Nuunnermi tapiissutisiat

Nalinginnaasumik paasissutissiineq 

Kalaallit Nunaanni suliffissaqartitsiniarneq pisortanit aamma namminersortunit ingerlatsivigineqarpoq. Namminersortuni aamma pisortani sulinermi atugassarititaasut inatsisit naapertorlugit maleruagassiorneqarput. Pisortani atorfillit atorfeqarnermi atugaat matumani aamma isumaqatigiissut, atorfillit ataasiakkaat malitaat, malillugit maleruagassiorneqarput. Kinguliini allassimasut pisortani atorfilinnuinnaq atuupput.

Nutaamik suliffittaarneq peqqutigalugu, suliffik nutaaq najugaqarfigisanniit allami inissisimappat, nuunnermi aningaasartuutinik amerlasuunik nassataqarsinnaavoq. Pisortani aalajangersimasumik atorfinitsinneqaruit, nuunnermi tapiissuteqarfigineqarnissamut pisinnaatitaasinnaavutit.

Nuunnermi tapiissutinik pisinnaatitaaguit, sulisitsisuit nutaap aningaasartuutit akilissavai makku:
• Angalaneq
• Pequtit assartornerat

Piumasaqaatit 

Nuunnermi tapiissutinik pisinnaatitaavutit, illit suliffimmut nutaamut atatillugu nuuttussanngoruit:
• Kalaallit Nunaanni illoqarfimmit allamit allamut
• Danmarkimit Kalaallit Nunaannut

Sulisussarsiornermi allaqqassapput pisinnaatitaaffitit ukununnga:
• Nuunnermi tapiissutit
• Angalanermut aamma pequtit assartornerannut aningaasartuutit matussuserneqarnissaat

Suliffimmit soraarnermi
Atorfiit ilaasa nuunnermi tapiissuteqarfigineqarnissamut pisinnaatissinnaavaatsit, illit atorfinnit soraaruit. Taamaattoq sivikinnerpaamik ukiuni pingasuni atorfimmi tassani atorfeqarsimanissat piumasaqaataassaaq. Atorfininninnit ukiut pingasut suli qaangiutinngitsut atorfinnit soraaruit, illoqarfigisimasannut uterninni pequtivit assartornerannut akiliutsissinnaanngilatit.

Nuunnermi tapiissutinik pisinnaatitaalluni periarfissat allat isumaqatigiissutiniissinnaapput allani.

Angalanermi aningaasartuutit 

Angalaninnut aningaasartuutivit akilerneqarnissaannut pisinnaatitaaguit, maanna illoqarfigisannit illoqarfigiligassannut nunaqarfigiligassannulluunniit angalanissat akilersissinnaavat.

Aningaasartuutit akilersissinnaavatit ukununnga:
• Illit
• Ilaqutaqaruit ilaquttatillu

Pequtit assartorneqarnerat 

Pequtivit assartorneqarnerata akilerneqarnissaannut pisinnaatitaaguit, illit sulisitsisuit akilissavai makku:
• Pequtivit poortorneqarnerat
• Najugaqarfissannut nutaamut nassiunnerat

Suliffeqarfimmut assartuillutik nutserisarfiusumut akuerisaasumut sulisitsisuit nutaap nuunnermi innersuussutitut akiliutissaq nassiutissavaa. Matuma kingorna suliffeqarfiup assartuillutik nutserisarfiusup attavigissavaatit, isumaqatigiissutigalugulu illit pequtitit qaqugu poortorneqassanersut.

Najugaqarfissannut nutaamut tikikkuit, suliffeqarfimmut assartuillutik nutserisarfimmut isumaqatigiissuteqassaatit pequtitit sumut qaqugulu aggiunneqassanersut.

Annerpaaffissaatut killiliussaq
Pequtivit qanoq amerlatigisut sulisitsisunnit akilerneqarsinnaanerannut killiliussamik peqarpoq. Ilaquttatit qanoq amerlatiginersut matumani apeqqutaavoq:
• Kisimiittut pequtaat 15 m3 tikillugu assartorneqarnerat akilersissinnaavaat
• Aappariit pequtit 30 m3 tikillugu assartorneqarnerat akilersissinnaavaat
• Meeqqat ataatsimik ilanerit tamaasa pequtit 5 m3 tikillugu initutigisumik ilassutaasarput

Assersuutigalugu katissimaguit marlunnillu meeraqarlusi, sulisitsisuit akiligassaanik pequtit 40 m3 tikillugu assartortissinnaavatit. Paarlattuanik kisimiittuuguit ataatsimik meeraqarlutit 20 m3 tikillugu assartortissinnaavatit.

Pequtit amerlanerusut assartorneqarnissaat atorfissaqartikkukku, initussuseq kubikmeter annertunerusoq nammineq akilissavat.

Sillimmasiineq
Pequtivit amigaateqarsinnaanerannut imaluunniit ajoqusersinnaanerannut, sulisitsisut nutaaq illit pequtinnut sillimmasiissaaq. Illit kisimiittuunersutit imaluunniit ilaqutaqarnersutit, sillimmasiinermi aningaasat angissusissaannut aallaaviussaaq:
• Kisimiittunut annerpaamik sillimmasiisoqarsinnaavoq 182.500 kr. tikillugu
• Ilaqutariinnut annerpaamik sillimmasiisoqarsinnaavoq 364.800 kr. tikillugu

Pequtit toqqorsivimmiitinnerat
Pisut ilaanni pequtitit toqqorsivimmiisissallugit pisariaqarsinnaavoq. Tamanna assersuutigalugu pisariaqalersinnaavoq:
• Umiarsuaq pequtinnik usisoq, illit inissiartaassannut suli nuunngitsutit tikissimappat
• Inissaaleqineq pissutigalugu piffissap ilaani utaqqiisaasumik inissiami pequtsersukkami najugaqaruit

Pequtitit toqqorsivimmiissappata, toqqorsivimmiisitsineq sulisitsisunnit nutaamit akilerneqassasoq qinnuteqaatigissavat.

Isumaqatigiissutit 

Namminersorlutik Oqartussat peqatigiiffiillu assigiinngitsut akornanni immikkut isumaqatigiissutit uani takusinnaavatit (danskisut allassimasumut ingerlaqqippoq - danskisut allassimasuani isumaqatigiissutit amerlanerummata)

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl

Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl