Sulinermut atatillugu angalaneq

Nalinginnaasumik paasissutissiineq 

Kalaallit Nunaanni suliffissaqartitsiniarneq pisortanit aamma namminersortunit ingerlatsivigineqarpoq. Namminersortuni aamma pisortani sulinermi atugassarititaasut inatsisit naapertorlugit maleruagassiorneqarput. Pisortani atorfillit atorfeqarnermi atugaat matumani aamma isumaqatigiissut, atorfillit ataasiakkaat malitaat, malillugit maleruagassiorneqarput. Kinguliini allassimasut pisortani atorfilinnuinnaq atuupput.

Sulinermut atatillugu angalaneq tassaavoq sulininnut atatillugu angalaneq sulisitsisuit aalajangigaa. Sulinermut atatillugu angalanermi siunertarineqartut amerlasinnaapput. Soorlu imaassinnaavoq:
• Illoqarfimmi imaluunniit nunaqarfimmi allami pingaarutilimmik ataatsimiigiarniartutit
• Illoqarfimmi imaluunniit nunaqarfimmi allami ataatsimeersuariarniartutit

Suliffimmut atatillugu angalanermi sulisitsisuit angalanermi aningaasartuutit, unnuinerit ullormusiallu akilissavai. Tunniunneqartut akileraarusigaanngillat.

Suliffimmut atatillugu angalanermi akissarsiaqassaatittaaq.

Piffissaq suliffiusoq 

Sulinermut atatillugu angalanermi ulloq suliffigisat nalinginnaasumik sivisussuseqarajuppoq. Sapaatip akunneranut piffissaq suliffigisartakkat nalinginnaasumik akunnernik 40-nik sivisussuseqartarpoq. Akunnerit 40-t taakku agguataagaapput, taamaalillutit ulluinnarni tamani piffissap 7:00 aamma 17:00 akornanni akunnerit 8-t sulisassallutit.

Angalanerit akissarsissutigigakku sulisitsisunnit naatsorsuutigineqarpoq pissarsiarineqarsinnaajuarnissat, periarfissaatillugulu angalanermi suliassanik suliaqartarnissat.

Angerlarsimaffinnit/suliffinnit aallariartornermit tikiffissavit tungaanut angalanermi piffissaq naatsorsorneqassaaq. Aamma utimut angalanermi naatsorsuineq taamaassaaq, taamaalilluni akunnittarfimmit/suliffimmit aallariartornernit angerlarsimaffinnut/suliffinnut tikinnissavit tungaanut angalanermi piffissaq atuutissaaq.

Maluginiassavat sulinermut atatillugu piffissaq suliffigisat isumaqatigiissutinni immikkut ittumik maleruagassiuunneqarsimasinnaammat.

Pissutsit immikkut ittut
Sulinermut atatillugu angalaninni ullormut akunnerit nalinginnaasumik atortakkavit amerlaqatai atorlugit pisarnertut sulisassaatit. Taamaattorli pissutsit immikkut ittut makkuupput:
• Ullut angalaffiusut ullortut suliffittut tamakkiisutut aallaaviatigut isigineqarajupput – aamma angalaneq akunnerit 8-it inorlugit qaangerlugilluunniit sivisussuseqaraluarpat
• Sapaatip akunnerata naanerani imaluunniit sapaassuarni angalanerit aallaaviatigut suleqqusaalluni peqqusinertut isigineqassapput, akunnerillu atukkat nalunaarsorneqassallutik

Sapaatip akunnerata naanerani sulinermut atatillugu angalguit sapaatip akunnerata naanera piffissatut suliffissatut nalinginnaasumik isigineqanngilaq. Sapaatip akunnerata naanera piffissatut suliffissatut aatsaat isigineqassaaq sulisitsisuit sapaatip akunnerata naanerani suleqqusimappatit. Taamaattoqarsimappat sulinerunermut akissarsisinneqarsinnaatitaassaatit.

Sapaatip akunnerata naanerani ullormusiaqarsinnaatitaavutit – aamma sapaatip akunnerata naanerani sulinngikkaluaruilluunniit.

