Namminersorlutik Oqartussat eqqumiitsuliornermut aamma kultureqarnermut tapiissutaat – Nalinginnaasumik paasissutissiineq

Namminersorlutik Oqartussat eqqumiitsuliornermut aamma kultureqarnermut tapiissutaat – Nalinginnaasumik paasissutissiineq 

Eqqumiitsuliortut suliaminnik ingerlatsiinnarumallutik aningaasaqarnikkut atugassanik pissarsiniarneq ajornartorsiutigikkajussinnaavaat. Kalaallit Nunaanni kulturikkut ingerlatsineq Namminersorlutik Oqartussat tapersersorneqassasoq kissaatigimmassuk, tapiissuteqartarnermik aaqqissuussinerit pingasut pilersinneqarsimapput, taakkunanngaanniit eqqumiitsuliortut aamma film-iliortullu suliaminnik ingerlatsinissamut tapiissutinik qinnuteqarnissamut periarfissaqarput.

Namminersorlutik Oqartussat eqqumiitsuliornermut aamma kultureqarnermut tapiissuteqartarnermik aaqqissuussineri pingasut tassaapput:
  • Namminersorlutik Oqartussat kultureqarnermut aningaasaliissutaat, pingaartumik eqqumiitsuliortutut inuuniutilinnut, suliaqartunut aamma ineriartortitsisunut Kalaallit Nunaanni aalajangersimasumik najugaqartunut tunniunneqartarput, taamaalillutik suliaminnik suliniutiminnillu aalajangersimasunik ingerlatsisinnaaqqullugit. Aningaasat suliniutinut allanut eqqumiitsuliornikkut qaffasissumik inissisimasunut aamma tunniunneqarsinnaapput
  • Kulturimut tunngasunik suliaqartunut tapiissutit, eqqumiitsuliortutut inuuniutilinnut, suliaqartunut aamma ineriartortitsisunut Kalaallit Nunaanni aalajangersimasumik najugaqartunut tunniunneqartarput. Tapiissutit ukioq ataaseq angullugu tunniunneqarsinnaapput qaammatikkaartumillu 22.000 kr.-ikkaartumik tunniunneqartarlutik, taamaalilluni tunineqartoq qaammammut aalajangersimasumik isertitaqarnissamut qulakkeerunneqartarluni
  • Film-iliornermut tapiissuteqartarnermik aaqqissuussineq, pingaartumik kalaallisut oqaluttualiamik film-iliorluni suliaqarnernut, nalinginnaasumik piviusulersaarluni film-iliornermi aamma piviusulersaarluni film-iliornermi eqqumiitsuliortorpalaartumik imaqartunik suliaqarnerup iluani, film-iliornermik suliniutinut tapiissutinik tunniussinermik ingerlatsisarpoq

Qinnuteqarnermi suliniummut ataasiinnarmut qinnuteqarsinnaavutit. Taamaattoq qinnuteqaatit aammattaaq allanut tapiissuteqartarfittut aaqqissuussinernut arlalinnit tapiissuteqarfigineqarnissamik qinnuteqarsinnaavutit.

Aaqqissuussinernit taakkuninngaanniit paasisassarsiorluni angalanernut tapiissutisisinnaanngilatit.


Paasissutissat
Naalakkersuisoqarfimmiit aningaasat atugassiissutigineqartut tunniunneqarneq ajorput, Namminersorlutilli Oqartussat qitiusumik naatsorsuuserivianiit (DCR) tamanna pisarpoq.

Tapiissutitut atugassiissutigineqartut pillugit naatsorsuutinik tunniussinissamut pisussaaffeqarputit. Aningaasat utertillugit tunniutissavatit, imaattoqarpat:
  • Sinneqartooruteqaruit
  • Siunertamut aningaasat atorsimanngikkukkit

Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfiup tapiissutigineqartut tamakkerlugit akileraartarnermi aqutsisoqarfimmut nalunaarutigisarpai. Tapiissutitut atugassiissutigineqartut pillugit apeqqutissaqaruit, illit najukkanni akileraartarnermut allaffimmut taakku paasiniarnissaat nammineerlutit akisussaaffigaat.


Malugiuk
Namminersorlutik Oqartussat kultureqarnermut aningasaliissutaat, kulturimut tunngasunik suliaqartunut tapiissutit aamma film-iliornermut tapiissuteqartarnermik aaqqissuussineq qanoq qinnuteqarfigisinnaaneritit pillugit allaaserisani attuumassuteqartuni annertunerusumik atuarsinnaavatit.

Tapiissuteqartarnermik aaqqissuussinerit pingasuusut taakku saniatigut, aaqqissuussinerit marluk allat pigineqarput, taakkuninngaanniillu innuttaasut nalinginnaasumik qinnuteqarsinnaasanngillat. Aaqqissuussinerit marluusut tassaapput:
  • Kalaallisuunik atuakkiornermut tapiissutit
  • Kalaallit nipilersugassiaannut NCB-mik taallugu aaqqissuussineq aningaasanik utertitsiffiusartoq, saqqummersitsisarfinnit taamaallaat qinnuteqarfigineqarsinnaasoq

Allaaserisat attuumassutillit

Ilinniartitaanermut, Kultureqarnermut Ilisimatusarnermut Ilageeqarnermullu Naalakkersuisoqarfik
Imaneq 4
Postboks 1029
3900 Nuuk

Oqarasuaat: (+299) 34 50 00
E-mail: ikiin@nanoq.gl
Nittartagaq: www.naalakkersuisut.gl