Tammajuitsussarsianut allagartaq – Nalinginnaasumik paasissutissiineq

Tammajuitsussarsianut allagartaq – Nalinginnaasumik paasissutissiineq 

Tammajuitsussarsianut allagartaq tassaavoq peqqissuunermut allagartaq uumasut nakorsaannit suliarineqarsimasoq – Ilulissani uumasut nakorsaqarfianit isumagineqartoq. Tassanilu allassimavoq tammajuitsussarsiaq nunamut eqqussiffiusumut peqqinnissakkut aarlerinartoqanngitsoq.

Tammajuitsussarsiat allagartamik sanaanneqartussat tassaapput nersutit angisuut (piniagaasinnaasut) aammalu tammajuitsussarsiat pinngortitami katersarineqarsimasut. Tamakku tamarmik tammajuitsussarsianut allagartalerneqassapput Kalaallit Nunaanniit nunanut allanut anninneqassappata.

Tammajuitsussarsiat EU-p iluani angallanneqarsinnaapput nammineq angalatilluni nassatanut ilaatillugit, immikkulli poortugaatillugit.


EU-mut Danmark-imullu annissineq
Ataani allattorsimapput suut uumasunit pisunit (aamma taaneqartartunit pissarsiat perlukunit sanaat) tammajuitsussarsianut allagartaqartussaanersut:
  • Ammit miluumasuneersut, uani pineqarlutik umimmaat tuttullu
  • Saanikut, saarngit, kukiffaat kukiillu
  • Nassut tuugaallu
  • Meqqut qiviullu timmissaneersut – timmissat ilanngullugit

Tammajuitsussarsiat qerisutut tarajortikkatulluunniit nassiunneqassapput (tassani pineqarput timmissat, meqqut, qiviut, ammit niaqqullu). Taakku poortorluagaassapput soorlu plastik-inik imaluunniit karsinut pap-iusunut. Plastik-inik atuiguit, taanna akimut ersittuussaaq.


Tammajuitsussarsianik Danmark-imut nassiunnerinut eqqaamasassat
Tammajuitsussarsianik annissiniaruit, piumasaqaatit makku malinneqassapput:
  • Tammajuitsussarsianut allagartamik immersortitsissaatit Uumasut nakorsaqarfia Inuussutissalerinermullu Oqartussaqarfiup suliarisassaanik
  • Tammajuitsussarsianut allagartap original-ia tammajuitsussarsiaq nassiussiviusumut ingerlaqataaginnavissaaq
  • Nammineerlutit angalaninnut ilaatillugu tammajuitsussarsiaq nassarniarukku tamanna killeqarfimmi nakkutilliisunut ilisimatitsissutigineqassaaq
  • Tammajuitsussarsiaq timmisartukkut umiarsuakkulluunniit nassiutissappat, Uumasut nakorsaqarfia Inuussutissalerinermullu Oqartussaqarfiup tammajuitsussarsianut allagartap assilinera killeqarfimmi nakkutilliisunut nassiutissavaa, taamaasillutik tamatuminnga ilisimatinneqariissammata
  • Killeqarfimmi nakkutilliisunut uumasut nakorsaata nakkutilliineranut akiliuteqaratarsinnaanerit misissussavat
  • Tammajuitsussarsiamik tigusisussaq/nassitsiviusussaq eqqussisussatut nalunaarsorsimasuussaaq

Killeqarfimmi nakkutilliineq
Tammajuitsussarsiat nunanut allanut EU-p iluani eqqunneqartut soorlu Danmark, tamatigut uumasut nakorsaat killeqarfimmi nakkutilliisumut aqqusaarneqartartussaapput. Soorlu Kastrup-imi mittarfimmiusinnaavoq imaluunniit Aalborg-ip umiarsualivianiittumi. Tammajuitsussarsiat allakkatut nalinginnaasutut nassiunneqassanngimmata eqqaamassavat.


EU-p avataatigut nunanut allanut annissinerit
Tammajuitsussarsiamik EU-p avatataaniittunut nunanut allanut nassiussissaguit, illit nammineerlutit nassiussisutut nunap nassitsiviginiakkap naalagaaffigisaanut attaveqassaatit, nunap taassumap pineqartup piumasaqaatigisai qanoq ittuunerinik paasiniaavigalugit. Tamanna isumannaarneqareerpat nuna nassitsiviginiakkap Danmark-imi Fødevarestyrelse attavigissavaa peqqissutsimut allagartamik suliaqarnissamik isumaqatigiissuteqarfigalugu. Eqqumaffigineqassaaq tamanna sulissutigineqartillugu suliap sivisusinnaasarnera.


Malugiuk
Uumasut allat anninneqarnissaannut tunngassutillit uani pineqarlutik uumasut nungoratarsinnaasut soorlu arferit, nannut qilalukkallu qernertanut tunngassutillit allanik aalajangersagaqarmata. Allaaserisat attuumassutillit ataaniittut sukumiinerusumik atuarsinnaavatit.

Allaaserisat attuumassutillit

Fødevarestyrelsen
Stationsparken 31-33
2600 Glostrup
Danmark

Oqarasuaat: (+45) 72 27 69 00

Ammasarfii
Ataasinngorneq - Sisamanngorneq: 09.00 - 16.00
Tallimanngorneq: 09.00 - 15.00

Annertunerusumik attaveqarnissamut paasissutissat
Uumasut Nakorsaqarfia Inuussutissalerinermullu Oqartussaqarfik (VFMG)
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: uumasut@nanoq.gl

Aallaqqaasiutigalugu qinnuigissavassi Uumasut Nakorsaqarfia Inuussutissalerinermullu Oqartussaqarfik-mut saaffiginnissutit tamarmik uunga nassiunneqassasut uumasut@nanoq.gl