Sanaqateqarluni illuliorneq – Taarsigassarsiniarluni qinnuteqarneq

Sanaqateqarluni illuliorneq – Taarsigassarsiniarluni qinnuteqarneq 

Sanaqateqarluni illuliat pillugit aaqqissuussineq aqqutigalugu nammineq illussannik sananissamut taarsigassarsianik erniaqanngitsunik taarsersugassaanngitsunillu qinnuteqarsinnaavutit. Qanoq annertutigisunik taarsigassarsissanersutit inoqutigiiususi ukiuni kingullerni tallimani agguaqatigiisillugu qanoq ukiumut isertitarisimasasi aallaaviussapput. Inoqutigiit isertissimasaat amerliartuaartillugit, taarsersugassanik atorsinnaanerit annikilliartuaassaaq.

Annertunerpaamik 302.000 kr.-nik erniaqanngitsunik akiligassartaqanngitsunillu sanaqateqarnermut ikiorneqarnissannut tapiissutisiarisinnaavatit. Sanaqateqarluni illuliornissamut atortussat qanoq annertutigisumik akileeqataaffigissaneritit ukiut kingulliit tallimat agguaqatigiisillugu isertitassi aalajangissavaat. Isertitat qummut 450.000 kr. killingaat. Taassuma saniatigut aningaasartuutit illit tamaasa akilissavatit.


Piumasaqaatit
Sanaqateqarluni illuliat pillugit aaqqissuussineq aqqutigalugu illumik sananissamik qinnuteqarsinnaajumagaanni:

  • Sanasumik ilinniarsimasumik illup sananissaanut ikiortissannik isumaqatigiissuteqassaatit
  • Ukiuni kingullerni tallimani nammineq inuussutissarsiorsimassaatit, nammineerlutillu sananermi peqataasinnaallutit
  • Kalaallit Nunaanni inuit allattorsimaffianni aalajangersimasumik najugaqartutut nalunaarsorsimassaatit
  • Kommunimut nunaminertamik atugassannik qinnuteqassaatit imaluunniit nunaminertamik inniminniisimassallutit
  • Taarsigassarsinermi akuersissutip atsiorneraniit kingusinnerpaamik ukiut marluk qaangiunnerini illup sananera naammassisimassaaq


Qinnuteqarneq
Sanaqateqarluni illuliornissamut taarsigassarsisinneqarnissat qinnuteqaatiginiarukku, najukkanni INI-p allaffeqarfia saaffigissavat. Tassani annertunerusumik paasisaqarsinnaavutit qinnuteqaatillu suliarinerani ikiortillutit. Qinnuteqaatip suliariniarnerani INI-mut saaffiginnikkuit makku nassassavatit:

  • Isertitat pillugit paasissutissat
  • Sanasumit imaluunniit sanaartornermik suliffiutilimmit illup sananeranik ikiuuttussamit neqeroorut. Neqeroorutit ilinnit akuerineqarsimassapput

Paasissutissat qinnuteqaammut ilanngunneqassapput.

Qinnuteqarfissamut killiliunneqarsimavoq december-ip aallaqqaataa. Taamaattoq malugeqquneqarpoq ukiuni kingullerni marlunni sanaqateqarluni illuliornissamut aningaasanik immikkoortitsisoqarsimanngimmat.


Akuersissut
Qinnuteqaatit akuerineqassappat INI-mit nalunaarutisissaatit. Matuma kingorna taarsigassarsinermi uppernarsaatit aamma illumik piginnittuunermik uppernarsaat INI-mit suliarineqassapput, taakkulu atsiussavatit.

Illit sanasullu ikiortissavit akunnissinni sanaqatigiinnissamut isumaqatigiissutissarsi INI-mit suliarineqassaaq, taannalu marluullusi atsiussavarsi INI-mullu utertillugu. Tamatuma saniatigut illup sananeqarnerata nalaani INI ilitsersuilluni ikiuussinnaavoq.

Qinnuteqaatit akuerineqanngippat sooq itigartinneqarsimanerlutit allakkatigut nalunaarutisissaatit.

Allaaserisat attuumassutillit

A/S INI
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl