Uumasut – Danmark-imiit Kalaallit Nunaannut eqqussineq

Uumasut – Danmark-imiit Kalaallit Nunaannut eqqussineq 

Kalaallit Nunaannut uumasunik eqqussiniaruit akuersissummik peqqaartariaqarputit. Eqqussinermi uumasut assigiinngitsut assigiinngitsunik piumasaqaateqarfigineqarput. Uani angerlarsimaffinni uumasunik nalinginnaanerpaanik eqqussineq pillugu paasissutissarsivigisinnaavat: Tassa qimmit qitsuillu pillugit.


Qimmit
Qimminik eqqussinissaq Kitaani allorniusap sanimukartup 66 º-imiit kujammut taamaallaat akuerisaavoq. Tassa Kangaamiuniit kujammut Nunap isua tikillugu.

Qimminik eqqussinissamut akuersissut Kalaallit Nunaata København-imi Aallartitaqarfianut qinnutigissavat. Qinnuteqaammut ilanngullugit ukua nassiutissavatit:
  • Perlerornermut akiuussutissamik kapitissimanermut uppernarsaat, nassiutinnginnerani sivikinnerpaamik ullunik 30-nik sivisunerpaamillu ukiumik ataatsimik pisoqaassusilik
  • Qimmit nappaataannut aamma parvovirus-imut akiuussutissamik kapitissimanermut uppernarsaatit
  • Uumasut nakorsaannit peqqissuunissamut uppernarsaat, siusinnerpaamik aallarnissaq ullunik 14-inik sioqqullugu
  • Qullugianut katsorsarneqarsimaneq pillugu piginnittumit nalunaarut aamma aallarnissaq sioqqullugu ulluni 14-ini immikkoortitaasimaneq
  • Qimmeq arnaviaappat kinguaassiorsinnaajunnaarneq pillugu uppernarsaat

Qimmeq tikinnerup kinguninnguatigut kommunimi najugaqarfimmi nalunaarsorneqassaaq.

Qimmerisaq Danmark-imut nassarneqarsimappat, aamma Kalaallit Nunaannut eqquteqqinneqarniarpat maleruagassat taakku aamma atuutissapput.

Qimmit qimuttoqarfiusunut qimminik eqqussinissaq akuerisaanngilaq:
  • Kitaani allorniusap sanimukartup 66 º-imiit avannamut. Tassa Sisimiut kommuneqarfigisimasaa, Kangerlussuaq aamma avannamut avanersuarmi Siorapaluk ilanngullugu
  • Avannaarsuani nuna Eqqissisimatitaq, kiisalu Tunup sinnera kujammut Nunap isua tikillugu

Taamaattoq innarluuteqarneq peqqutigalugu qimminik sulisinneqartunik pisariaqartitsiguit, qimmit sulisinneqartut qimmillu innarluutillit ikiortaat qimmit qimuttoqarfiusunut eqqunneqarnissaat qinnuteqaatigineqarsinnaapput. Qimmimik sulisinneqartumik qimmit qimuttoqarfiusumut eqqussinissamut qinnuteqarniaruit, Ilulissani Uumasut Nakorsaqarfiat attavigissavat.


Qitsuit
Qitsuit Kalaallit Nunaannut eqqunneqarnissaanut inerteqqut december-ip aallaqqaataani 2013 atorunnaarsinneqarpoq.

Tamatuma kingunerivaa innuttaasut Kalaallit Nunaannut qitsummik eqqussiniartut Fødevarestyrelsen-imit qitsummik eqqussinissamut immikkut akuersissummik qinnuteqartarnissaq pisariaqarunnaarsinneqartoq.

