Erninermut atatillugu aningaasarsiaqarneq – Nalinginnaasumik paasissutissiineq

Erninermut atatillugu aningaasarsiaqarneq – Nalinginnaasumik paasissutissiineq 

Kalaallit Nunaanni suliffeqarfeqarfiit pisortanit namminersortunillu ingerlanneqarput. Namminersortut pisortallu suliffeqarfiutaanni sulinermut atatillugu pissutsit inatsisit aqqutigalugit naleqqussagaapput. Taakkua saniatigut pisortat suliffeqarfiini sulisut atorfinitsitaanerannut atugassarititaasut, isumaqatigiissutit sulisunut ataasiakkaanut atuuttut malillugit aaqqitaapput. Ataani pineqartut pingaartumik pisortat suliffeqarfiini sulisut eqqarsaatigalugit suliaapput.


Erninermut atatillugu sulinngiffeqarneq
Meerartaaruit ernininnut atatillugu sulinngiffeqarsinnaatitaavutit. Marluullusi angajoqqaatut sapaatit akunnerini katillugit 37-ni sulinngiffeqarsinnaatitaavusi:

 

  • Anaanaasoq erniffissatut naatsorsuutigineqartoq sapaatit akunnerinik marlunnik sioqqullugu naartunerminut atatillugu sulinngiffeqarsinnaatitaavoq
  • Anaanaasortaaq ernereernermini sapaatit akunnerini 15-ini erninerminut atatillugu sulinngiffeqarsinnaatitaavoq
  • Ataataasoq meeqqap inunngoreerneraniit sapaatit akunnerini 3-ni meerartaarnerminut atatillugu sulinngiffeqarsinnaatitaavoq. Sapaatit akunnerini 3-ni sulinngiffeqartoqassaaq meeqqap inunngorneraniit sapaatit akunneri 15-it siulliit iluanni
  • Taakkua saniatigut sapaatit akunnerini 17-ini angajoqqaatut sulinngiffeqarsinnaatitaavusi, taakku ilussinni agguataassavasi. Sapaatit akunnerini 17-ini angajoqqaatut sulinngiffeqarfissat ingerlanneqassapput anaanaasup sapaatit akunnerini 15-ini erninerminut atatillugu sulinngiffeqarneranut ilassutitut. Angajoqqaatut sulinngiffeqarfissat ataatsikkut ingerlassinnaanngilasi


Marluliaatitaarussi, sulinngiffeqarnissassi sivitsorneqarnissaanut pisinnaatitaavusi:

  • Anaanaasoq isumaqatigiissutini apeqqutaatillugu sapaatit akunnerinut 15-inut taarsiullugu sapaatit akunnerini 19-ini erninerminut atatillugu sulinngiffeqarsinnaatitaavoq
  • Sapaatit akunnerinut 17-inut taarsiullugu angajoqqaatut sapaatit akunnerini 21-ni sulinngiffeqarsinnaatitaavusi


Erninermut atatillugu aningaasarsiaqarneq
Pisortat suliffeqarfiutaanni atorfeqaruit, ernininnut atatillugu sulinngiffeqarninni aningaasarsiaqarsinnaatitaavutit. Isumaqatigiissutivit aalajangissavaa:

  • Ernininnut atatillugu aningaasarsiaqarsinnaatitaanersutit
  • Aamma ernininnut atatillugu sulinngiffeqarninni qanoq sivisutigisumik aningaasarsiaqarsinnaatitaassanersutit


Isumaqatigiissutit sorliit malillugit atorfeqarnerit nalunngikkukku, takussutissiami ataaniittumi allattorsimasut aqqutigalugit paasisinnaavat:

  • Sapaatit akunnerini qassini aningaasarsiaqaatigalugu angajoqqaatut sulinngiffeqarsinnaatitaanerlusi
  • Sapaatit akunnerini qassini katillugit erninermut atatillugu sulinngiffeqarsinnaatitaanerlusi


Takussutissiaq


Nalunaarnissamut pisussaaffeqarneq
Angajoqqaatut pisussaavusi, meerartaarnissassinnut atatillugu sulinngiffeqalinnginnissinni piffissaagallartillugu sulisitsisussinnut nalunaarnissamut:

  • Anaanaasoq pisussaavoq, naartunini pillugu sulisitsisuminut nalunaarutigissallugu. Taamaaliussaaq kingusinnerpaamik meerartaarnissamut naatsorsuutigisaq sapaatit akunnerinik 13-inik sioqqullugu
  • Anaanaasoq aamma pisussaavoq, sulisitsisuminut nalunaarutigissallugu qaqugukkut sulileqqinnissani naatsorsuutiginerlugu. Taamaaliussaaq ernereernermigut kingusinnerpaamik sapaatit akunnerisa 12-it qaangiunneranni
  • Ataataasoq pisussaavoq, meerartaarnerminut atatillugu imaluunniit angajoqqaatut sulinngiffeqalertussaanini pillugu. Taamaaliussaaq kingusinnerpaamik sulinngiffeqarfissatut naatsorsuutigisani sapaatit akunnerinik 4-nik sioqqullugu, aamma meeqqap inunngoreerneranit kingusinnerpaamik sapaatit akunneri 12-it qaangiutsinnagit

Meeraq napparsimmavimmut unitsinneqarpat
Meerartaarninnut atatillugu sulinngiffeqarnivit nalaani meeqqat napparsimmavimmut unitsinneqarpat, sulinngiffeqarnerit sivitsorneqassaaq. Meeqqavit napparsimmavimmi ullut uninngaffigisaasa amerlaqqataannik sulinngiffeqarnerit sivitsorneqassaaq – sivisunerpaamilli sapaatit akunnerini 12-ini.

Meeqqavit uninnganerani aningaasarsiaqarsinnaatitaavutit.

Sulinngiffeqarnerit sivitsortinniarukku sulisitsisut nalunaarfigissavat meeqqavit napparsimmavimmut unitsinneqarsimanera pillugu. Taamatuttaaq meeqqavit napparsimmavimmit angerlartinneqarnera pillugu nalunaartussaatitaavutit.


Meerartaarnermi ullormusiat
Meerartaarninnut atatillugu ullormusiaqarnissamik pisortanut qinnuteqarsinnaavutit. Taamaallaat ullormusiaqarsinnaavutit meerartaarninnut atatillugu sapaatit akunnerini aningaasarsiaqarfiginngisanni. Meerartaarnermi ullormusiat pillugit aamma qanoq qinnuteqarsinnaanersutit sukumiinerusumik allaaserisat attuumassutillit ataaniittuni paasisaqarnerusinnaavutit.


Malugiuk
Malittarisassat sulisunut taamaallaat atuupput, Kalaallit Nunaanni najugaqartunut inuillu allattorsimaffianni allassimasunut.

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl

Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl