Folketingimut qinersineq

Nalinginnaasumik paasissutissiineq 

Kalaallit Nunaanni Folketingimut ilaasortassanik marlunnik qinersisoqartarpoq. Folketingimut ilaasortat ullormiit qinersivimmiit atuuttumik ukiunut sisamanut qinerneqartarput naalagaaffimmi qinikkatut - taamaattoq Savalimmiut ilanngunnagit.

Kalaallit Nunaat qinersiviuvoq ataaseq.

Kalaallit Nunaanni Folketing-imut qinersisarneq Kalaallit Nunaanni Naalagaaffiup Sinniisuata aqutarisarpaa.

Naalagaaffiup Sinniisoqarfiata ulloq qinersivissaq tamanut ammasumik nalunaarutigisarpaa, tassunga ilanngullugu qinigassanngortitassat qaqugu kingusinnerpaamik nalunaarutigineqarnissaat nalunaarutigisarlugu.

Qinersisinnaatitaaneq 

Kinaluunniit Folketingimut qinersisinnaatitaavoq qallunaatut innuttaassuseqartoq, 18-nik ukioqalereersimasoq naalagaaffimmi najugalik, imaanngippat inuk pineqartoq qinersisinnaatitaajunnaarsimasoq. Inuk qinersisinnaasut allattorsimaffianni allassimanngitsoq qinersisinnaatitaanngilaq.

Naalagaaffiup Sinniisoqarfiata nittartagaani qinersisinnaatitaaneq pillugu paasissutissat annertunerusut.

Allakkatigut qinersisarneq 

Allakkatigut qinersisinnaavutit qinersisinnaatitaaguit kisiannili ullormi qinersivimmi qinersiartorsinnaanngikkuit.

Qinersivissat
Ullormi qinersivimmi sumiinnerit apeqqutaatillugu allakkatigut qinersisinnaavutit:

• Kalaallit Nunaanniikkuit inunnik nalunaarsuiffimmi sumiluunniit allakkatigut taasisinnaavutit
• Kalaallit Nunaanni napparsimavimmiikkuit, peqqissaavinniikkuit paaqqinnittarfinniikkuilluunniit tassani allakkatigut qinersisinnaavutit
• Kalaallit Nunaanni pinerluttunik isumaginniffimmiikkuit tassani allakkatigut qinersisinnaavutit
• Assersuutigalugu Kalaallit Nunaanni mittarfeqarfimmi silasiorfimmiluunniit kommuneqarfiunngitsumiikkuit qinersinernik tigooraasumut aningaasaqarnermut nunamilu namminermi pissutsinut minister-imit toqqakkamut tunniussassamik aallakkatigut qinersisinnaavutit
• Kalaallit Nunaanni avinngarusimasumi qinersiveqanngitsumi najugaqaruit inummut qinersinernik tigooraasumut kommunalbestyrelse-mit toqqakkamut tunniussassamik aallakkatigut qinersisinnaavutit
• Danmark-imiikkuit inunnik nalunaarsuiffimmi, innuttaasunik sullissivimmi qinersinernik tigooraasumut aningaasaqarnermut nunamilu namminermi pissutsinut minister-imit toqqakkamut tunniussassamik allakkatigut qinersisinnaavutit

• Savalimmiuniikkuit Savalimmiuni inunnik nalunaarsuiffimmi imaluunniit qinersinernik tigooraasutut immikkut pisinnaatitaasumut tunniussassamik aallakkatigut qinersisinnaavutit
• Nunami allamiikkuit dansk-it diplomati-attut imaluunniit konsuleqarfimmi aallartitamut imaluunniit qinersinernik tigooraasutut aningaasaqarnermut nunamilu namminermi pissutsinut minister-imit toqqakkamut tunniussassamik allakkatigut qinersisinnaavutit
• Umiarsuarni angallatiniluunniit Kalaallit Nunaanni najugalittut nalunaarsugaasuni imaluunniit dansk-it umiarsuaanni nunani allani angalasuni umiartortut ilaasullu umiarsuarmi angallammiluunniit imaluunniit umiarsualiveqarfimmi allakkatigut taasisinnaapput. Umiarsuup naalagaa taassumaluunniit toqqagaa aamma umiarsualiveqarfiup pisortaa imaluunniit taassuma toqqagaa qinersivinnik tigooraasutut atuutissaaq


Qaqugu allakkatigut taasisoqarsinnaava?
Ulloq qinersivissaq siusinnerpaamik qaammatinik 3-nik sioqqullugu allakkatigut qinersisoqarsinnaavoq. Umiartortulli ilaannut immikkut malittarisassaqarpoq.

Ullormi qinersivimmi nalunaaqutaq 9:00 tikitsinnagu qinersisinnaasutut allattorneqarfigisanni qinersinermik aqutsisup allakkatigut taasinerit tiguppagu, qinersisut kisinneqarneranni allakkatigut qinersinerit kisimi atuussinnaavoq.

Naalagaaffiup Sinniisoqarfiata nittartagaani allakkatigut qinersisarneq pillugu paasissutissat annertunerusut atuarsinnaavatit.

Qinigassanngortitat 

Folketing-imut qinigassanngortittut pillugit naalagaaffiup sinniisuata allattorsimaffianut ilanngunneqarusukkuit qinigassanngortinnerit nalunaarutigissavat. Immersugassaq immikkut ittoq atorlugu qinigassanngortinnerit nalunaarutigissavat, taannalu ulloq qinersiffissaq ullunik 11-inik sioqqullugu kingusinnerpaamik nal. 12:00 qinersinermut siulersuisunut tunniunneqassaaq.

Partii inatsisartuni ilaasortaatitalik sinnerlugu qinigassanngortinniaruit, tamanna qinigassanngortinnissaq pillugu nalunaarummi allanneqassaaq. Tamatuma saniatigut partii sinnerlugu qinigassanngortinneq partiip akuersissutigissavaa. Partii sinnerlugu qinigassanngortissinnaasut akuersissutigineqassapput qinigassanngortittut pillugit allattorsimaffinnut partiip ilanngussineratigut. Partiip malittarisassai malillugit inuk atsiortussaatitaasoq allattorsimaffimmut atsiussaaq. Partiip malittarisassai allattorsimaffillu partiip nassiutissavai. Allattorsimaffik Kalaallit Nunaanni Naalagaaffiup Sinniisuanut nassiunneqassaaq. Allattorsimaffik taanna qinersinissaq ullunik 11-nik sioqqullugu kingusinnerpaamik nal. 12:00 Kalaallit Nunaanni Naalagaaffiup Sinniisuanit tiguneqareersimassaaq.

Partiit avataasigut qinigassanngortinniaruit tamanna qinigassanngortinneq pillugu nalunaarummut allassavat. Partiit avataasigut aatsaat qinigassanngortissinnaavutit, qinersivigisanni qinersisartunit 100-nit innersuunneqaruit. Taakkua innersuussutigissavaatsit qinigassanngortinneq pillugu nalunaarummut imaluunniit taassuma assilineranut atsiornermikkut. Taakkua atertik, inuttut normortik najugartillu allassavaat.

Qinigassanngortinneq pillugu immersugassaq qinersinermut siulersuisunut saaffiginninnikkut pissarsiarineqarsinnaavoq.

Qinigassanngortinnermik nalunaarneq pillugu malittarisassat naalagaaffiup sinniisoqarfiata nittartagaani atuarneqarsinnaapput.

Nalunaarutit tiguneqartut atortussaatitaanerannik naalagaaffiup sinniisoqarfia aalajangiissaaq. Tamatuma kingorna qinigassanngortittut aqqi naalagaaffiup sinniisoqarfiata tamanut ammasumik nalunaarutigissavai.

Naammagittaalliorneq 

Folketing-imut qinersisarneq pillugu kinaluunniit naammagittaalliuuteqarsinnaavoq.

Allakkatigut naammagittaalliuutit Kalaallit Nunaanni Naalagaaffiup Sinniisuanut nassiutissavat. Ullup qinersiviup kingorna kingusinnerpaamik sapaatip akunnerata qaangiunnerani ulloq taanna naammagittaalliuut naalagaaffiup sinniisuata tigoreersimassavaa.

Tamatuma kingorna naalagaaffiup sinniisuata oqaaseqaatini ilanngullugit naammagittaalliuut aningaasaqarnermut nunamilu namminermi pissutsinut minister-imut nassiutissavai.

Kommune Kujalleq
Postboks 514
3920 Qaqortoq
Oqarasuaat: 704 100
Fax: 704 177
E-mail: kommune@kujalleq.gl
Nittartagaq: www.kujalleq.gl

Naalagaaffiup Sinniisoqarfia
Indaleeqqap Aqq. 3
Postboks 1030
3900 Nuuk

Oqarasuaat: (+299) 32 10 01
E-mail: ro@gl.stm.dk
Nittartagaq: www.rigsombudsmanden.gl