Averuserneq

Nalinginnaasumik paasissutissiineq 

Illit, aappallu katissimasavit marluullusiluunniit inooqatigiikkunnaarnissaq siunniussimagussiuk, averusernissamut pisinnaatitaaffeqarpusi. Avinnissamik qinnuteqaateqannginnissinni sivikinnerpaamik qaammatini arfinilinni averuseqqareersimanissarsi nalinginnaasumik piumasaqaataavoq.

Katissimanerup/nalunaarsukkamik inooqatigiinnerup nalaani inatsisitigut sunniutit averusernissinni atorunnaarsinneqartarput. Matumani pineqarput suulluunniit nalillit ataatsimut pigisat, kingornussisussaatitaaneq imminnullu ilumoorfigeqatigiittussaatitaaneq. Taamaakkaluartoq katissimanersi/nalunaarsukkamik aappariinnersi atuutiinnarallassaaq.

Averuseqqanerup nalaani inooqatigeeqqilerussi averusersimaneq atorunnaartarpoq katissimanerullu/nalunaarsukkamillu aappariinnerup nalaanisulli inatsisitigut sunniutit tamarmik atuutilerseqqinneqartarput.

Suliaq averusernermut tunngasoq eqqartuussivimmi aamma Naalagaaffiup Sinniisoqarfiani ataatsikkut ingerlanneqarsinnaanngilaq.

Qinnuteqarneq 

Averuserneq Naalagaaffiup Sinniisuanit imaluunniit eqqartuussivimmi aalajangiinikkut akuersissutigineqarsinnaavoq.

Kalaallit Nunaanni Naalagaaffiup Sinniisua aqqutigalugu averusersinnaavusi:
  • Marluullusi averusernissaq kissaatigigussiuk
  • Averusernermi atugassarititaasut isumaqataaffigigussigit

Eqqartuussivimmut saaffiginnissaasi:
  • Aappaasoq kisimi averuserniarpat
  • Atugassarititaasunut tunngasut aaqqiagiinngissutigigussigit

Naalagaaffiup Sinniisua aqqutigalugu averusernissaq qinnutigerusukkussiuk immersugassaq atorlugu qinnuteqaateqassaasi.

Immersugassaq Naalagaaffiup Sinniisuata nittartagaatigut aasinnaavat.

Aamma immersuiffissaq Kalaallit Nunaanni Naalagaaffiup Sinniisoqarfianut nammineerlutit aasinnaavat, Nuummiinngikkuillu najukkami politeeqarfimmut aasinnaallugu.

Uppernarsaatit atorfissaqartinneqartut tamarmik qinnuteqaammut ilanngutissavasi. Uppernarsaatit suut ilanngutissanerisi immersugassami allanneqarsimapput. Uppernarsaatit pisariallit tamarmik ilanngussimagussigit aatsaat suliaq ilissinnut tunngasoq Naalagaaffiup Sinniisoqarfiata suliarilersinnaavaa.

Nuummi najugaqarussi qinnuteqaat uppernarsaatinik atorfissaqartinneqartunik tamanik ilalik Naalagaaffiup Sinniisuanut nassiunneqassaaq. Nuummi najugaqanngikkussi taakkua najukkami politeeqarfimmut tunniutissavasi.

Atugassarititaasut pillugit oqaloqatigiinneq 

Qinnuteqaatitut immersugassaq politeeqarfimmut imaluunniit Naalagaaffiup Sinniisoqarfianut tunniutereerussiuk atugassarititaasut pillugit oqaloqatigiinnissamut aggersarneqassaasi. Atugassarititaasut pillugit oqaloqatigiinnermi tassani makku oqaloqatigiissutigineqassapput aamma isumaqatigiittoqarsinnaassaaq:
  • Angajoqqaatut oqartussaaneq
  • Meeqqanut akiliut
  • Aapparisamut akiliut
  • Inissiamik attartukkamik ataatsimoorussisinnaatitaaneq

Atugassarititaasut pillugit oqaloqatigeereernermi suliaq Naalagaaffiup Sinniisoqarfiata suliarilissavaa tamatumalu kingorna averusernissamut akuerineqarsinnaavusi itigartinneqarsinnaallusiluunniit. Averusernissamik akuersissut Naalagaaffiup Sinniisuanit tigugussiuk averuserneq aatsaat atuutilissaaq.

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl

Naalagaaffiup Sinniisoqarfia
Indaleeqqap Aqq. 3
Postboks 1030
3900 Nuuk

Oqarasuaat: (+299) 32 10 01
E-mail: ro@gl.stm.dk
Nittartagaq: www.rigsombudsmanden.gl