Akiliunneqarluni angalaneq

Nalinginnaasumik paasissutissiineq 

Akiliunneqarluni angalaneq akeqanngitsumik angalaneruvoq. Ilinniartutut illoqarfiup najugarisavit illoqarfiullu ilinniarfivit akornanni akiliunneqarlutit angalanerit assigiinngitsunut pisinnaatitaavutit.

Malugiuk
Immikkut pisoqartillugu akiliunneqarluni angalanissamut qitornannut aapparisinnaasannullu akiliunneqarluni angalanernut arlaannut qinnuteqaateqarsinnaavutit.

Piumasaqaatit 

Akiliunneqarluni angalanerit akuersissutigineqassappat piumasaqaateqarpoq malitassannik. Piumasaqaataavoq:
  • Ilinniagaqarnersiuteqarnissamik akuerineqarsimanissat
  • Ilinniakkap sivikinnerpaamik qaammatinik qulinik sivisussuseqarnissaa
  • Pisortanit ikiorsiissutinik pisartagaqannginnissat

Akiliunneqarluni angalanissat qinnuteqaatigissagukku angalanissaq pitinnagu sapaatit akunneri sisamat sioqqullugit billetsissat inniminnersimassavat.

Atuanngiffeqarnermut imaluunniit erninermut atatillugu akiliunneqarluni angalanissamut qinnuteqaateqaruit, piumasaqaatit pingasut malissavatit:
  • Atuanngiffeqarnissat ilinniarfeqarfigisannit akuerineqarsimassaaq
  • Atuanngiffeqarnissat sivikinnerpaamik qaammatinik pingasunik sivisussuseqassaaq
  • Atuanngiffeqarnissap aallartinnissaanut qaammammik ataatsimik sioqqutsilluni akiliuneqarluni angalanissat pissaaq

Ilinniagaqareernerpit kingorna qinnuteqassaguit ilinniagaqarsimanerup naammassineranit kingusinnerpaamik ukioq ataaseq qaangiutereersoq angerlamut angalareersimassaatit.

Akiliunneqarluni angalanerit assigiinngitsut 

Piumasaqaataasut assigiinngitsut malinneqarsimappata akiliunneqarluni angalanerit pisinnaasatit tassaapput:
  • Ilinniarnerup aallartinnerani
  • Ilinniakkap taamaatinnerani imaluunniit taamaatikkallarnerani
  • Feeriarnermi
  • Sulinngiffeqarallarnermi erninermilu
  • Ilinniarnermut atatillugu allami najugaqarallarnermi
  • Ilinniakkap naammassinerani
  • Ilaquttani qaniginerpaasani napparsimasoqartillugu toqusoqarsimatillugulu

Ilaquttat qaninnerpaat tassaapput:
  • Nammineq meeqqat, ueq/nuliaq, angajoqqaat qatanngutit aanaa aataalu
  • Aappariit inersimasutut ukioq ataaseq sinnerlugu najugaqatigiissimanermut uppernarsaasinnaasut aappariittut naatsorsuutigineqarput

Qinnuteqarneq 

Ilinniarnerpit aallartinneranut atatillugu ilinniarfissatut qinnuteqarfigisannut akiliunneqarlutit angalanissannut qinnuteqassaatit.

Allanut angalanernut qinnuteqarniaruit ilinniarfinni ilinniarneq pillugu siunnersuisumut saaffiginnissaatit.

Allaaserisat attuumassutillit

Ilinniagaqarnersiuteqartitsivik - USF
Postboks 1022
3900 Nuuk

Oqarasuaat: (+299) 34 50 00
E-mail: usf@nanoq.gl