Meeqqanut tapiissutit

Meeqqanut tapiissutit 

Nalinginnaasumik paasissutissiineq 

Meeqqanut tapiissutit pisortat aningaasatigut ikiorsiissutigaat, angajoqqaat meeqqaminnut pilersuinissaminnut atatillugu pissarsiarisinnaasaat.

Meeqqanut tapiissutit pissarsiarinissaannut qinnuteqassanngilatit. Aamma kommunimut allamut nuukkaluaruilluunniit. Angajoqqaat meeqqanut tapiissutinik pissarsisinnaanermut pisinnaatitaasut, meeqqanut tapiissutinik pissarsitinneqartassapput.

Kalaallit Nunaannut nuukkuit kommunimut nuuffigisannut nalunaariartussaatit. Aatsaat taamaasioreeruit meeqqanut tapiissutinik pissarsisalersinnaavutit.

Piumasaqaatit 

Meeqqanut tapiissutinik pissarsiniaraanni piumasaqaatit arlallit malinneqaqqaartussaapput.

Meeqqap angajoqqaavisa ukiumut isertittagaasa 280.000 koruunit sinnersimassanngilaat. Isertittakkanut piumasaqaatit eqqarsaatigalugit makku piumasaqaatigineqarput:
  • Angajoqqaajusut najugaqatigiippata, isertittagaat tamarmiusut tunngavigineqassapput
  • Meeraasoq angajoqqaami aappaannaani najugaqarpat, taassuma isertitai tunngavigineqassapput. Angajoqqaaq inooqateqarpat, inooqatigiinnerallu ukioq ataaseq sinnerlugu sivisussuseqarpat, inooqatigineqartup isertitai ilanngullugit tunngavigineqassapput
  • Meeraasoq angajoqqaamini sivisoqatigiimmik najugaqarpat, angajoqqaajusup inuit allattorsimaffianni meeqqap najugaqarfigalugu nalunaarfigisimasaata isertitatigut atugai tunngavigineqassapput

Isertitatigut piumasaqaataasup saniatigut piumasaqaatit arlallit malinneqarsimasussaapput:
  • Meeraq 18-it inorlugit ukioqassaaq
  • Meeraq Kalaallit Nunaanni najugaqassaaq inuillu allattorsimaffianni nalunaarsorsimassalluni
  • Meeraq danskisut innuttaassuseqassaaq
  • Inuusuttoq imminut pilersortussaanngilaq, naartussanngilaq imaluunniit nammineerluni meerartaarnikuusimassanngilaq
  • Inuusuttoq katissimasussaanngilaq
  • Meeraq inuusuttorluunniit pisortanit angerlarsimaffiup avataanut inissinneqarsimasussaanngilaq

Tapiissutit tunniunneqarneri 

Kommunimit nalunaarsuiffiit assigiinngitsut assersuutigalugu inuit allattorsimaffiat aqqutigalugu paasissutissat pigineqartut atorlugit meeqqanut tapiissutit naatsorsornerinik tunniunneqarnissaannillu isumaginnittuusumit isumagineqartarpoq.

Aningaasaqarnerilli allannguuteqarsimappat, assersuutigalugu utoqqalinersiuteqalersimaguit imaluunniit piffissami sivisunerusumi napparsimalissagaluaruit, kommunimut paasissutissiissallutit pisussaavutit.

Pissutsini amerlanerpaani kontot pillugit paasissutissat pigisatit kommunimit ilisimaneqarput, meeqqanullu tapiissutit illit aningaaserivimmi kontonnut ikineqarsinnaapput, assersuutigalugu aningaasarsinermi konto atortakkannut. Taamaattorli paatsoortoqaqqunagu, tamatigut kommunimut kontonnut paasissutissat nalunaarutigisassavatit. Aningaaserivimmi kontoqanngikkuit, meeqqanut tapiissutit checkinngorlugit imaluunniit allagartatut pisiniutissanngorlugit pissarsiarisinnaavatit.

Meeqqanut tapiissutit qaammatit tamaasa tunniunneqartarput.

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl