Ileqqorissaarnissamut maleruagassat aamma eqqaamiut naammagittaalliuuteqarnerat

Nalinginnaasumik paasissutissiineq 

INI-p inissiaataa attartortittagaq tassaavoq pisortat inissiaataat attartortittagaq, Namminersorlutik Oqartussanit imaluunniit kommuninit pigineqartoq aammalu INI-mit aqunneqartoq. Tassa imaappoq INI-p inissiamut tunngasut nalinginnaasut amerlasuut isumagisarpai, assersuutigalugu ileqqorissaarnissamut maleruagassanik akuersisarneq aamma atuutsitsineq, aamma eqqaamiut naammagittaalliuuteqarnerannik suliaqarneq.

Ileqqorissaarnissamut maleruagassat atuutsitaapput, ineqarfimmi kikkunnut tamanut isumannaatsuunissaq iluarisimaarnissarlu pillugit, immissinnut eqqarsaatiginissarsi aamma inissiat illersorsinnaasumik isumagineqarnissaat pillugit, matumani ikuallattoornermi isumannaatsuunissaq, qimaaffissiat kiisalu ajoqusernerit akornusersuinerillu killilersimaarnissaat ilanngullugit.

Illit pillutit aamma eqqaamiutit eqqarsaatigalugit ileqqorissaarnissamut maleruagassat malissavatit. Ileqqorissaarnissamut maleruagassat sakkortuumik unioqqutikkukkit, inissiamik attartornivit taamaatinneqarnera angoratarsinnaavat.

Eqqaamiuit INI-p ileqqorissaarnissamut maleruagassai eqquutsinngikkunigit, allakkatigut naammagittaalliornissannut periarfissaqarputit. Eqqaamiut naammagittaalliuutaat sorpassuarnut tunngasinnaapput, assersuutigalugu nipituuliortoqarnera imaluunniit peqqissaannginnerujussuaq naammagittaalliutigineqarsinnaapput.

INI-p nalinginnaasumik ammasarfiata avataatigut eqqaamiorisannit assut nipiliornermit akornusersorneqaruit, INI-p oqarasuaatikkut pigaartui aqqutigalugit nipiliorneq nipiliortullu uppernarsarnissaanut ikiorneqarsinnaavutit.

Ileqqorissaarnissamut maleruagassat 

INI-p inissiaataani attartortittakkani ileqqorissaarnissamut maleruagassat tassaapput:

Eqqagassat
Inissiaqarfimmi igitanut nakkartitsiveqarpat, igitanut nakkartitsivimmut igitsinnagit igitatit pappiaqqamut imaluunniit puussiamut poorluarsimassavatit. Inissiaqarfimmi igitanut nakkartitsiveqanngitsumi igitanut atortussiamut eqqakkatit inississavatit. Igitat majuartarfinnut imaluunniit eqqaaveqarfiup naqqanut ilissanngilatit.

Ataatsimoorussamik aneerasaartarfiit majuartarfiillu
Inissiarisavit silataani aneerasaartarfiit majuartarfiillu eqqiluitsuutinnissaannut peqataassaatit. Sikkilit, meeqqanut qamutit assakaasullit, qamuteeqqat allallu majuartarfinnut, eqqaaveqarfinnut imaluunniit aneerasaartarfinnut ilisussaanngilatit.

Antennit
INI-p allaganngorlugu akuersissutaanik peqanngikkuuit, silami antenninik ikkusseqqusaanngilatit. Imaassinnaavoq qularnaveeqqummik akiliissasutit, antennit ikkunneranni kingusinnerusukkulluunniit illup pigineqartup ajoquseratarsimasinnaanerata iluarsaanneranut atorneqartussamik.

Uffarfik, uffarfiup kuutsiffia, perusuersarfik aamma erngup kuutsiffii
Imermik errortortakkamut erruutikunik, vatsinik assigisaannilluunniit perusuersartarfimmut igitsissanngilatit. Erngup ruujorinik erngartunik, anartarfiup sitserunnerinik imaluunniit erngup ruujorinik allanik erngartunik peqartarpat, taakku pillugit INI erngersumik ilisimatissavat.

Mingutsitsineq
Ataatsimoorussamik atortulersuutit, assersuutigalugu majuartarfiit, naasorissaaviit imaluunniit pinnguartarfiit mingutserneqaqqusaanngillat. Illup pigisap qarmaanut imaluunniit qisuttaanut titartaassanngilatit, kigartuissanngilatit qalipaanalluunniit. Taama ilioruit, illit akiligassannik INI-p eqqiaaneq iluarsaassinerlu pisariaqartoq suliarissavaa.

Uumasuutit
INI-p allaganngukkamik akuersissutaanik peqanngikkuit qimmeqarsinnaanallu qitsuuteqarsinnaanngilatit. Pisuni immikkut ittuni ilaqutariinnut illuni affarleriiaani qimmeqarnissamut qitsuuteqarnissamullu INI taamaallaat akuersissuteqarsinnaaoq. Qimmeqarnissamut qitsuuteqarnermulluunniit immikkut ittumik qularnaveeqqummik INI piumasaqaateqarsinnaavoq.