Ullormi sulinngiffiusussami isumaqatigiissutit aqqutigalugu qulakkeerneqartumi sulinermut atatillugu angalaguit, ullup sulinngiffigisassavit piffissami kingusinnerusumi taarserneqarnissaanut pisinnaatitaavutit. Tamannali taamaallaat atuutissaaq sulinngiffinni sulissagaluaruit, pissutigalugu nalinginnaasumik sulinngiffeqarnertut isigineqssammat qanorluunniit angerlarsimanngikkaluaruit sulinngiffeqarnallu.

Ullormusiat 

Sulinermut atatillugu angalatillutit aammalu najukkat akunnerit 5-t sinnerlugit qimassimagukku ullormusiaqarsinnaatitaavutit. Angerlarsimaffiup qimassinnaaneranut atatillugu nerisaqarnermut imigassaqarnermullu immikkut aningaasartuutit ullormusianit matussuserneqassapput.

Ullormusiat aningaasarsianut ilanngullugit tunniunneqartarnerat nalinginnaasuuvoq, illilli suliffiit allamik periuseqarsinnaavoq.

Qanoq annertutigisumik ullormusiaqartinneqarnissannut makku apeqqutaapput:
• Qanoq sivisutigisumik aallaqqanissat. Ullup unnuallu affaanut aallartinneqartunut tamanut ullormusiaqartinneqassaatit
• Sulisitsisut nerisassanut qanoq annertutigisumik akiliisimanersoq. Sulisitsisuit nerisat ilaat akilersimappagit tamanna ullormusiannit ilanngaatigineqassaaq
• Qanoq inissinneqarnersutit. Sulinermut atatillugu angalanerpit nalaani akunnittarfimmi inissiiffimmiluunniit allami ineqarninnut suliffeqarfiit akiliisimanngippat unnuakkut tapisianik tunineqarsinnaavutit. Tapit taakku aamma tunniunneqassapput assersuutigalugu ilaquttanni unnuiguit

Assersuutigalugu ulloq 3. marts nal. 10.00 aallaruit aammalu ulloq 5. marts nal. 12.00 uterlutit ullunut unnuanullu affanut tallimanut ullormusiaqartinneqssaatit. Akunnittarfimmi ullaakkorsiorneq akimut ilaareersoq unnuiguit ullaakkorsiorneq ullormusiannit ilanngaatigineqassaaq.

Ullut unnuallu 29-t sinnerlugit sulinermut atatillugu angalaguit ullut unnuallu 29-ssaanni ullormusiatit pingajorarterummik ikilineqassapput. Igaffimmi atortussanik atuisinnaasoqarpat piffissaq ullunut 15-inut sivikillineqassaaq, tamatuma kingorna ullormusiat pingajorarterummik ikilineqassapput.

Ullormusiat akileraarutaasussaanngillat
Ullormusiat annertussusissaat ukiut tamaasa 1. april aamma 1. oktober iluarsiivigineqartarput.

Ullormusiat annertussusaat 1. oktober 2016-imeersut uani takusinnaavatit

Ullormusiat annertussusaat 1. april 2017-imeersut uani takusinnaavatit

Sulinermut atatillugu kinguaattoorneq 

Sulinermut atatillugu angalaninni kinguaattooruit assersuutigalugu akunninnermut, immikkut ullormusianut immikkullu aningaasartuutit sulisitsisunnit matussuserneqassapput. Taamaattorli kinguaattoornerit illit nammineq pisuussutiginngikkukku sulisitsisuit aningaasartuutit aatsaat matussusissavai:
• Timmisartoq ilaaffissat assersuutigalugu sila pissutigalugu kinguaattoorpat, suliffinnut uternissavit tungaanut akunninninni immikkut ullormusiaqartinneqassaatit akunninnerillu akilerneqassalluni
• Akerlianik assersuutigalugu sinnartoorlutit timmisartoq ilaaffissat angumerinngikkukku immikkut aningaasartuutaasut matussuserneqassanngillat – aamma billetsimut nutaamut akiliunneqassanngilatit

Sulisitsisullu isumaqatigiissutigineqarsinnaavoq suliffinnut uternissavit tungaanut sulisinnaanerit pisinnaasoq. Taamaattoqassappallu akissarsiaqartinneqassaatit.

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl

Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl