Suliassat immikkut ittut – sulisut sinniisui sulisullu allat illersorneqartut

Nalinginnaasumik paasissutissiineq 

Kalaallit Nunaanni suliffissaqartitsiniarneq pisortanit aamma namminersortunit ingerlatsivigineqarpoq. Namminersortuni aamma pisortani sulinermi atugassarititaasut inatsisit naapertorlugit maleruagassiorneqarput. Pisortani atorfillit atorfeqarnermi atugaat matumani aamma isumaqatigiissut, atorfillit ataasiakkaat malitaat, malillugit maleruagassiorneqarput. Kinguliini allassimasut pisortani atorfilinnuinnaq atuupput.

Sulisut sinniisuat atassuteqaataavoq:
• Sulisut aqutsisullu akornanni
• Sulisut sulisullu peqatigiiffiata akornanni

Sulisut sinniisuata sulisitsisoq peqatigalugu sapinngisamik sulinermi pissutsit siuarsarniartussaavaat aamma sulinermi pissutsit eqqissisimanartut pitsaasullu ataavartinneqarnissaat isumagisussaavaat.

Sulisut sinniisuata ilaannikkooriarluni isummat suliffiup aqutsisuisa isumaannut naapertuutinngitsut saqqummiuttartussaavai. Taamaattumik sulisunut sinniisut pillugit maleruaqqusaqarpoq, sinniisunik soraarsitsiniarnermut ajornakusoortitsisinnaasunik.

Sulisut sinniisuannut tamanut assigiinnik maleruagassaateqartoqanngilaq, naak isumaqatigiissuterpassuit assigiikanneraluartut. Taamaammat sulisut sinniisuannut isumaqatigiissut atorfininni isumaqatigiissutaasoq pissarsiarisariaqarpat.

Sulisut sinniisuat isumaqatigiissut namminermut tunngasoq naapertorlugu soqutigisani suliarisarisinnaavai taamaattumillu isumaqatigiissut taanna naapertorlugu ilaasortat taamaallaat sinniisuuffigalugit.

Suleqatigiissitat allat illersugaasut tassaasinnaapput sulliviup avatangiisai pillugit sinniisut aamma isumannaallisaaneq pillugu sinniisut – sulisut sinniisuannut sanilliullugit – atorfillit kikkuugaluartulluunniit soqutigisaannik suliaqartuupput.

Suliassat immikkut ittut iluini suliat 

Sulisut sinniisuat suleqatiminut tunngatillugu aqutsisunut sinniisuuvoq. Sulisutut sulisut sinniisuat saaffigissavat, assersuutigalugu makkua naammaginngikkukkit:
• Atorfinitsitaanermi pissutsit
• Sulinermi atugarisat
• Suliffimmik naliliisarneq
• Sullivimmi avatangiisit

Imaassinnaavoq sullivimmi avatangiisit pillugit sinniisoq imaluunniit isumannaallisaaneq pillugu sinniisoq atassuteqaataasinnaasoq.

Aamma suliffimmi sulisoq ajornartorsiuteqalerpat sulisut sinniisuat tassaavoq aallaqqaammut iliuuseqartussaq.

Sulisut sinniisuat aqutsisunut isumaqatigiinniarsinnaanngorlugu kattuffimmit ilaatigut ukuninnga ilinniartinneqartarpoq:
• Isumaqatigiinniarnermi periutsit
• Sulisitsisutut sulisullu akornanni inatsisitigut maleruaqqusat

Sulisut sinniisussaannik toqqaaneq 

Suliffimmi ikinnerpaamik tallimanik sulisoqaruni assigiimmik isumaqatigiissummik peqartumik, taava sulisut sulisutut sinniisussaminnik taassumalu sinniisussaanik toqqaassapput.

Suliaqarfiup ataatsip iluani sulisut arlariinnik sinniisoqarpata, ataatsimut sinniisussamik toqqaasoqarsinnaavoq. Ataatsimoortumik sinniisup suleqatini sinnerlugit sulisunut tamanut tunngatillugu apeqqutit pineqartillugit sulisitsisoq oqaloqatigisarpaa, nalinginnaasumillu sulianut allanut tunngatillugu sulisitsisumik isumaqatigiinniartarluni.

Sulisut sinniisuattut taassumalu sinniisuatut toqqarneqartut aqutsisumut aamma Sulisoqarnermut tunngatillugu allaffimmut nalunaarutigineqassapput.

Suliffimmi suleqatigiinnissamut ataatsimiititaqarpat sulisut sinniisuat pinngitsoorani ilaasortaassaaq.

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl