarnermut taartisiaqarsinnaanallu pikkorissartitsineq angusiffigisinnaanngilat. Pikkorissartitsinermi tunniusimallutit peqataanngikkuit pikkorissartitsineq aamma angusiffiginavianngilat. Pikkorissartitsisup aalajangissavaa pikkorissarnermik kikkut naammassinnissimanersut.

Nammineq napparsimaneq imaluunniit qaniginerpaasat akornanni napparsimasoqarnera kisimik akuerineqarsinnaapput pikkorissariartunngitsoornissamut tunngavigisatut.

PKU-mi pikkorissaqataaguit pisinnaatitaaffigissavatit:
  • Suliffeqaruit pikkorissartitsinernullu piffissap suliffiusussap iluani ingerlanneqassappat aningaasarsiaqaannarnissat. Sulisitsisullu pikkorissarnerpit nalaani pikkorissartitsinermut akiliutinik pissarsissaaq
  • Pikkorissarnermut taartisiat, suliffissaaleqisuuguit
  • Pikkorissarnivit naammassereernerani pikkorissarsimanermut uppernarsaatisinissat

Malugiuk
Angalanissat najugaqarfigisassallu Qitiusumik Ilinniarfiup aaqqissuutissavai pisariaqarpat Majoriaq suliffissarsiuussisarfillu suleqatigalugit.

PKU-mi pikkorissartitsinissaq ilinnut piukkunnartoq siumorukku, sulisitsisunnut saaffiginnissinnaavutit periarfissat suuneri paasiniarlugit. Pikkorissarnermi piffissap suliffiusussap iluani ingerlanneqassappat, sulisitsisunnit akuersissummik pissarseqqaassaatit PKU-mi pikkorissaqataassaguit. PKU-mi pikkorissarneq piffissap suliffiusussap avataani ingerlanneqassappat pikkorissarnermut taartisiaqassanngilatit, tamatumani aningaasarsiannik annaasaqarnaviannginnavit. Suliffissaaleqisuuguit periarfissatit paasiniarumallugit suliffissarsiuussisarfimmut imaluunniit Majoriamut saaffiginnissaatit.

Akigititat 

Illit sulisitsisorisalluunniit pikkorissartitsinermut akiliummik akiliissanngilasi. Namminersorlutik Oqartussat ilinniarfiup PKU-mi pikkorissartitsinermut atatillugu aningaasartuutai matussusissavaat. Qitiusumik Ilinniarfiit pikkorissartitsinissamut atasumik angalanermut, najugassikkallarnermut nerisaqarnermullu aningaasartuutit aamma matussusertarpaat.

Lærlingit ilinniagaqarniartullu allat PKU-mi pikkorissartitsinernut atatillugu ikiorsiissutisiaqarsinnaanngillat. Inuit suliffeqanngikkallarnermi ikiorsiissutinik pisartagallit pikkorissarnermut akissarsianik pissarsisinnaanngillat taamatullu suliamik ilinniagaqarsimasut tapiissutisisinnaanatik.

Qinnuteqarneq 

PKU-mi pikkorissartitsisarnerit suliamik ilinniagaqarsimanngitsunut suliffeqartunulli pingaarnerusumik sammitinneqarput, taakkununngalu nalunaarnissaq pigajuttarpoq sulisitsisup ilinnut saaffiginninneratigut soqutiginninnerit paasiniarlugu. Sulisitsisut aamma taannaavoq peqataanissannik nalunaarutiginnittussaq.

Suliffissaaleqisuuguilli Majoriap imaluunniit suliffissarsiuussisarfiup peqataanissat nalunaarutigissavaa.
Sulisitsisuit, Majoriap imaluunniit suliffissarsiuussisarfiup arlaasa nalunaarutigigaluarpatilluunniit, qinnuteqarnissamut immersuiffissaq peqatigiillusi immersussavarsi. Suliffissaaleqisuuguit iliuusissatut pilersaarut immersussavattaaq. Immersornissaanut suliffissarsiuussisarfimmit imaluunniit Majoriamit ikiorneqassaatit.

Qitiusumik Ilinniarfiit tamarmik immikkut qinnuteqarnissamut namminneq immersuiffissiaqarput, taakkulu nittartagaanniipput. Immersuiffissiaq illit sulisitsisuilluunniit aamma ilinniarfimmut imaluunniit suliffissarsiuussisarfimmut toqqaannartumik saaffiginnillusi pissarsiarisinnaavarsi.

Ingerlatseriaaseq 

Qitiusumik Ilinniarfik akuerineqarsimanersutit pillugu ilinnut toqqaannartumik paasissutissiissaaq.

Qinnuteqarnissamut killiliussat 

PKU-mi pikkorissartitsinissanut ataasiakkaanut nalunaarnissamut piffissaliussat Qitiusumik Ilinniarfiit pikkorissartitsinissat pillugit allattuiffianni paasissutissaatigineqarput. Pikkorissartitsinissat pillugit allattuiffiit Qitiusumik Ilinniarfiit nittartagaanniipput. Taamaattoqarsimanngippat illit sulisitsisulluunniit ilinniarfimmut pineqartumut saaffiginnissinnaavusi.

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl

Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik
Imaneq 1A 301
Postboks 1601
3900 Nuuk

Oqarasuaat: (+299) 34 50 00
Fax: (+299) 34 63 64
E-mail: isiin@nanoq.gl
Inuussutissarsiorneq pillugu nittartagaq: businessingreenland.gl
Nittartagaq: www.naalakkersuisut.gl