Attartortup allamut attartortitsisinnaaneranut qinnuteqaat

Nalinginnaasumik paasissutissiineq 

INI-p inissiaataa attartortittagaq tassaavoq pisortat inissiaataat attartortittagaq, Namminersorlutik Oqartussanit imaluunniit kommuninit pigineqartoq aammalu INI-mit aqunneqartoq. Tassa imaappoq INI-p inissiamut tunngasut nalinginnaasut amerlasuut isumagisarpai, assersuutigalugu attartortup allamut attartortitsineranik isumaginninneq.

Nammineq inissiarisamiit sivisunerusumik peqanngittussaanermut patsisit pitsaasut amerlasuujusinnaapput. Assersuutigalugu patsisaasinnaavoq ilinniarneq napparsimanerluunniit. Inissiamut atunngisannut aningaasartuutit amerlisinnaammata, peqannginnivit nalaani attartortuullutit allamut attartortissinnaavat. Tamatuma kingunerisaanik peqannginninni allat inigisannut nutsissapput.

Illit nammineerlutit inuk imaluunniit inuit najugaqartussat nassaarissavatit.

Piumasaqaatit 

Sivikinnerpaamik qaammatinut pingasunut sivisunerpaamillu ukiumut ataatsimut atuuttumik attartortutut allamut attartortitsisinnaavutit. Ukiumik ataatsimit sivisunerusumik allamut attartortitsinissamut periarfissaqarputit peqannginnerit makkuninnga patsiseqarpat:
• Ilinniarneq
• Napparsimaneq
• Utaqqiisaasumik nuutsitaagallarneq
• Pineqaatissinneqarsimasunut inissiisarfimmiinneq

Allamut attartortitsinissaq sioqqullugu INI-mit akuersissummik peqqaassaatit.

Suliffimmut atatillugu inissiami najugaqaruit, inissiap allamut attartortissinnaaneranut sulisitsisunnit akuersissummik pissarsisussaavutit.

Ineqarnermut akiliut aamma qularnaveeqqut 

Illit inissiarisat allamut attartortikkukku, inissiamut suli illit akisussaasuussaatit. Tamatuma kingunerisaanik assersuutigalugu akisussaaffigaat:
• Ineqarnermut akiliut kiisalu kiassarnermut imermullu akiligassat piffissaq eqqorlugu akilerneqartarnissaat
• Inissiami ajoqusertoqarpat, attartortumit piliarineqartut iluarsineqarnissaat

Attartortumit akiliutigisannit anginerusumik akileeqquseqqusaanngilatit. Inissiarli pisatsersoriigaq attartortikkukku, pisattanik atugassaqartitsinermut akiliutitut ineqarnermut akiliut qaavatigut 10 %-imik ilasinnaavat.

Aammattaaq attartortup inissiami ajoqusigaanut aningaasartuutaaratarsinnaasut matussutissaanik qularnaveeqqummik akileeqqusinissamut pisinnaatitaaffeqarputit. Qularnaveeqqut siumullu ineqarnermut akiliut katillugit ineqarnermut akiliut qaammatini arfinilinni annertussusilittut anginerpaamik angitigeqqusaavoq.

Qinnuteqarneq 

Illit inissiarisat attartortutut allamut attartortikkumagukku, immersugassaq Allamut attartortitsisinnaanermut qinnuteqarneq immersussavat.

Allamut attartortitsisinnaanermut qinnuteqarneq

Immersugassami allassavatit:
• Illit inissiarisaq kimut attartortinniarnerlugu
• Inissiami qanoq amerlatigisut najugaqassanersut
• Attartorneq qanoq sivisutigissanersoq
• Attartukkami najugaqarneq qanoq akeqassanersoq
• Qularnaveeqqusiissut akilerneqassanersoq
• Illit najugaqarfissat, illit inissiannik attartortitsinivit nalaani

Immersugaq najukkanni INI-p allaffeqarfianut tunniutissavat imaluunniit nassiutissavat.

Illit inissiarisavit attartortutut allamut attartortissinnaanera akuerineqarpat, allamut attartortitsinermi isumaqatigiissut illit attartortorlu atsiussavarsi.
INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl