Ulluunerani paaqqinnittarfiit

Nalinginnaasumik paasissutissiineq 

Ulluunerani paaqqinnittarfik meeqqanut 0-6 ukiullit tikillugit ulluunerani perorsaanermut tunngasutigut neqeroorutaavoq, tassa sumiiffik meeqqavit perorsaasutut ilinniarsimasunik sulisoqartumik ulluinnarni paaritiffigisinnaasaa. Tassa ima paasillugu sulisut meeqqap ineriartornera pisariaqartitaalu aallaavigalugit meeqqat peqatigalugit sammisassat pilersaarusiorlugillu ingerlattassagaat.

Tamatumani siunertaavoq illit meeqqat, meeqqanik allanik ilaqarluni pitsaasumik imaqarluartumillu ulloqartassasoq. Ima ilaatigut isumaqarpoq, ulluunerani paaqqinnittarfiit perorsaanermut tunngasutigut anguniagaqarlutik sulisut ilaat perorsaanikkut ilinniarsimasuussallutik aammalu illut atorneqartut ulorianartuunnginnissaat qulakkeerniarlugit oqartussaasunit ulluunerani paaqqinnittarfiit nakkutigineqartassasut.

Illit angajoqqaatut aalajangigassaraat meeqqat ulluunerani paaqqinnittarfimmi paarineqartassanersoq.

Meeqqap ulluunerani paaqqinnittarfimmi paarineqarnera akeqarpoq. Akiliutip qaffasissusia isertitatit tunngavigalugit naatsorsorneqartarpoq.

Ulluunerani paaqqinnittarfiit suuneri 

Ulluunerani meeqqanut neqeroorutit assigiinngitsuupput. Tassani meeqqat qassinik ukioqarnerisigut sumilu najugaqarnersi apeqqutaapput.

Neqeroorutit assigiinngitsut tassaasinnaapput:
  • Meeraaqqerivik 0-2 ukiulinnut
  • Meeraaqqanut 0-2 ukiulinnut angerlarsimaffimmi paarsineq
  • Meeqqerivik – 3-6 ukiulinnut namminersortut pisortallu ingerlatarisaat
  • 0-6 ukiulinnut init pinnguartarfillit
  • Meeqqanut 0-6 ukiulinnut nunaqarfimmi paaqqinnittarfiit
  • Sammisaqartitsiviit allat, soorlu meeqqanut inersimasunullu ullup ilaanut neqeroorutit

Perorsaaneq 

Perorsaaneq tassaavoq perorsaanermut, ilinniartitaanermut atuartitaanermullu isummersorneq. Tassa imaappoq paaqqinnittarfinni perorsaasut meeqqanut perorsaanissamut anguniagassaasa sakkussat periutsillu tunngavigalugit piviusunngortinnissaat.

Perorsaaneq illit meeqqavit timikkut, tarnikkut inooqataanerminilu inerikkiartornissaa pillugu atuuppoq.

Ulluunerani paaqqinnittarfinni ataasiakkaani perorsaasut perorsaariaaseq aalajangissavaat.

Assersuutit
Isummersorneq anguniagarluunniit: Meeqqat avatangiisiminnut ataqqinninneq ilinniassavaat.

Sakkussat periutsilluunniit: Imaassinnaavoq meeqqat eqqagassanik eqqaavimmut igitsisarneq ilinniassagaat, maangaannaq igitsinissaq pinnagu.

Isummersorneq anguniagarluunniit: Meeqqat inoqatiminnut ataqqinninneq ilinniassavaat.

Sakkussat periutsilluunniit: Imaassinnaavoq meeqqat akunnerminni iluamik oqaloqatigiissinnaaneq ilinniassagaat, annersaanneq pinnagu.

Sulisut 

Piffissaq meeqqat paaqqinniffimmiiffigisartagaat meeqqanik paarsinerinnaassanngilaq. Ulluunerani paaqqinnittarfinni sulisut pisussaapput meeqqat ataasiakkaat perorsaanermik anguniagalimmik sullisissallugit. Tassa meeqqat ulluunerani paaqqinnittarfimmi paarineqarnermi nalaani ilinniarlutillu ineriartussapput.

Tamanna qulakkeerniarlugu ulluunerani paaqqinnittarfimmi sulisut ilaat perorsaasutut ilinniarsimasuussapput. Ulluunerani paaqqinnittarfimmi sulisut qanoq ilinniagaqarsimanerannut assersuut:
  • Pisortaq perorsaasutut ilinniarsimasoq
  • Ulluinnarni sulisut tassaasinnaasut perorsaasut, inulerinermi peqqissaanermilu ikiortit kiisalu ikiortit ilinniarsimanngitsut
  • Igaffimmi sulisut eqqiaasullu

Kommunip ulluunerani paaqqinnittarfiutaani atorfinissinnaagaanni, akuerineqarsinnaasumik pineqaatissinneqarsimannginnermut uppernarsaammik peqartoqartariaqarpoq. Atorfinitsitsiniarnerup nalaani qinnuteqartup pisortanit pineqaatissinneqarsimannginnermut uppernarsaataa meeqqanik atornerluisimannginnermut uppernarsaat kommunip pissarsiariniartarpaa nalilersorlugulu. Pineqaatissinneqarsimannginnermut uppernarsaatit sulisoqarnermut allaffimmi ukioq ataaseq paarineqartarput.

Pineqaatissinneqarsimannginnermut uppernarsaat akuerineqarsinnaanngippat kommunip ulluunerani paaqqinnittarfiutaanni atorfinittoqarsinnaanngilaq. Tamatumalu qulakkeerniartussaavaa illit angajoqqaatut eqqissillutit meeqqat ulluunerani paaqqinnittarfiliaattarnissaa.

Nipangiussimasussaatitaaneq
Kikkulluunniit inuussutissarsiutigalugu inunnik sullitaqartut nipangiussimasussaatitaaffeqarput. Tassa meeqqat paaqqinnittarfiani sulisut ilinnut meeqqannulluunniit tunngasunik meeqqerivimmi sulisuunngitsunut eqqartueqqusaanngillat.

Pinngitsoorani nalunaaruteqartussaatitaaneq 

Innuttaasut tamarmik nalunaaruteqartussaatitaapput. Nalunaaruteqartussaatitaaneq imatut paasineqassaaq, illit innuttaaqataasutut meeqqamik atugarliortutut pasitsaassaqaruit Inunnik Isumaginnittoqarfimmut nalunaaruteqartussaagavit. Meeraq atugarissaanngikkuni imaassinnaavoq annersagaasimasoq, sumiginnagaasimasoq imaluunniit kinguaassiuutitigut atornerlugaasimanissaanik pasitsaanneqarsimasoq.

Nalunaaruteqartussaatitaaneq pilersinneqarsimavoq meeqqat ilaqutariillu namminneq aaqqissinnaanngisaminnik ajornartorsiuteqartut ikiorniarlugit.

Inuussutissarsiutigalugu meeqqanik inuusuttunillu sullissisut pinngitsooratik nalunaaruteqartussaatitaapput. Tassa assersuutigalugu ulluunerani paaqqinnittarfinni sulisut meeqqat atugarissaanngitsut immikkut maluginiartussaavaat, taamaattoqarpallu Inunnik Isumaginnittunut nalunaarutigissallugit.

Illut atorneqarnissaannut piumasaqaatit 

Illunut ulluunerani paaqqinnittarfittut atorneqartussanut piumasaqaatit arlaqarput. Tamatumunnga patsisaavoq illut najorlugit ulorianannginnissaat. Oqartussaqarfiit ulluunerani paaqqinnittarfiit illutaannut nakkutilliisut sisamaapput:
  • Qatserutaasiveqarfik, ilaatigut ikuallattoqalernerani qimaaffissianik qatserutinillu misissuisussaq
  • Uumasut Nakorsaqarfia Inuussutissalernermullu Oqartussaqarfik, ilaatigut anartarfeqarfinnik igaffeqarfinnillu misissuisussaq
  • Sullivimmi Nakkutilliisoqarfik sulisut atugarisaannik, soorlu meeqqanik kivitsinerlullutik qiterlulinnginnissaannik misissuisussaq
  • Kommunalbestyrelse – ulluinnarni suliassamik ingerlatsivimmut tunniussisoq, illuutinut tunngatillugu inatsisinik maleruaasoqarneranik nakkutilliissaaq, tassaniissaaq ilanngunneqarluni illuutip angissusaanut naapertuuttumik inuit amerlassuseqarnersut. Assersuutigalugu meeraaqqerivimmi inimi ataatsimi meeraaqqat amerlanerpaamik 12-iusinnaapput, meeqqerivimmilu amerlanerpaamik 20-usinnaallutik

Oqartussaqarfiit assigiinngitsut illuutit akuerereeraangagit akuersissummik ataatsimoorussamik tunniussisoqartarpoq. Akuersissut pineqartoq meeqqavit paaqqinnittarfiani takusinnaassavat.

Naammagittaalliuuteqarneq 

Meeqqavit ulluunerani paaqqinnittarfia naammaginngikkukku naammagittaalliuuteqarnissannut pisinnaatitaaffeqarputit. Soorlu makkua naammagittaalliuutigisinnaavatit:
  • Meeqqavit utaqqisut allattorsimaffianni inissisimanera
  • Angerlarsimaffimmi paarsisussamik atorfinitsitsineq

Najukkanni kommunalbestyrelsimut naammagittaalliuuteqarsinnaavutit. Naammagittaalliuutit allagaassaaq, eqqaamajullu pappialat naammagittaalliuutinnut tunngassuteqartut ilanngutissagakkit.

Naammagittaalliuutivit kommunalbestyrelsimit aalajangiiffigineqarnera naammaginngikkukku Isumaginninnermi Naammagittaalliuuteqartarfimmut ingerlateqqissinnaavat.

Isumaginninnermi Naammagittaalliuuteqartarfimmut naammagittaalliuuteqarit

Kommunalbestyrelsip naammagittaalliuutinut allanut tunngasunut aalajangiineri naammaginngisatit oqartussaasunut allanut ingerlateqqissinnaanngilatit.

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl