Angerlarsimaffimmi ikiorteqarneq – Nalinginnaasumik paasissutissiineq

Angerlarsimaffimmi ikiorteqarneq – Nalinginnaasumik paasissutissiineq 

Angerlarsimaffimmi ikiorteqarneq tassaavoq pisariaqartitatit malillugit inuttut angerlarsimaffimmi ikiorneqarneq paaqqutarineqarnerlu. Assersuutigalugu uffarnermut aamma eqqiarnermut ikiuunnerusinnaallunilu nalinginnaasumik eqqiaanermut, pisiniarnermut aamma atisanik errorsinermut ikiuunnerusinnaavoq. Ikiorteqarnerup annertussusiata aallaavigisarpaa, illit nammineq sulinikkut ulluinnarisanni atugarissaarnerunissannut aamma peqataanersutit, ikiorti kisiat isumalluutiginagu. Taamaalilluni ikiorsiineq suleqatigiinneruvoq, uninngaannarluni ikiorsiinerunani.

Angerlarsimaffimmi ikiorteqarnermi siunertaasoq tassaavoq:

  • Pissutsillu naleqquttut pigalugit sivisunerpaamik illit nammineq angerlarsimaffimmiissinnaassasutit
  • Nammineq killiliussat iluanni toqqissisimanissat qulakkeerneqassasoq
  • Najukkanni avatangiiserissinnaassasutit aammalu attaveqarfitit kiisalu ilaquttatit ikinngutitillu qanittumik attaveqarfigisatit pigiinnassagitit


Piumasaqaatit
Illit inuunivit ingerlanerani ulluinnarni piginnaasaqassutsit apparsimappat nukissatillu killeqarlutik, taava suliassanut pisariaqartunut angerlarsimaffimmi ikiortimik tapersersortimik pissarsisinnaavutit. Tassa angerlarsimaffimmi ikiortimik pissarsisinnaavutit illit

  • utoqqaaguit
  • inuusuttuuguit
  • innarluuteqaruit
  • imaluunniit siusinaartumik soraarnerussutisiaqaruit


Inuit utoqqaat angerlarsimaffimmi ikiorteqartut amerlanerpaartaraat, taamaattoq illit qassinik ukioqarnerit pinnagu pisariaqartitatit ikiorserneqarnissavit annertussusianut aallaaviussapput.


Akigititat
Inoqutigiittut isertitatit aallaavigalugit angerlarsimaffimmi ikiortimut akiliuteqartoqartassaaq. Taamaalilluni ilissi inoqutigiittut katillugit isertitasi angerlarsimaffimmi ikiorteqarnermut akiliuteqartussaatitaanermut tunngavigineqartussaapput. Tassunga atatillugu inoqutigiit tassaapput, illit katissimasallu, inooqatigisatut imaluunniit aapparisatut najugaqatigisat.

2012-imut akigititat tassaapput:

  • Inoqutigiit isertitaat 0 – 130.000 kr. Nammineq akiliuteqarneq = akunnermut 0 kr.
  • Inoqutigiit isertitaat 130.000 – 180.000 kr. Nammineq akiliuteqarneq = akunnermut 27,57 kr.
  • Inoqutigiit isertitaat 180.000 – 280.000 kr. Nammineq akiliuteqarneq = akunnermut 55,14 kr.
  • Inoqutigiit isertitaat over 280.000 kr. Nammineq akiliuteqarneq = akunnermut 82,71 kr.


Isumaginninnermut tunngatillugu iliuusissatut pilersaarummut atasumik angerlarsimaffimmi ikiortimik pissarsisimaguit, inoqutigiittut isertitatit qanorluunniit annertussuseqaraluarpata angerlarsimaffimmi ikiortimut akiliuteqartassanngilatit.


Malugiuk
Pisut ilaanni aamma kommunimit ikiorserneqarsinnaavutit, assersuutigalugu

  • apummik nivannermut
  • imertarnermut, illumi imermik ikkussivigineqarsimanngitsumi najugaqaruit
  • atortunik ikiorsiissutinik pissarsiniarnermut


Angerlarsimaffimmi ikiorsiisarnermi aamma nerisassanik pilersuineq neqeroorutaasarpoq, taamaalillutit kommunip utoqqarnut angerlarsimaffiutaanit nerisassanik kissartunik illit angerlarsimaffinnut pajuttoqarsinnaalluni.

Allaaserisat attuumassutillit