Majoriani piginnaanngorsaqqinneq

Nalinginnaasumik paasissutissiineq 

Nunatsinni inuit kikkulluunniit ilinniagaqarnissamik suliffissaqarnissamillu periarfissaqartussaapput. Ilinniartitaaneq aqqutigalugu ilisimasanik atorsinnaalluakkannik pissarsiorsinnaavutit, inuunerup sinnerani atorsinnaasannik. Ilinniagaqarsimaguit suliffissatigut periarfissat aamma annertunerussapput. Suliffeqaruillu imminut pilersorsinnaallutillu ilaquttatit pilersorsinnaassavatit.

Piginnaanngorsaqqinneq suliffittaarnissannut ilinniagaqarnissannullu pitsanngorsaanissamut periarfissaavoq. Assersuutigalugu suliatigut piginnaasariaqakkannik amigaateqarnerit pissutigalugu inuussutissarsiutinik ilinniartitaanermut ingerlaqqissinnaanngikkuit, taava inuussutissarsiutinik ilinniagaqalernissamut piareersarfimmi akuerisaasumi (AEU) aqqusaagaqarnikkut karakteeritit pitsaanerulersissinnaavatit.

Ilinniagaqalernissamut imaluunniit sulilernissamut piginnaanngorsaqqikkumaguit, najukkanni Majoriamut saaffiginnissinnaavutit. Tassani inuussutissarsiutinut aamma ilinniartitaanermut siunnersuisartup piginnaanngorsarnissamut neqeroorutaasut assigiinngitsut pillugit siunnersorsinnaavaatit, assersuutigalugu:
  • Meeqqat atuarfiata soraarummeerluni misilitsinneranut (FA)
  • Inuussutissarsiutinik ilinniagaqalersinnaanissamut piareersarfimmut akuersisaasumut (AEU)
  • Sulinermut aamma suliffimmi sungiusarnermut

Majoriani atuartitsinerit assigiinngitsut ingerlanneqartarput. Ima paasisariaqarpoq piginnaanngorsaqqinneq najukkanni Majoriami ingerlanneqartassaaq. Taamaattorli Majoriani FA-t ilaat meeqqat atuarfianni ingerlanneqartarput. Najukkanni Majoriamut saaffiginnikkuit, siunnersuisartoq inissisimaninnut pisariaqartitannullu naleqqussakkamik iliuusissanut pilersaarusiussaaq. Iliuusissanut pilersaarut ilinniagaqalernissannut imaluunniit suliffeqalernissannut aqqusaartugassanik nassuiaataavoq.

Majoriamut saaffiginnikkuit nassatassatut eqqaamasassatit ukuupput:
  • Najugaqarnermut uppernarsaat
  • Kuisinnermut allagartaq
  • Meeqqat atuarfiannit karakteerit
  • Sulisitsisumit oqaaseqaammik peqaruit ilanngunneqarsinnaavoq

18-it inorlugit ukioqaruit angajoqqaannit imaluunniit angajoqqaatut akisussaatitaasumit akuersissut siunnersorneqarnissat pillugu nassassavat. Aamma angajoqqaatit imaluunniit angajoqqaatut akisussaatitaasut ilagalugit ornigussinnaavutit.

Malugiuk
Nunaqarfigisanni Majoriaqanngippat Majoriamut qaninnerpaamiittumut sianersinnaavutit imaluunniit nunaqarfiup allaffianut saaffiginnissinnaallutit.

Majoriami sulisut nipangiussisussaatitaapput. Eqqartukkasi tamarmik illit Majoriamilu sulisut akunnissinniiginnassapput.

Allaaserisat attuumassutillit

Majoriaq
Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik
Imaneq 1A 301
Postboks 1601
3900 Nuuk

Oqarasuaat: (+299) 34 50 00
Fax: (+299) 34 63 64
E-mail: isiin@nanoq.gl
Inuussutissarsiorneq pillugu nittartagaq: businessingreenland.gl
Nittartagaq: www.naalakkersuisut.gl