Attartortumiit piginnittumut – Nalinginnaasumik paasissutissiineq

Attartortumiit piginnittumut – Nalinginnaasumik paasissutissiineq 

Illuummi Namminersorlutik Oqartussanit imaluunniit kommunimit pigineqartumi attartortutut najugaqaruit, attartortumiit piginnittumut aaqqissuussineq malillugu inissiap attartukkavit pisiarinissaanut qinnuteqarsinnaavutit:

  • Illuummi attartortittakkami inissiaateqarfimmi attartortittagaq ataasiuppat, inissiaq attartukkat illutut nammineq pigisatut tigussavat
  • Inissiaq attartukkat illumi ataaseq sinnerlugu attartortulimmi inissisimappat, inissiaq nammineerlutit pigisatut tigusinnaavat


Illuummi inissiamik attartortittakkamik, Namminersorlutik Oqartussat imaluunniit kommunip illutut inissiatulluunniit nammineerluni tigusassatut aalajangersimasaannik taamaallaat pisisinnaavutit. Taamaattumik inissiaq attartukkat pisiariniarlugu inissiamik piginnittumut qinnuteqassaatit. Inissiat inissiatut nammineerluni pigisassatut allanngortinneqarsinnaanngitsut ilaatigut tassaapput:

  • Sulinermut atatillugu inissiat
  • Inissiat atorfissaannut aalajangikkat
  • Inissiat inissiigallartarfiit
  • Inissiat, immikkut ittumik innarluutilinnut iluarsaanneqarsimasut


Tunisinermi akiusoq
Inissiamut attartortumiit piginnittumut aaqqissuussineq malillugu pisiarineqartumut akiusoq, niuernermi nalinga malillugu aalajangerneqartarpoq. Niuernermi naliusoq tassaavoq aki, illuutip niuerfimmi qilersorsimanngitsumi tunineqarnermini pissarsiarineqartussaq. Tassalu sumiiffimmi neqeroorutit, piumanninneq, inissisimaffik niuernermilu pissutsit naliliinermut ilaatinneqartarput.

Pisinermi akiusoq uku tunngavigalugit naatsorsorneqartarpoq

  • niuernermi nalinga
  • 50.000 koruuninik ilallugu, inissiamik tigusinermut atatillugu aningaasartuutissanut matusissutissanik


Akikillisaatit
Illuummi attartortittakkami pingasunik amerlanerusunilluunniit attartortulimmi najugaqaruit tunisinermi akiusumut procent-ilikkamik akikillisaanneqarsinnaavutit. Akikillisaammut qanoq sivisutigisumik attartortuusimanersutit apeqqutaassaaq. Tunisinermi akiusumut procent-ilikkamik akikillisaatip annertussusia apeqqutaatinnagu, aningaasat uku qaangerneqaqqusaanngillat:

  • Inissiaq ataatsimik marlunnillu initalik: 225.000 koruunit
  • Inissiaq pingasunik initalik: 335.000 koruunit
  • Inissiaq sisamanik initalik: 445.000 koruunit
  • Inissiaq tallimanik initalik: 555.000 koruunit
  • Inissiaq arfinilinnik amerlanerusunilluunniit initalik: 665.000 koruunit


Aningaasat nalingisa nikingassutaannut qularnaveeqqusiissut
Namminersorlutik Oqartussat imaluunniit kommune inissiami aningaasat nalingisa nikingassutaannut qularnaveeqqusiissummik nalunaarsuititsissaaq, akiusumut akikillisaatit aningaasartaasa nalinginik. 50.000 koruunit inorlugit annertussuseqartut aningaasat nalingisa nikingassutaannut qularnaveeqqusiissummik nalunaarsuiffiusanngillat. Piffissap nalikillisitsiartuaarfiusussap naanerani aningaasat nalingisa nikingassutaannut qularnaveeqqusiissutip nalunaarsornera peerneqassaaq.

Assersuutigalugu pisisoq 335.000 koruuninik akikillisaaffigineqarpat, aningaasat nalingisa nikingassutaannut qularnaveeqqusiissut 335.000 koruuninik naleqassaaq. Tamatuma kingorna aningaasat nalingisa nikingassutaannut qularnaveeqqusiissut ukiuni tulliuttuni qulini ukiumut 1/10 koruuninik – tassalu 33.500 koruuninik appartinneqartassaaq, tamatumalu kingorna qularnaveeqqusiissut inaarutaasumik atorunnaarsinneqassaaq.

Assersuutigalugu inissiaq ukiuni arfinilinni najugaqarfigineqareersoq tunineqarpat, tunisisup 4 x 33.500 koruunit (134.000 koruunit) inissiamik piginnittuusimasumut, tassalu Namminersorlutik Oqartussanut imaluunniit kommunimut utertillugit akilissavai.


Aningaasalersuineq
Inissiamik attartortittakkamik pisinermi, attartortup nammineerluni pisinermut akiusup 60%-ii aningaasalersussavai, pisinermilu akiusup sinneri 40%-iusut Namminersorlutik Oqartussat kommunilluunniit ukiuni 20-ni erniaqanngitsunik akilersugassaanngitsunillu taarsigassarsititsinerisigut aningaasalersorneqarsinnaapput.

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfik
Imaneq 1A - 601
Postboks 909
3900 Nuuk

Oqarasuaat: (+299) 34 50 00
E-mail: box909@nanoq.gl
Nittartagaq: www.naalakkersuisut.gl