INI-p inissiaataanut attartortittakkanut utaqqisut allattorsimaffiat – Nalinginnaasumik paasissutissiineq

INI-p inissiaataanut attartortittakkanut utaqqisut allattorsimaffiat – Nalinginnaasumik paasissutissiineq 

  • Kommune Kujalleq

    Kommune Kujalleq nammineerluni kommunip inissiaatai aquppai.
INI-p inissiaataa attartortittagaq tassaavoq pisortat inissiaataat attartortittagaq, Namminersorlutik Oqartussanit imaluunniit kommuninit pigineqartoq aammalu INI-mit aqunneqartoq. Tassa imaappoq INI-p inissiamut tunngasut nalinginnaasut isumagisarpai, assersuutigalugu inissianut attartortittakkanut utaqqisut allattorsimaffiannik aqutsineq.

Inissiamik attartortittakkamik pissarsisinnaassaguit najukkanni INI-p allaffeqarfiani utaqqisut allattorsimaffiannut allatsissimassaatit. Utaqqisut allattorsimaffiannut allatsittariaqarputit, illoqarfinni aamma nunaqarfinni tamani inissianik attartortittakkanik atorneqanngitsunik peqartoqanngimmat. Utaqqisut allattorsimaffiata taamaalilluni inuup sivisunerpaamik utaqqisimasup, siulliulluni kissaatigisatut angissuseqartumik inissiamik attartortittakkanik pissarsinissaa isumagisarpaa.

Utaqqisut allattorsimaffii arlallit nassaassapput, assersuutigalugu:
  • Nalinginnaasumik utaqqisut allattorsimaffiat
  • Kissaatigalugu nuunnissamik utaqqisut allattorsimaffiat
  • Sulisorisanut inissianut utaqqisut allattorsimaffiat

Utaqqisut allattorsimaffiini siulliussisarneq assigiittanngilaq. Sulisorisanut inissiami utaqqisut allattorsimaffiat assersuutigalugu nalinginnaasumik utaqqisut allattorsimaffiannut sanilliullugu qaffasinnerusumik salliunneqartarpoq. Tamatuma kingunerisaanik sulisoriligaq nutaaq ilinnit siulliulluni sulisorisanut inissiamik pissarsinissamut pisinnaatitaavoq, naak illit nalinginnaasumik utaqqisut allattorsimaffianni sivisunerusumik utaqqisutut allaqqasimanikuugaluaruilluunniit. Tassa imaappoq utaqqisut allattorsimaffianni qummut ammullu nikerartinneqarsinnaavutit.

Utaqqisut allattorsimaffiata qanoq takitigineranut apeqqutaassaaq, inuit qassit inissiamik illit qinnutigisavit assinganik angeqqataanillu aamma sumi inissisimanerata assinganik qinnuteqarsimanersut. Inissiap qanoq angitiginissaa aamma sumi inissisimanissaa pillugit piumasaqaatitit amerlaneruleriartoraangata, nalinginnaasumik utaqqineq sivitsoriartortarpoq.


Utaqqisut allattorsimaffianniinnermut akiliut
Namminersorlutik Oqartussat aamma kommunit sinnerlugit inissiat INI-p aquppai. Utaqqisut allattorsimaffianniinnermut akiliut 100 kr.-iuvoq, inissiaatileqatigiiffinnut tamanut allatsinnissat kissaatigigukku. Tassa imaappoq INI-p inissiaataanut attartortittakkanut allatsinniaraanni, utaqqisut allattorsimaffianniinneq ukiumut 100 imaluunniit 200 kr.-inik akeqarpoq.

Ukiut tamaasa utaqqisut allattorsimaffianniinnermut akiliuteqartassaatit. Girokort-ikkut akiliiffissamik INI-p allakkatigut nassissavaatit, taanna aningaaserivimmi allakkerivimmiluunniit akilissavat. Utaqqisut allattorsimaffianniinnermut akiliut akilinngikkukku, allattorsimaffimmiit peerneqassaatit taamaalillutillu inissarsiortutut inissisimaffiit annaassallugu. Taamaammat pingaartuuvoq najukkannit anillutit nuussimaguit, tamanna INI-mut nalunaarutigissagakku.


Malugiuk
Utaqqisut allattorsimaffianni qanoq inissisimanerit paasiumagukku, INI-p nittartagaani tamanna takusinnaavat imaluunniit najukkanni INI-p allaffeqarfia attaveqarfigisinnaavat.
A/S INI
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl