Qanigisaralugit ilaquttat napparsimanerat toqunerallu – Sulinnginneq

Qanigisaralugit ilaquttat napparsimanerat toqunerallu – Sulinnginneq 

Qanigisaralugit ilaquttat perulullutik napparsimalertillugit amerlasuut najorusuttarpaat. Aammattaaq qanigisaralugit ilaquttat toqukkut qimaguttut amerlasuut inuulluaqqorusuttarpaat. Taamaattorli tamanna suliffimmut aningaasaqarnermullu ataqatigiissikkuminaattarpoq. Pisuni taamaattuni qanigisaralugit ilaquttat najornissaannik kissaatit akuerineqarnissaat eqqarsaatigalugu pisortani sulisut amerlanersaat aningaasarsiaqarlutik sulinngissinnaatitaapput akiliunneqarlutillu angalasinnaatitaallutik.

Aningaasarsiaqarlutit sulinngissinnaatitaaninnut akiliunneqarlutillu angalasinnaaninnut qanoq sivisutigisumik pisortani sulisimanissat isumaqatigiissutit malillugu aalajangersarneqarpoq:

  • Amerlanerit atorfininnermi aallartinneranit aningaasarsiaqarlutik sulinngissinnaatitaallutillu akiliunneqarlutik angalasinnaapput
  • Ilaat atorfeqareernermi ukiup ataatsip kingorna aatsaat aningaasarsiaqarlutik sulinngissinnaatitaapput akiliunneqarlutillu angalasinnaallutik
  • Allat atorfeqareernermi ukiut marluk kingorna aatsaat aningaasarsiaqarlutik sulinngissinnaatitaapput akiliuneqarlutillu angalasinnaallutik


Piumasaqaatit
Aningaasarsiaqarlutit sulinngiffeqarniaruit immaqalu akiliunneqarlutit angalaniaruit qanigisaralugu ilaqutaasoq perululluni napparsimasoq imaluunniit toqukkut qimaguttoq pineqassaaq.

Ilaqutaralugit qanigisat ukuupput:

  • Angajoqqaat
  • Qatanngutit
  • Meeqqat
  • Katissimallugu aapparisaq


Inuulluaqqusisoqarnissaa siunertaralugu ilaqutaasut aggersarneqassasut nakorsap nalilerpagu qanigisaralugu ilaqutarisaq perululluni napparsimasutut aatsaat naatsorsuunneqalertarpoq.


Aningaasarsiaqarluni sulinnginneq
Ilaqutaralugu qanigisat perululluni napparsimappat toqukkulluunniit qimaguppat qaammatisiutit malillugit ulluni arfineq pingasuni aningaasarsiaqarlutit sulinngissinnaatitaavutit. Perululluni napparsimasoqarnera pissutigalugu sulinngikkuit qanigisaralugulu ilaquttat sulinnginninni toqukkut qimaguppat qaammatisiutit malillugit tamatuma qaavatigut ullut arfinillit aningaasarsiaqarlutit sulinnginnissannut periarfissaqarputit.


Akiliunneqarluni angalaneq
Qanigisaralugu ilaqutarisaq illoqarfimmi allami najugaqarpat akiliunneqarlutit angalasinnaatitaavutit. Kalaallit Nunaanni Danmark-imiluunniit qanigisaralugu ilaquttavit najugarisaanut akiliunneqarlutit angalasinnaavutit. Angalassaguit ulluni nalinginnaasumik angalaffigisanni aamma aningaasarsiaqarlutit sulinngiffeqassaatit.


Malugiuk
Immikkut isumaqatigiissut malillugu atorfeqaruit isumaqatigiissummi allassimassaaq:

  • Ilaqutaralugit qanigisat perulullutik napparsimaneranni toquneranniluunniit aningaasarsiaqarlutit sulinngissinnaanersutit aammalu akiliunneqarlutit angalasinnaanersutit
  • Taamatut pisinnaatitaanissannut qanoq sivisutigisumik suliffeqarsimassanersutit

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl

Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl