Tjenestemanditut soraarnerussutisiaqarneq

Nalinginnaasumik paasissutissiineq 

Kalaallit Nunaanni suliffissaqartitsiniarneq pisortanit aamma namminersortunit ingerlatsivigineqarpoq. Namminersortuni aamma pisortani sulinermi atugassarititaasut inatsisit naapertorlugit maleruagassiorneqarput. Pisortani atorfillit atorfeqarnermi atugaat matumani aamma isumaqatigiissut, atorfillit ataasiakkaat malitaat, malillugit maleruagassiorneqarput. Kinguliini allassimasut pisortani atorfilinnuinnaq atuupput..

Tjenestemanditut pisortani atorfeqaruit inuunerpit sinnera soraarnerussutisiaqartinneqassaatit. Inuunerup sinnera soraarnerussutisiat inuunerup sinnera tunniunneqartarput. Tassa imaappoq soraarninngorninnit inuunerpit sinnera soraarnerussutisiaqarsinnaatitaassaatit – qanorluunniit ukioqqortulertigigaluaruit.

Soraarnerussutisiassavit annertussusissaannut makku apeqqutaapput:
• Piffissami soraarninngorfinni aningaasarsiatigut inissisimaffiit
• 23-nik ukioqalernerpit kingorna ukiut qassit Nunatsinni tjenestemanditut sulisimanerit
• 25-nik ukioqalernerpit kingorna ukiut qassit Danmarkimi/Nunani Avannarlerni tjenestemanditut sulisimanerit

Taamaattorli ukiuni 37-ni tjenestemanditut sulisimaneq soraarnerussutisiassat naatsorsorneranni annertunerpaaffissaavoq.

Tunniussineq 

Tjenestemandiuguit tjenestemanditut soraarnerussutisiassavit ilinnut tunniunneqarnissaat sulisitsisunnit isumagineqassaaq pensionisiaqarlutit soraarnissavit akuerineqarneranut atatillugu.

60-inik ukioqaleruit tjenestemanditut soraarnerussutisiassatit ilinnut tunniunneqarsinnaatitaapput.

Soraarninnut atatillugu soraarnerussutisiassavit annertussusissaat sulisitsisuit naatsorsussavaa ilinnullu paasissutissiissutigalugu.

Soraarsitaaneq 

Pissusissanik saneqqutsinermik peqquteqartumik soraarsitaaguit aatsaat 60-inik ukioqaleruit soraarnerussutisiassatit pissarsiarisinnaavatit. Pissusissanik saneqqutsinermik peqquteqartumik aatsaat soraarsitaasoqarsinnaavoq atorfimmi unioqqutitsisoqarsimappat. Tamanna assersuutigalugu peqquserlunnerusinnaavoq imaluunniit aningaasanik paaritinneqartunik tillinneq.

Missingiilluni naliliineq tunngavigalugu soraarsitaasimaguit tjenestemanditut atorfinnit ullormit soraarninnit soraarnerussutisiassatit pissarsiarissavatit. Taamaattorli sivikinnerpaamik ukiuni qulini tjenestemanditut atorfeqarsimanissat piumasaqaataavoq.

Missingiilluni naliliineq tunngavigalugu soraarsinneqarneq tassaavoq sulisitsisuit nalilerpagu suliassatit ingerlasinnaanngikkitit imaluunniit piffissap akuerineqarsinnaanerup ingerlanerani suliffinnut utersinnaanngitsutit naatsorsuutigippagu.

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl

Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl