Kalaallit Nunaanni timmisartumik angallanneq

Kalaallit Nunaanni timmisartumik angallanneq 

Kalaallit Nunaat dansk-it naalagaaffeqatigiiffiannut ilaavoq. Suliassaqarfiit ilaat Danmark-imit isumagineqarput, matumani illersornissamut tunngasut, eqqartuussiveqarneq aamma timmisartumik angallannermut suliassaqarfik.

Timmisartumik angallannermut suliassaqarfik Kalaallit Nunaata tamanna kissaatigippagu tiguneqarsinnaavoq, ullumikkulli angallannermut ministeriaqarfimmi Angallannermut aqutsisoqarfimmi tamanna isumagineqarpoq. Tassalu Danmark-imi Angallannermut aqutsisoqarfiup Kalaallit Nunaata silaannartaanut tunngatillugu maleruagassat aalajangersartarpai.

Angallannermut aqutsisoqarfiup Namminersorlutik Oqartussani Peqqissutsimut Attaveqarnermullu Naalakkersuisoqarfik tusarniaaffigisarpaa
  • timmisartumik angallannermut maleruagassanik Kalaallit Nunaannut atuuttussanik aalajangersaannginnermini
  • Kalaallit Nunaannut timmisartuussisarnissamut akuersissummik tunniussinnginnermini
  • imaluunniit nunatta silaannartaatigoortarnissamik naalagaaffimmik allamik isumaqatigiissuteqannginnermini

Taamaalilluni Namminersorlutik Oqartussat timmisartuussisarnermut tunngasut pillugit maleruagassat aalajangiiffigineq ajorpaat, taamatullu aamma Namminersorlutik Oqartussat assersuutigalugu ilaasut saaffiginninnerisigut naammagittaalliortarfiunani.

Kalaallit Nunaanni mittarfinnik ulluinnarni ingerlatsineq Mittarfeqarfinnit, Peqqissutsimut Attaveqarnermullu Naalakkersuisoqarfiup ataaniittumit isumagineqarpoq.


Sullissinissamik isumaqatigiissutit
Kalaallit Nunaat isorartuujuvoq inuilu illoqarfippassuarni nunaqarfippassuarnilu siammarsimapput.

Sumiiffinnut innuttakillutillu sullitassakiffiusunut timmisartuussinerit timmisartuussisartumut annaasaqaataasarput, taamaattumik ungasinnerusoq isigalugu angallavinnik matooraasariaqartarlutik. Angallaviit taakku ingerlaannarnissaat siunertaralugu Namminersorlutik Oqartussat timmisartuussisartoq sullissinissamik isumaqatigiissutinik taaneqartartunik isumaqatigiissuteqarfigisarpaat.

Sullissinissamik isumaqatigiissutit oqaatigilluaannarlugu pingasunik imaqartarput:
  • Akuttoqatigiissumik timmisartuussisarnissamik piumasaqaat
  • Billet-it akiisa qaffasinnerpaaffissaat
  • Angallavimmi isertitassaagaluit isertinneqanngitsoortut matussuserniarlugit Namminersorlutik Oqartussat timmisartuutileqatigiiffimmut akiliuteqarnissaat

Pingaartumik Kujataani Avannaanilu angallassinermi sullissinissamik isumaqatigiissuteqartoqarpoq. Angallaviit iluanaaruteqarfiunngitsumik atugassaqartitsiviusumik timmisartuussiffiusartut allanngorartarput. Ukiunik arlaqanngitsunik akuttussusilinnik sullissinissamik isumaqatigiissutit isumaqatiginninniutigineqarajupput.


Malugiuk
Angallannermut aqutsisoqarfik pillugu taassuma nittartagaa aqqutigalugu annertunerusumik atuagaqarsinnaavutit.

Mittarfeqarfiit pillugit taassuma nittartagaani annertunerusumik atuagaqarsinnaavutit.

Allaaserisat attuumassutillit

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfik
Imaneq 1A - 601
Postboks 909
3900 Nuuk

Oqarasuaat: (+299) 34 50 00
E-mail: box909@nanoq.gl
Nittartagaq: www.naalakkersuisut.gl