Kigutit nakorsaat – Kigutileritinnermik sullississutit

Kigutit nakorsaat – Kigutileritinnermik sullississutit 

Peqqissutsip pitsaanerulersinneragut, pitsaaliuinikkut nakorsaanikkullu innuttaasut peqqinnerulernissaannut suleqataanissaq Peqqinnissaqarfiup suliassaraa. Kigutilerineq sullissinerit taakku ilagaat.

Innuttaasut kikkulluunniit akeqanngitsumik kigutit nakorsaannit suliaritissinnaapput, taamaattoq meeqqat inuusuttullu 20-it inorlugit ukiullit salliutinneqartussaapput.

Akeqanngitsumik kigutileritinnermik sullississutinut nalinginnaasunut ilaapput:

  • Akuttunngitsumik misissortinnerit, tassa kigutit misissoqqissaarnerat
  • Qanoq iliorlutit kigutivit paarilluarsinnaanerannik, assersuutigalugu kukkaajaammik allunaasaaqqamik qanoq atuinissannik ilitsersuineq
  • Suliarineqarasuarneq, assersuutigalugu ikkikkut marniliuussimaguit
  • Kigutivit iluarsaannerat, assersuutigalugu kigutitit putoqarpata
  • Kigutaasat aamma kigutit tigummisui

Najukkanni inuit allattorsimaffiannut nalunaarfigisimasanni nalinginnaasumik kigutileritissinnaavutit. Taamatuttaaq nunap ilaani allami pilertortumik kigutileritinnissamut aamma periarfissaqarpoq, sumiiffimmi tassani kigutileriffimmi saaffigisanni sulisoqarnikkut inuttassaqarpat.


Immikkut ittumik ikiorneqarneq
Inuit kigutilerisut neqeroorutaannik nalinginnaasumik atuisinnaanngitsut, immikkut ittumik ikiorneqarsinnaapput.

Immikkut ittumik ikiorneqarnissaq pisariaqalersinnaavoq, inuk timikkut sanngiillisimappat, assersuutigalugu assammigut gigteqarnini pissutigalugu kigutigissaatinik tigummiarsinnaajunnaarsimappat. Inuit tarnikkut sanngiitsut imaluunniit napparsimasut, assersuutigalugu puigortunngorsimasut, paaqqutarisariallit angerlarsimaffianni sulisunik kigutigissarnissap eqqaamanissaanut ikiuisinnaasunik atorfissaqartitsisut, aammattaaq immikkut ittumik ikiorneqarsinnaapput.


Ilinniagaqartunut immikkut ittumik atugassarititat
Inuit allattorsimaffiannut nalunaarfigisimasanniunngitsoq sumiiffimmi allami ilinniagaqaruit, sumiiffimmi ilinniarfigisanni akeqanngitsumik kigutit nakorsaannukarsinnaavutit.


Malugiuk
Kigutiluttorujussuuguit Kalaallit Nunaannullu nuullutit, kigutit nakorsaata kigutitit akeqanngitsumik suliarissagai qulakkeerluarsinnaanngilat.

Kalaallit Nunaata avataani nunani allani kigutit nakorsaaliarneq peqqinnissaqarfimmit akilerneqarneq ajorpoq.

Takusinnaavattaaq www.peqqik.gl

Allaaserisat attuumassutillit

Peqqissutsimut Naalakkersuisoqarfik
Imaneq 1A - 401
Postboks 1160
3900 Nuuk

Oqarasuaat: (+299) 34 50 00
Fax: (+299) 34 55 05
E-mail: pn@nanoq.gl
Nittartagaq: www.naalakkersuisut.gl