Paarlattuanik maanna qimmimik eqqussiniarnermut assinganik qitsuk eqqussinnaanissaa København-imi Kalaallit Nunaata Sinniisoqarfianut qinnutigineqassaaq, taassumalu saniatigut kommunimi najugaqarfimmi uumasuuteqarsinnaanissamik akuersissut pigineqassaaq, kiisalu uumasut peqqissuunissaannut piumasarineqartut naammassineqarsinnaassallutik, Kalaallit Nunaannut uumasunik naatitassanillu eqqussiniarnermut najoqqutassat innersuussutigineqartut najoqqutaralugit.

Qitsunnik eqqussinissamut akuersissut Kalaallit Nunaata Sinniisoqarfianut qinnutigissavat. Qinnuteqaammut ilanngullugit ukua nassiutissavatit:
  • Perlerornermut akiuussutissamik kapitissimanermut uppernarsaammik sivikinnerpaamik ullunik 30-nik sivisunerpaamillu ukiumik ataatsimik pisoqaassusilik. Piaqqat qaammatit pingasut ataallugit utoqqaassusillit perlerornermut akiuussutissamik kapitinneqartariaqanngillat, piaqqat anaanaat kapitissimaneranik uppernarsarneqarsinnaappat
  • Uumasut nakorsaannit peqqissuunermut uppernarsaat pineqassaaq, siusinnerpaamik ullunik 14-inik aallarnissaq sioqqullugu
  • Qumaqarnermut katsorsarneqarsimaneq pillugu piginnittumit nalunaarut aamma immikkoortitaasimanissaq ulluni 14-ini aallarnissaq sioqqullugu
  • Kommunimi najugaqarfimmi qitsuuteqarsinnaanermik akuersissut

Qitsuutit tikinnerup kinguninnguatigut kommunimi najugarisami nalunaarsorneqassaaq.

Qitsuutigisaq Danmark-imut nassarneqarsimappat, aamma Kalaallit Nunaannut eqquteqqinneqarniarpat maleruagassat taakku aamma atuutissapput.


Uumasut allat
Uumasut allat eqqunniaraanni Fødevarestyrelse-p nittartagaani – www.foedevarestyrelsen.dk – maleruagassat atuuttut pillugit paasiniaasinnaavutit, soorlu kaniinat, marsvin-it, hamster-it, aalisagaaqqat, saaniluit, timmiaaqqat inimiittartut aamma papikuujuit.


Malugiuk
Qimmiutilinnut qitsuutilinnullu najoqqutareqqusat najoqqutaralugit kommunit ilaasa qitsuk eqqussinnaanissaanut piaqqiorsinnaajunnaarsinneqarsimanissaa piumasarisarpaat.

Qimminik qitsunnillu eqqussinermut annissinermullu atatillugu apeqqutissaqaruit Danmark-imi Kalaallit Nunaata Aallartitaqarfia attaveqarfigissavat.

Tamatigut eqqaamallugu angalatillutit uumasuutivit timmisartuussisartuniit ilaatinneqarsinnaanera qulakkiissallugu.

Najoqqutassanut ilitsersuutinut innersuussissut

Allaaserisat attuumassutillit

Fødevarestyrelsen
Stationsparken 31-33
2600 Glostrup
Danmark

Oqarasuaat: (+45) 72 27 69 00

Ammasarfii
Ataasinngorneq - Sisamanngorneq: 09.00 - 16.00
Tallimanngorneq: 09.00 - 15.00

Annertunerusumik attaveqarnissamut paasissutissat
Kalaallit Nunaata Sinniisoqarfia
Strandgade 91
Postboks 2151
1401 København K
Danmark

Oqarasuaat: (+45) 32 83 38 00
Fax: (+45) 32 83 38 01
E-mail: info@ghsdk.dk
Uumasut Nakorsaqarfia Inuussutissalerinermullu Oqartussaqarfik (VFMG)
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: uumasut@nanoq.gl

Aallaqqaasiutigalugu qinnuigissavassi Uumasut Nakorsaqarfia Inuussutissalerinermullu Oqartussaqarfik-mut saaffiginnissutit tamarmik uunga nassiunneqassasut uumasut@nanoq.gl