Inissialiornermut tapiissuteqartarneq (Boligstøttelån) aqqutigalugu taarsigassarsianik aaqqissuusseqqinneq – Qinnuteqarneq

Inissialiornermut tapiissuteqartarneq (Boligstøttelån) aqqutigalugu taarsigassarsianik aaqqissuusseqqinneq – Qinnuteqarneq 

Inissialiornermut tapiissuteqartarneq aqqutigalugu illuut tassaavoq, illu inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq, illumik piginnittoq illup sananissaanut inissialiornermut tapiissuteqartarnermik aaqqissuussineq malillugu Nunatta karsianiit aningaasanik taarsigassarsisimavoq. Taamaammat taarsigassarsiat tamakkerlugit utertillugit akilernissaasa tungaannut Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq. Tamatuma kingunerisaanik inissialiornermut tapiissuteqartarneq aqqutigalugu illuutilittut INI saaffigisartussaavat.

Qaammatikkaartumik akiligassat akilernissaat ajornartorsiutigigukku, taarsigassarsiavit aamma akiligassat akiligassanngortut aaqqissuuteqqillugit allanngortinnissaat eqqarsaatersuutigisariaqarpat. Tassa imaappoq, taarsigassarsiarisatit nutaanngitsut nutaanngorlugit allanngortissinnaavatit. Taarsigassarsiat nutaat:

  • Ukiumut 6 %-imik ernialerneqartarput
  • Piffissami sivisunerpaamik ukiuni 33-ni utertillugit akilersugassaapput, taakkulu qaammatikkaartumik akiligassat 396-it naleqqatigaat

    Tapiissutit ilanngaatigereerlugit qaammammut akiliutaasassaaq:
  • Minnerpaamik 420 kr. ukiumoortumik kvadratmeter-ip ataatsip nalinga
  • Akileraarutitit ilanngaatigereerlugit qaammatikkaartumik isertitavit annerpaamik pingajorarterutaa

Illut assersuutigalugu 80 kvadratmeter-iuppat ukiumoortumik tapiissutit ilanngaatigereerlugit akilertagassatit tassaassapput 80 kvadratmeter x 420 kr. = 33.600 kr.

Taamaalilluni qaammammut akiliutissaq ima atsigissaaq 33.600 kr. / 12 = 2.966 kr.

Qassinilluunniit meeraqaraluaruit, tapiissutit ilanngaatigereerlugit qaammammut akilertagassat taama angitigiuaannassaaq.


Piumasaqaatit
Taarsigassarsiat aamma akiligassat kinguaattoorutit aaqqissuuteqqillugit allanngortinnissaat qinnuteqaatigisinnaajumagukku

  • Taarsigassarsiat erniallit atorlugit inissialiornermut tapiissuteqartarneq aqqutigalugu illuummik peqassaatit
  • Imaluunniit taarsigassarsianik erniaqanngitsunik taarsersugassaanngitsunillu nammineerlutit illuliamik illuuteqassaatit, innaallagissamut, toqqaviliorneranut imaluunniit pitsanngorsarneranut ernialersukkanik taarsigassarsiaqarlutit

Qaqortumi, Nuummi, Sisimiuni Ilulissaniluunniit najugaqaruit, taarsigassarsiatit aaqqissuuteqqillugit allanngortissinnaanngilatit.


Qinnuteqarneq
Inissialiornermut tapiissuteqartarneq aqqutigalugu taarsigassarsiavit allanngortinnissaat soqutigigukku, qinnuteqarnermi immersugassaq immersussavat. Taanna quppernermi uani immersugassat akornanni nassaarisinnaavat. Immersugassami allassimasarpoq, qinnuteqaammut suut ilanngunneqassanersut.

Qinnuteqaat uppernarsaatinik ilallugu najukkanni INI-p allaffeqarfianut tunniussinnaavat nassiulluguluunniit. Qinnuteqaatip suliarinissaanut ikiortikkumallutit INI-p allaffeqarfia aamma saaffigisinnaavat.

Pingaaruteqarpoq uppernarsaatit eqqortut tamakkerlugit ilanngunnissaat eqqaamasallugu. INI-mit piumaffigineqarnerpit kingorna sapaatit akunneri sisamat qaangiunneranni uppernarsaatit tamakkerlugit INI-p tigusimanngippagit, qinnuteqaatit annertunerusumik suliarineqaqqinnani unitsinneqarallassaaq.


Akuersissut
Qinnuteqaatit akuerineqassappat Namminersorlutik Oqartussanit toqqaannartumik nalunaarutisissaatit. Matuma kingorna taarsigassarsinermi uppernarsaat aamma taarsigassarsiat qularnaveeqqutaat INI-p suliarissavai, taakkulu akiitsut akilersorneqarnissaat pillugu pilersaarummut ilanngullugit ilinnut nassiunneqassapput. Allannguinerup atuutilernissaa sioqqullugu, taarsigassarsinermi uppernarsaat aamma taarsigassarsianut qularnaveeqqut atsiorneqassapput.

Piffissami aggersumi akilersuussineq PBS aqqutigalugu qaammatikkaartumik akiligassat akilerneqartalissapput.


Itigartitsineq
Qinnuteqaatit akuerineqarsimanngippat, taamaaqataanik sooq akuerineqarsimannginnerit pillugu nassuiaammik allakkatigut nalunaarutisissaatit.

Allaaserisat attuumassutillit

INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl