Atuarfiup siulersuisui

Nalinginnaasumik paasissutissiineq 

Atuarfimmi siulersuisut suleqatigiiupput atuisunit inuttalersukkat. Tassa ilaasortat atuisuupput, taakkualu atuisoqatigiit akornannit qinerneqartarput.

Atuarfiup siulersuisui pineqartillugit imaappoq, ilaasortat atuarfimmi angajoqqaajusunit angajoqqaatut oqartussaassusilinnit, ilinniartitsisunit atuartunillu qinerneqartarlutik. Matumani atuartunut ataasiakkaanut angajoqqaatut oqartussaassusillit inuit allat atuarfimmi siulersuisunut qinigassanngortissinnaavaat.

Atuarfimmi siulersuisunut qinersineq 

Atuarfiup siulersuisuini ilaasortaasut angajoqqaaqatiminnit angajoqqaatullu oqartussaassusilinnit ukiuni sisamani atuuttussanngorlugit qinerneqartarput.

Atuarfiup siulersuisuini ilinniartitsisut ilaasortaasut ilinniartitsisunit ilinniartitsisullu akornanni ukiukkaartumik qinerneqartarput.

Atuarfiup siulersuisuini atuartut sinniisaat atuartunit atuartullu akornanni ukiukkaartumik qinerneqartarput.

Malugiuk
Najukkami kommunalbestyrelsit aalajangertarpaat atuarfiup siulersuisuini ataasiakkaani angajoqqaat qassit ilaasortaassanersut. Amerlanertigut ilaasortat pingasut imaluunniit tallimat.

Atuarfinni 7. klasse tikiinnarlugu atuartulinni atuarfiup siulersuisuini atuartunik sinniisoqarnissaa piumasaqaataanngilaq.

Atuarfiup siulersuisuisa suliai 

Atuarfiup siulersuisuisa ilaatigut atuarfimmi nakkutilliineq suliassaraat. Tassa ilaatigut makkua akuersissutigisassaraat:
  • Atuarfimmi malittarisassat
  • Atuarfimmi atuartitsissutissatut pilersaarusiat
  • Atuarfiup missingersuutai
  • Atuarfimmi atortut atuartitsinermut atortussat

Tamatuma saniatigut atuarfiup siulersuisuisa atuarfimmi aqutsisoq qinnuigisinnaavaa, atuarfimmi ulluinnarni pissutsit assigiinngitsut pillugit paasissutisseeqqullugu.

Politikkikkut sinaakkusiussat 

Inatsisit maleruagassallu aalajangersimasut malillugit meeqqat atuarfiat atuarfimmi siulersuisunit aqutsivigineqassaaq. Inatsisit maleruagassallu taakku taaneqartarput politikkikkut sinaakkusiussat. Meeqqat atuarfiat pillugu pingaarnertut inatsisit maleruagassallu Namminersorlutik Oqartussanit akuersissutigineqartarput. Sinaakkusiussat taakku atorlugit meeqqat atuarfiini maleruagassiat atortussallu kommunalbestyrelsimit suliarineqartarput, taamaalillutik Namminersorlutik Oqartussat politikkikkut sinaakkusiat atuutsitaasa iluanni meeqqat atuarfiat inerisarlugulu aqutsivigisinnaavaat.

Atuartitsinermi maleruagassiat tunngavigalugit atuarfimmi siulersuisut assersuutigalugu:
  • Atuarfiup politikkikkut anguniagassaanik sanassavaat, atuarfiit ataasiakkaat ingerlanneqarneranni pingaarnertut anguniarneqartussat
  • Ilinniartitsinermi anguniagassat sinaakkutissallu suliarissavaat, assersuutigalugu ilinniartitsinerup ingerlannissaanut akunnerit ilinniartitsisullu naammattut pigineqarnissaat
  • Ilinniartitsinissamut pilersaarutit akuersineqarnerat taamaaliornikkullu atuartitsissutaasussat sulisoqarnissaat qulakkeerlugu
  • Atuarfiup angerlarsimaffiullu akornanni suleqatigiinneq pillugu ilitsersuineq

Politikkikkut sinaakkusiussat qulakkiissavaat atuartut pitsaanerpaamik atuartinneqarnissaannut aningaasat sulisullu naammattut pigineqarnissaat. Atuartut ilinniartitaanermik pisinnaatitaaffigisaminnik pissarsinissaat sinaakkusiussat taakku siunertaraat.

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl