Peqqinnissaqarfiup sullississutai – Akiliuteqarneq

Peqqinnissaqarfiup sullississutai – Akiliuteqarneq 

Aallaavittut peqqinnissaqarfiup sullississutai tamarmik akeqanngillat. Tamanna isumaqarpoq innuttaasut kikkulluunniit napparsimalerunik misissortinnissamut, nakorsartinnissamut paaqqutarineqarnissamullu pisinnaatitaaffeqartut.

Taamaattoq sullississutit ataasiakkaat illit tamakkiisumik ilaannakuusumilluunniit akilertussaavatit.


Ingiallorteqarneq
Nakorsarneqarninnut imaluunniit unitsinneqarninnut atatillugu qanigisannik ilaqarnissat kissaatigigukku, siuningaanit misissussavat qanigisavit angalaneranut najugaqarneranullu aningaasartuutit peqqinnissaqarfiup akilersinnaanerai.

Qanigisaasup ataasiinnaap, taamaallaallu ingiallorteqarnissat pisariaqartikkit nakorsap aalajangerpagu, aamma peqqinnissaqarfik sulisuminik ingiallortaasinnaasumik pissarsisinnaanngippat, angalanera najugaqarneralu peqqinnissaqarfiup akilissavai.

Ingiallorteqarnissamik pisariaqartitsinngitsutit nakorsap aalajangerpagu, taamaattorli nakorsarneqarnermut imaluunniit unitsinneqarnermut atatillugu qanigisannik ilaqarnissat illit kissaatigalugu, qanigisavit sumiiffissaanik nerisaqarfissaanillu pissarsiniarninni peqqinnissaqarfiup immaqa ikiorsinnaavaatit. Kiffartuussinerilli taakku nammineq akilissavatit.

Qanigisaasup angalaneranut najugaqarneranullu aningaasartuutit peqqinnissaqarfimmit qanoq pisoqaraangat akilerneqartarnersut, ”Peqqinnissaqarfiup sullississutai – Napparsimasumik angallassineq”-rup ataani annertunerusumik atuarsinnaavatit.


Nakorsaatit pisiarineqarsinnaasut
Nakorsaatit pisiarineqarsinnaasut tassaapput nakorsaatit nakorsamit allagartalerneqanngikkaluarlutik pisiniarfinni pisiarineqarsinnaasut. Nakorsaatit taamaattut nammineerlutit akilertussaavatit.

Ataavartussamik nappaateqaruit, 18-it inorlugit ukioqaruit imaluunniit soraarninngorsimallutit, nakorsaatit pisiarineqarsinnaasut peqqinnissaqarfimmit akeqanngitsumik pissarsiarinissaannut periarfissaqarputit.

Nalornissuteqaruit najukkanni peqqinnissaqarfik attaveqarfigisinnaavat.


Akiuussutissat
Akiuussutissat, meeqqat nalinginnaasumik akiuussutissinneqartarnerannut ilaanngitsut imaluunniit nakorsamit peqqussutaanngitsut, nammineerlutit akilertussaavatit.


Nakorsap allagarsiussatut uppernarsaataa
Assersuutigalugu inuuneq pillugu sillimmasiinermut imaluunniit biilernermut allagartartaarniarninnut atatillugu peqqissutsivit misissorneqarnissaanut nakorsap allagarsiussatut uppernarsaataa atorfissaqartikkukku, misissortinneq nammineerlutit akilertussaavat.


Allattugaatit
Illit pillutit allattugaatit nuutinnerat piniarukku, najukkanni napparsimmavimmut qinnutigissavat. Nuutinneranut akiliuteqassaatit.


Illerfimmik assartuussineq
Toqukkut qimaguttup timaanik angallassinermut atatillugu maleruagassanik peqartoqanngilaq.

Peqqinnissaqarfiup ileqqoraa nunatsinni napparsimmavimmi peqqissaavimmiluunniit, imaluunniit Danmark-imi nakorsarneqarfigisami napparsimmavimmiluunniit, kalaaleq nakorsartittoq nakorsartinnerup nalaani toqukkut qimaguppat, nakorsarneqarfigisamit najukkamut timmisartumut bilitsip siumuinnaasup nalingata aningaasartuutigineqarneratut atsigisoq peqqinnissaqarfimmit akilerneqartarnera.

Aningaasartuutit sinneri qimagaasut namminneq akilertussaavaat.

Tamanna nakorsarneqartunut sumiiffimmi pineqartumi nakorsarneqarnissamut peqqinnissaqarfimmit innersuunneqarsimasunut taamaallaat atuuppoq.

Inuup toqukkut qimaguttup timaa angallanneqassappat, assersuutigalugu peqqissaavimmit pineqartup toqukkut qimaguffianiit nunatsinni sumiiffimmut ilisaaffissaanut angallassineq peqqinnissaqarfiup isumagisinnaavaa. Tamanna taamaallaat pisinnaavoq najukkami inuussutissarsiummik ingerlatsisup kiffartuussineq taama ittoq neqeroorutigisinnaanngippagu. Aningaasartuutit toqukkut qimaguttup qanigisaasa namminneq akilertussaavaat.

Takusinnaavattaaq www.peqqik.gl

Allaaserisat attuumassutillit

Peqqissutsimut Naalakkersuisoqarfik
Imaneq 1A - 401
Postboks 1160
3900 Nuuk

Oqarasuaat: (+299) 34 50 00
Fax: (+299) 34 55 05
E-mail: pn@nanoq.gl
Nittartagaq: www.naalakkersuisut.gl