Tunniussineq

Tunniussineq 

Piginneqatigiilluni inissiaq inissiaavoq piginneqatigiilluni inissiaatillit peqatigiiffiannit pigineqartoq, aammalu peqatigiiffimmi ilaasortaasut atuisinnaatitaaffigisaat. Piginneqatigiilluni inissiaatillit peqatigiiffiannut ilaasortat inissiat najukkatik namminneerlutik pigisarinngilaat. Kisiannili tamarmik immikkut peqatigiiffiup pigisaanut piginneqataapput. Taamaattumik piginneqatigiilluni inissiaatillit peqatigiiffianni ilaasortat piginneqataasunik taaneqartarput. Piginneqatigiilluni inissiaatillit peqatigiiffiat ataatsimik amerlanerusunilluunniit illuuteqarsinnaavoq, kisiannili illit piginneqataasutut inissiamik aalajangersimasumik ataasiinnarmik atuisinnaatitaavutit.

Piginneqatigiilluni inissiamit najukkannit nuukkusukkuit, inissiaq piginnginnakku tunisinnaanngilat. Kisianni piginneqatigiilluni inissiaatillit peqatigiiffianni piginneqataassutit piginneqataasumut nutaamut tunniussinnaavat. Tassalu inuk alla piginneqatigiilluni inissiamik atuisinnaatitaaffimmik tigusissaaq. Piginneqataassut aatsaat piginneqataasumut nutaamut tunniunneqarpat piginneqataanerit unissaaq.

Piginneqataassutivit piginneqataasumut nutaamut tunniunneqarnissaa pillugu piginneqatigiilluni inissiaatillit peqatigiiffianni ilaasortaaffigisanni siulersuisut qinnuigissavatit.

Piginneqatigiilluni inissiaatillit peqatigiiffiat piginneqataassutit kimut tunniussinnaanerit pillugu maleruagassanik aalajangersaasussaavoq. Assersuutitut taaneqarsinnaavoq tunniussinermi imatut tulleriiaarisoqassasoq:

  • Angajoqqaavit arlaannut qitornannulluunniit, imaluunniit inummut sivikinnerpaamik ukiuni marlunni inissiami inoqutaasimasumut
  • Piginneqatigiilluni inissiaatillit peqatigiiffiani ilaasortaaffigisami inunnut allanut, piginneqatigiilluni inissianik paarlaakkussi
  • Inunnut piginneqatigiilluni inissiaatillit peqatigiiffianni utaqqisut allattorsimaffiannut allatsissimasunut


Misissuineq akigititarlu
Piginneqatigiilluni inissiaq najukkat tunniutilerukku, piginneqatigiilluni inissiaatillit peqatigiiffiata ilaasortaaffigisavit inissiaq misissussavaa. Tassalu siulersuisut inissiaq ajoquteqarnersoq amigaateqarnersorlu misissussavaat, taakkulu misissuinermut nalunaarusiamut allattorneqassapput. Misissuinermut ilaanissamut aammalu sulianik ilisimasalimmik ilaqarnissamut pisinnaatitaaffeqarputit.

Piginneqataassutit tunniukkukku piginneqataassummut akiusoq ukunannga qaffasinnerussanngilaq:

  • Piginneqataassutivit nalinga
  • Piginneqatigiilluni inissiami pitsanngorsaataasimasut nalingat
  • Piginneqatigiilluni inissiami aserfallatsaalineqarsimanngitsut nalingat

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl