Kalittakkamik nalunaarsuineq atuiunnaanermillu nalunaarneq

Nalinginnaasumik paasissutissiineq 

Kalittakkat tassaapput biilit motoorillit suulluunniit kingornanut siornanulluunniit ikkunneqarsinnaasut aammalu namminneerlutik ingerlasinnaanngitsut. Taakku assersuutigalugu tassaasinnaapput kalittakkat mikisut imaluunniit biilinut sisamanik assakaasulinnut, traktoorinut usisaatit aamma biilinut usisaatilinnut kalittakkat angisuut.

Kalittakkat aqqusinerni illoqannginnersani aamma sumiiffinni allani atorneqartartut nalinginnaasumillu angallannermi atorneqartut nalunaarsorneqarsimassapput nummerplade-millu allagartalerneqarsimassallutik. Kalittakkat sumiiffinni avinngarusimasuni atorneqartartut, assersuutigalugu savaateqarfinni aamma nalunaarsorneqarsimasussaapput.

Kalittakkat sumiiffinni matoqqasuni inuit kikkuugaluartulluunniit isernissamut pisinnaajunnaartitaaffigisimasaanni, assersuutigalugu sanaartorfinni taamaallaat atorneqartartut nalunaarsorsimanissaat pisariaqanngilaq. Taamatuttaaq kalittakkat sumiiffinni avinngarusimasuni atorneqartartut nalunaarsorneqartariaqanngillat. Kalittagaq sumiiffimmit sumiiffimmut avinngarusimasumut atorneqartartoq nalunaarsorneqarsimassaaq.

Piumasaqaatit 

Nummerplade
Nalunaarsuinermi uppernarsaammut ilanngullugu nummerplade ataaseq pissarsiarissavat, taanna kalittakkap tunua-tungaanut ikkunneqassaaq.

Akileraarut 

Piffissami matumani kalittakkamut nalunaarsukkamut akileraarummik akiliuteqartoqarneq ajorpoq. Kingusinnerusukkut kalittakkat oqimaassusiinut akileraarummik atuilersoqassappat, tamanna pillugu Namminersorlutik Oqartussat nalunaaruteqarumaarput.

Nalunaarsuineq atuiunnaarnissamillu nalunaarneq 

Nalunaarsuineq
Kalittagaq pigisat nalunaarsorniarukku politiinut saaffiginnissaatit. Makku nassassavatit:
  • Kalittagaq. Nalunaarsuinermi kalittagaq illersorneqarsinnaasumik ajunnginnersoq politiit nalilersussavaat. Politiit pingaartumik qulliit, bremsit aamma qulleeqqat ingerlanermut nalunaarsuutaasartut eqqumaffigisarpaat
  • Nalunaarsuinermut immersuiffissaq immersugaq atsiugarlu

Nalunaarsortinneranut immersuiffissaq

Malugiuk sananeqarnerani normua eqqiarneqarsimassammat politiinullu takutitsinermi ersissalluni.

Illoqarfimmi politeeqarfeqanngitsumi najugaqaruit politeeqarfik qaninnerpaaq attaveqarfigissavat isumaqatigiissuteqarfigalugulu kalittagaq pigisat qanoq nalunaarsortissinnaanerlugu.

Atuiunnaarnermik nalunaarneq
Illit kalittagaq pigisat nalunaarsorneqassasoq kissaatigiunnaarukku, taassuminnga atuiunnaarnerit nalunaaruteqarfigissavat. Tamanna pisinnaavoq kalittagaq tunigukku. Matuma kingorna piginnittunngortup pisussaaffigilissavaa nammineq atini atorlugu kalittagaq nalunaarsortissallugu.

Illit kalittagaatinnik atuiunnaarlutit nalunaaruteqarniaruit politiinut taassuma nummerplade-taa tunniutissavat.

Kalittagaatit taassuma tuninissaa sioqqullugu atorunnaarlugu nalunaarutigisimanngikkukku, piginnittunngortup tuaviornerpaamik nammineq atini atorlugu nalunaarsortittariaqarpaa. Piginnittunngortup kalittagaq nammineq atini atorlugu nalunaarsortippagu, politiit nalunaarummik nassissavaatsit illit atit atorlugu taanna nalunaarsorneqarunnaartoq. Kalittakkap pigisavit tuninerata kinguninngua nalunaarummik politiinit tigusaqarsimanngikkuit pisisoq attaveqarfigisariaqassavat.

Ingerlatseriaaseq 

Nalunaarsuinermi uppernarsaat
Suut tamarmik eqqortuusut politiit nalilerunikkit nalunaarsuinermut uppernarsaammik politiit tunniussissapput assilineralu illit sillimmasiisarfigisannut nassiullugu.

Illit sillimmasiinermut normut imaluunniit policenormut, nalunaarsuinermi uppernarsaammi allassimasarpoq.

Allannguineq 

Pissutsini ilinnut tunngasuni allannguuteqartoqarpat politeeqarfik qaninnerpaaq saaffigissavat nalunaarsuinermilu uppernarsaammi paasissutissat iluarsitillugit.

Piffissaliussat (atorunnaarsitsineq) 

Piginnittumik allannguisoqassappat piginnittunngortup imaluunniit atuisunngortup piaarnerpaamik kingusinnerpaamillu sapaatit akunneri 3-sut qaangiutsinnagit nalunaarutigissavaat – kalittagaq atorunnaarneqartutut nalunaarutigineqanngippat.

Naammagittaalliuteqarneq 

Najukkami politeeqarfimmut imaluunniit Kalaallit Nunaanni Politimestereqarfimmut naammagittaalliuteqartoqarsinnaavoq.
Politeeqarfik Qaqortoq
Hovedstation
Postboks 506
3920 Qaqortoq

Oqarasuaat: (+299) 70 11 22
Fax: (+299) 64 12 22
Oqarasuaat angallattagaq: (+299) 49 41 22
E-mail: grl-qaqortoq@politi.dk