Sannatit aamma nipilersorneq
Sannatit nipitusinnaasut, assersuutigalugu qillerutit, eqqaamiuusut eqqarsaatigalugit nal. 8 aamma 19 akornanni taamaallaat atorneqarsinnaapput. Majuartarfinni, aneerasaartarfinni imaluunniit kiilerimi nipiliorluni pinnguarneq inerteqqutaavoq. Radio, fjernsyni, immiussissut, oqaluttartoq imaluunniit CD-mik nipilersuut eqqaamiuusunut akornutaasumik atorneqassanngillat. Nuannannerit nipiliorfiusut eqqaamiut akuersisimanngippata ingerlateqqusaanngillat. Nipilersoqatigiit sungiusarneri imaluunniit nipilersornermik ilinniartitsinerit attartortitsisumik siumoortumik isumaqatigiissuteqarsimanissamik piumasaqaateqarput.

Init toqqorsiviit
Inini toqqorsivinni assigisaanniluunniit ikuallajasunik, soorlu benzin, petroleum, terpentin imaluunniit lakkimik ilisaqaqqusaanngilatit. Init taama ittut parnaaqqatittassavatit – aamma taakku atorneqanngikkaluarpataluunniit.

Kiassaatit
Kiassaatit erngarpata imaluunniit kiassaateqarfiup ilaa alla ajorpat, tamanna INI-mut ernersumik nalunaarutigissavat.

Allagartalersuineq
Allagartalersuineq, matumi allagartat minillugit, INI-mit akuersissummik peqarnissamik piumasaqaateqarput.

Atisat errortat
Aneerasaartarfinni manisineq eqqaamiunut allanut akornutaassanngilaq.

Najugaqartut immikkoortortaminni maleruagassanut namminneq sunniuteqarsinnaapputtaaq, tassa siulersuisut aqqutigalugit.

Inissiami allannguinerit
Iigaasanik ikkussuisinnaanallu piiaasinnaanngilatit. Inissiami allannguinerit taamaallaat ingerlassinnaavatit INI-mit allaganngorlugu akuersissummik peqaruit. Allannguinerit nammineerlutit akiligassaraatit. Attartornerup unitsinnerani INI-p piumasarisinnaavaa inissiaq ilinnit tiguneqarnermisut iluseqalerseqqinneqassasoq, tamannalu illit nammineerlutit akiligassarivat. Akuersissuteqanngitsumik inissiaq allanngortitersimagukku, taarsiissummik akiligassinneqariaannaavutit.

Eqqaamiut naammagittaalliuuteqartarnerat 

Naammagittaalliulersinnak eqqarsaatigisariaqarpat eqqaamiorisavit illit pillutit naammagittaalliuteqarsinnaanissaa qanoq igissanerit.

Amerlanertigut eqqaamiut naammagittaalliornissaat pinngitsoorneqarsinnaavoq, eqqaamiorisat attaveqarfigisaraanni pisullu pillugit eqqissilluni oqaloqatigiittaraanni:
• Assersuutigalugu arfininngornikkut unnukkut pulaartoqarniaruit, eqqaamiorisannut tamanna paasissutissiissutigigukku pitsaasuusinnaavoq. Nuannattoqarnissaa piareersimaffigineqassaaq, taamaalillunilu nipitulaartumik nipilersorneq akueriuminarnerusinnaavoq
• Isumaqaruit assersuutigalugu eqqaamiuusup ernera inissiarisassinnut qanippallaami scootereqartartoq, eqqissisimasumik aperikkit ungasinnerulaamut nuussinnaanersut, putsup motoorillu nipiliornerata illit ilaquttatit akornusersormagit

Eqqaamiorisavit oqaloqatiginerata kingorna pissutsit allanngunngippata, immersugassaq “Eqqamiorisamik naammagittaalliuteqarneq” immersussavat.

Eqqaamiorisamik naammagittaalliuteqarneq

Immersugaq najukkanni INI-p allaffeqarfianut nassiulluguluunniit tunniutissavat. Matuma kingorna pissutsit pillugit INI misissuilluni aallartissaaq immaqalu eqqaamiuusut allat apersorlugit, illit misigisattut misigisaqarsimanersut. Matumalu kingorna illit eqqaamiunnut INI allaganngukkamik mianersoqqussummik nassiussissaaq.

Oqarasuaatikkut pigaartoqarneq 

Eqqaamiorisannit assut nipiliornermit akornusersorneqaruit, INI-p oqarasuaatikkut pigaartua aqqutigalugu erngersumik ikiortissarsiorsinnaavutit.

Taamaattoq pigaartut taamaallaat ukunani atorneqarpoq:
• Qaqortoq
• Narsaq
• Nuuk
• Sisimiut
• Aasiaat

Pigaartoqarnera atorumagukku, INI-p pingaarnertut oqarasuaataata normua 70 10 00 atorlugu sianissaatit Securitas-imullu nuunneqassaaq, taakku illit najugaqarfinnut pigaartumik ornigutsitsissapput. Pigaartuusoq takkutissaaq nipiliornerlu nalunaarsorlugu piffissarlu allanneqassaaq.

Paasissutissat INI-mut nassiunneqassapput, matumalu kingorna najugaqartoq nipiliortoq saaffigineqassalluni. Qaammatit arfinillit kingulliit ingerlaneranni saaffiginnissutit taama ittut pingasut tiguneqarsimappata, attartorneq taamaatinneqarsinnaavoq.
INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl