Uumasuuteqarneq

Nalinginnaasumik paasissutissiineq 

INI-p inissiaataa attartortittagaq tassaavoq pisortat inissiaataat attartortittagaq, Namminersorlutik Oqartussanit imaluunniit kommuninit pigineqartoq aammalu INI-mit aqunneqartoq. Tassa imaappoq, INI-p inissiamut tunngasut nalinginnaasut isumagisarpai, assersuutigalugu Namminersorlutik Oqartussat aamma kommunit sinnerlugit uumasuuteqarnermut malittarisassanik atuutsitsineq.

Inimi attartukkanni qimmeqarniaruit imaluunniit qitsuuteqarniaruit kommunimiit akuersissummik peqaqqaartariaqarputit. Matuma kingorna INI-mut akuersissummik qinnuteqassaatit.

Akuersissummik peqarnak qimmeqaruit imaluunniit qitsuuteqaruit, maleruaqqusanik tamanna unioqqutitsineruvoq, tamannalu inimik attartornivit atorunnaarsinneqarneranik kinguneqarsinnaavoq. Siullertut aarlerisaarummik nassinneqassaatit, matuma kingorna qimmit imaluunniit qitsuutit pigiunnaanngikkukku imaluunniit akuersissummik pissarsinissat isumaginngikkukku, illit inimik attartornerit atorunnaarsinneqassaaq.

Aalisagaaraateqarsinnaavutit, timmiaateqarsinnaavutit ineqartillugu aamma kikkaasuuteqarsinnaavutit ineqartillugu kiisalu saaniluuteqarsinnaallutit. Taakkununnga taamaalillutit akuersissummik qinnuteqartariaqanngilatit.

Piumasaqaatit 

INI-p qimmeqarsinnaanerit imaluunniit qitsuuteqarsinnaanerit akuerisinnaavaa:
• Illumi najugaqaruit
• Politiit qimmiat imaluunniit tappiitsut qimmiat pineqarpat
• Kommunimit akuersissummik peqaruit

Qimmeqarnissat imaluunniit qitsuuteqarnissat INI-p akuerippagu, inimut attartornermut sillimmasiissut qaammatinik pingasunik naleqartoq saniatigut akiliutigissavat.

Eqqumaffigissavat akuersissut uumasuutigineqartumut pineqartumut taamaallaat atuummat. Qimmimik imaluunniit qitsummik allamik pisaarniaruit, taamaalillutit akuersissummik nutaamik qinnuteqassaatit.

Qinnuteqarneq 

Akuersissummik qinnuteqarniaruit qinnuteqaammik allaganngukkamik sanassaatit, taassumalu imarissavaa:
• Qimmeqarnissamut imaluunniit qitsuuteqarnissamut kommunip akuersissutaata nuutinnera
• Ateq, najugaq kiisalu inuup normua

Illit najukkanni INI-p allaffeqarfianut qinnuteqaatit nassiulluguluunniit tunniutissavat.
INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl