Pisortani atorfeqartunit toqukkut qimagaasut – Ineqarneq, nuunneq illerfimmillu angallassineq

Pisortani atorfeqartunit toqukkut qimagaasut – Ineqarneq, nuunneq illerfimmillu angallassineq 

Katissimallugu aapparisaq inooqatigisarluunniit toqukkut qimaguppat inissiamik nuuttariaqalertoqarsinnaavoq. Taamaattoqassaaq sulisorisanut inissiami najugaqaraanni, inissiarlu katissimallugu aapparisap imaluunniit inooqatigisap suliffianit najugaqarfigineqarsinnaatitaasimappat.

Nuussaguit illit pisortani suliffeqartumit toqukkut qimagaasutut makkununnga akiliunneqarsinnaatitaassaatit:

  • Pequtit nuunneqarnissaannut
  • Soraarnermut atatillugu angalasoqarnissaanut
  • Illerfimmik angallassinermut


Toqukkut qimagaasut tamarmik assigiimmik pisinnaatitaaffeqanngillat. Illit pisinnaatitaaffitit katissimallugu aapparisavit isumaqatigiissutaani aalajangersarneqarput.

Maleruaqqusat matuma kinguliani allassimasut tjenestemand-init AK-mi ilaasortaasunit toqukkut qimagaasunut atuupput.


Sulisorisanut inissiaq
Pisortani aalajangersimasumik atorfillit ilaat sulisorisanut inissiami najugaqarsinnaatitaasinnaapput, atorfimmik inuttassarsiuinermi allagarsiussaq apeqqutaatillugu. Taamaalilluni sulisorisanut inissiaq tassaavoq atorfimmut atatillugu najugarisinnaasaq. Aamma tamanna isumaqarpoq atorfilik toqukkut qimaguppat sulisorisanut inissiaq utertinneqassasoq.

Katissimallugu aapparisat imaluunniit inooqatigisat toqukkut qimaguppat aammalu taassuma sulisorisanut inissiaani najugaqarussi qaammatip naanissaanut kiisalu qaammat tulliuttoq tamakkerlugu inissiami najugaqaannarnissannut pisinnaatitaavutit.

Taamaalilluni katissimallugu aapparisat imaluunniit inooqatigisat assersuutigalugu ulloq 18. oktober toqukkut qimaguppat november-ip naanissaata tungaanut sulisorisanut inissiami najugaqarsinnaatitaavutit.


Pequtinik nuussineq
Sulisorisanut inissiamit nuunniaruit pequtivit nuunneqarnissaannut akiliunneqarsinnaatitaavutit. Taamaattoqassappat katissimallugu apparisavit imaluunniit inooqatigisavit suliffiata tamanna akilissavaa.


Soraarnermut atatillugu angalaneq
Katissimallugu aapparisavit imaluunniit inooqatigisavit toqukkut qimagunnera pissutigalugu nuussaguit, soraarnermut atatillugu angalanermut akiliunneqarsinnaatitaasinnaavutit. Taamaattoqassappat toqukkut qimaguttup suliffia makkununnga akiliussissaaq

  • Illit immaqalu qitornat angerlarsimasut 18-it inorlugit ukiullit
  • Kalaallit Nunaannut Danmarki-mulluunniit toqukkut qimaguttup atorfiniffigisaanut angalaneq


Illerfimmik angallassineq
Pisut ilaanni Kalaallit Nunaanni imaluunniit Danmark-imi toqukkut qimaguttup atorfiniffigisaani illoqarfimmut nunaqarfimmulluunniit illerfiup angallanneqarnera toqukkut qimaguttup suliffiata akilertarpaa.

Assersuutigalugu katissimallugu aapparisat imaluunniit inooqatigisat Qaqortumi atorfinikkiartorluni Ilulissanit nuussimappat illerfiup Ilulissanut angallanneqarnissaa suliffiup akilersinnaavaa. Akerlianik toqukkut qimaguttoq suliffeqalerami Qaqortumi najugaqareersimaguni illerfiup Ilulissanut angalanneqarnissaa suliffiup akilissanngilaa – aamma toqukkut qimaguttoq tassani ilineqassagaluarpalluunniit.

Illerfiit umiarsuarmik angallanneqartarnerat nalinginnaasuuvoq. Tamanna periarfissaqanngippat illerfik timmisartumik angallanneqassaaq.

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl

Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl