INI-p inissiaataanut attartortitakkanut ineqarnermut akiliut – Anisitaaneq aamma inissinneqarallarneq

INI-p inissiaataanut attartortitakkanut ineqarnermut akiliut – Anisitaaneq aamma inissinneqarallarneq 

INI-p inissiaataa attartortittagaq tassaavoq pisortat inissiaataat attartortittagaq, Namminersorlutik Oqartussanit imaluunniit kommuninit pigineqartoq aammalu INI-mit aqunneqartoq. Tassa imaappoq INI-p inissiamut tunngasut nalinginnaasut amerlasuut isumagisarpai, assersuutigalugu Namminersorlutik Oqartussat kommunillu sinnerlugit ineqarnermut akiliutissamik akileeqqusineq.

Ineqarnermut akiligassarisamik akiliinngikkaanni, INI nukingisaarummik siullermik nassitsisarpoq. Sulilu ineqarnermut akiliut akilersimanngikkaanni, nukingisaarut tulleq siulliup tiguneqarnerata kingorna sapaatit akunneri pingasut missaat qaangiuttoq nukingisaarut tulleq nassiunneqartarpoq. Nukingisaarut tulleq aamma ”Attartornerup atorunnaarsinneqarnera”-tut atuuttarpoq, taamaattoq ineqarnermut akiliutigisassaq akileraanni, suli inissiarisami najugaqaannartoqarsinnaavoq.

Sapaatip akunnerata ataatsip qaangiunnerani ineqarnermut akiliut suli akilersimanngikkaanni, INI-p politiinut allakkat nassiuttarpai. Politiinut allakkami nalunaarutigineqartarpoq, attartorneq atorunnaarsinneqartoq akiliuteqannginnerlu politiinut suliassanngortinneqartoq. Matuma kingorna politiit suliassarilersarpaat inissiamit attartortup anisinnissaa.


Inissinneqarallarneq
Politiit piumasarisarpaat najugaqartut anisitaasut illumik iserfissaqarnissaat. Taamaattumik INI inissinneqarallarfiusussatut inissiassanik atugassaqartitsisarpoq. Inissinneqarallarfiusutut najugassaq minnerpaamik iniusarpoq ataaseq immikkoortoq ilaqutariinnut ataatsinut naatsorsuussaq, imermik kuuinnartumik peqartoq. Inissiigallarfittut najugassat tassaagajupput inissiat ajorluinnartut, ilaallu ima ajortigisarput attartortinneqarsinnaasaratik.


Ineqarnermut akiliutissamut ikiorneqarneq
Ineqarnermut akiliut nammineerluni akissaqartinneqanngippat, kommunit ikiuinissamut pisussaaffeqarput. Najugaqartulli ilaannut ajortumik ingerlasoqartarpoq. Aningaasat ineqarnermut akiliuteqarnermut atornagit allamut atuisarput, taamaalillutillu inissiaminnit anisitaasarlutik.


Akiitsut amerlavallaalernissaat sioqqullugu
Inuit ilaqutariillu inissiarisaannit anisinnerat tusarlugu sakkortuginarsinnaavoq. Taamaattoq tamanna aamma killormut saallugu isigineqarsinnaavoq, tassa attartortup akiitsoqalernissaa taama iliornikkut pinngitsoorniarneqartutut.

Anisitsinerit aalajangersimalluartumik ingerlanneqarpata, attartortoq qaammatini marlunni ineqarnermut akiliutissamik nukingisaarummik ilaqartumik aammalu anisitsinermi aningaasartuutinik ilaqartunik akiitsoqartillugu anisinneqartussaavoq. Akiitsut amerlassusiat kingusinnerusukkut akilerneqarsinnaanera piviusorsiortuussaaq. Kisianni anisitsineq pinngippat attartortoq suli ineqarnermut akiliutissamik akiliinngikkaluarluni najugaqaannarsinnaappat, taava qaammammiit qaammammut akiitsut annertusigaluttuinnassapput utertillugillu akilernissaat ajornarsigaluttuinnassalluni.


Eqqaamiuusut akiliussisarput
Ineqartut peqatigiiffiat nammaqatigiinnissamut pituttortarpoq. Attartortup ataatsip ineqarnermut akiliutissani akilinngikkaangagu, attartortut allat annaasat matussusertussaavaat. Tassa Namminersorlutik Oqartussat, kommunit INI-luunniit akiliineq ajorput. Paarlattuanik attartortut allat tamarmik ineqartutut immikkoortortaqarfimmi aningaasartuutimi saniatigut aamma akiliuteqassapput
  • Anisitaasup akilersimanngisaata ilaanik
  • Anisitaanermut aningaasartuutinut
  • Aamma inisseqqinneqarallarnermut aningaasartuutinut

Piffissaq eqqorlugu kikkut tamarmik ineqarnermut akiliutissaminnik akiliisaraluarpata, kikkut tamarmik ineqarnermut akiliutigisartagaat, allatut oqaatigalugu minnerussagaluarput. Tamannalu naatsorsoqqissaarneqarsimavoq, tassa attartortut tamakkerlutik piffissaq eqqorlugu ineqarnermut akiliut akilertaraluarpassuk, agguaqatigiisitsilluni ineqarnermut akiliut ukiumoortumik kvadratmeter-imut 7,40 kr.-imik appartinneqarsinnaagaluarpoq. Tamatuma angeqqatigaa qaammammut 50 kr.-ni, inissiaq 80 kvadratmeter-iusoq pineqarpat.

Allaaserisat attuumassutillit

INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl