Inissialiornermut tapiissuteqartarneq (Boligstøttehuse) aqqutigalugu illuutit – Toqusoqarnerani pigisanik nalilersuineq

Inissialiornermut tapiissuteqartarneq (Boligstøttehuse) aqqutigalugu illuutit – Toqusoqarnerani pigisanik nalilersuineq 

  • Kommune Kujalleq

Inissialiornermut tapiissuteqartarneq aqqutigalugu illuut tassaavoq illu, inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq illumik piginnittoq Namminersorlutik Oqartussanit illumik sananissamut aningaasanik taarsigassarsisimassaaq. Taamaammat taarsigassarsiarisat nalikillilerneqarnissaat imaluunniit taarsigassarsiarisat tamakkiisumik akilersimanissaat tikillugu, Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq. Tamatuma kingunerisaanik inissialiornermut tapiissuteqartarneq aqqutigalugu illuummik piginnittutut INI attaveqarfigisartussaavat.


Inissialiornermut tapiissuteqartarneq aqqutigalugu illuutilik toquppat, INI-p eqqartuussivimmik kingornussassanik suliaqartoq nalunaarfigissavaa makku pillugit:

  • Toqukkut qimaguttup taarsigassarsiai. Assersuutigalugu tassaasinnaapput  taarsigassarsiat erniaqanngitsut aamma taarsersugassaanngitsut, taarsigassarsiat allanngortitat, taarsigassarsiat aaqqissuuteqqitat, nammineq illuliamut imaluunniit sanaqateqarluni illuliamut taarsigassarsiat imaluunniit taarsigassarsiat nalinginnaasumik ernialersukkat
  • Akiitsut sinneri
  • Akiligassat kinguaattoorutaasimasinnaasut
  • Piginneqatigisimasinnaasat


Toqukkut qimaguttup ilaqutai imaluunniit piginneqatai illumi suli najugaqarsimappata, pigisanut illumullu akisussaaneq nalinginnaasumik eqqartuussivimmi kingornussassanut tunngasunik sulialimmit tiguneqartarpoq. Eqqartuussivimmi kingornussassanik sullissisup  illu kimit kingornunneqassanersoq matuma kingorna misissortarpaa.


Inissialiornermut tapiissuteqartarneq aqqutigalugu illuummik kingornussisimaguit, inissialiornermut tapiissuteqartarneq aqqutigalugu illuummik piginnittuusinnaanermut piumasaqaatit peqqussummiittut naammassisimaneritit matumalu kingorna illu tigummiinnarsinnaanerit INI-p nalilersussavaa. Assersuutigalugu imaassinnaavoq illit:

  • Najugaqarnissamut pisussaaffik eqquutsissinnaagit eqquutsikkumagilluunniit
  • Taarsigassarsiat erniaat utertillugillu akilersornerat akilersinnaagit
  • Namminersorlutik Oqartussanit taarsigassarsineq aqqutigalugu inissialiornermut tapiissuteqartarneq aqqutigalugu illumik allamik pigisaqariinngitsutit


Illit kissaatigigukku INI-p tikkuussisuusumik illu nalilersortissinnaavaa kiisalu tikkuussisuusumik taarsigassarsianik naatsorsuusiorsinnaavoq misissorsinnaallugu illit illup nalinga sinnerlugu kingornunneranut sanilliullugu akiitsoqalerumaarnersutit. Tamanna 10.000 kr.-it missiliorlugit akeqartarpoq, illillu nammineerlutit akiligassarissallugu.


Eqqartuussivimmi kingornussassanik sullissisup suliaq nalilersoreerpagu INI makku pillugit nalunaarutisissaaq:

  • Piginneqataasoq kingornussassat allanngortinnagit illumiiginnarsinnaasoq
  • Kingornussisussat illu tigugaat
  • Imaluunniit illu Namminersorlutik Oqartussanut utertinneqarluni tunniunneqartoq


Illumik piginneqataaguit imaluunniit kingornussiguit, qaammatikkaartumik akiligassaq ilinnut nassiunneqartalissaaq.


Allaaserisat attuumassutillit

INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl