Aningaasalersuinissamut periusissiorneq

Aningaasalersuinissamut periusissiorneq 

Aningaasalersuinissamut periusissiornermi aallaaviuvoq siunissami aningaasat ingerlaarnissaattut ilimagisat ataatsimut isigalugu takulluarsinnaassagit (aningaasat suliffimmut isaasut tassanngalu aniasut). Taamatut tamatigoortumik takunnissinnaalissaatit aningaasanut tigoriaannarnut missingersuusioruit – ajornanngippat kukkunersiuisut peqatigalugu. Aningaasanut tigoriaannarnut missingersuusiaq atorlugu illit aningaaserivivillu – immaqalu aningaasaleeqataasut allat – nalilersinnaalissavarsi suliffeqarfiup taarsigassarsiat utertillugit akilersinnaassanerai.


Aningaasanik tigoriaannarnik pisariaqartitsineq
Suliffeqarfik aningaasanik tigoriaannarnik qanoq pisariaqartitsitiginersoq isummerfigisariaqarpat. Tamatumani pineqarput aningaasat sullitat pisassaat aamma soorlu tunisat ikinnerunerannut, aningaasartuutit qaffasinnerunerannut assigisaannulluunniit tunngatillugu aningaasartuutit takkuteriataartut.


Aningaasat tigoriaannaat ingerlaarnerat
Siunissami aningaasat tigoriaannaat ingerlaassangatinneqarnerat nalilersussavat, tamatumani ilanngullugu aningaasat sulinermut atugassat sumut killeqarnissaat – soorlu nioqqutissiornermi akilerallagassat.

Suliffeqarfivit nutaap aningaasat tigusassat qaqugu tiguneqarnissaannik aqutsisinnaanera pingaaruteqarpoq. Tamatumani pineqarpoq sullitatit sapinngisamik sivikinnerpaamik akiliinissamut piffissalissagitit illillu nammineq pisiffigisartakkanni akiliinissamut sapinngisamik sivisunerpaamik piffissalerlutit. Aamma eqqarsaatigissavat nioqqutissat uninngasuutivit ikinnerpaatinniarnissaat.


Pigisat nalillit akiitsullu
Pigisat nalillit akiitsullu oqimaaqatigiinniartussaapput. Pigisat nalillit, assersuutigalugit soorlu illuutit, nioqqutissallu uninngasuutit akiitsunit aningaasalersugaapput, assersuutigalugit soorlu taarsigassarsianit namminerluunniit sillimmatinit.


Suliffeqarfiup erniatigut isikkua
Aamma nalilersortariaqarpat taarsigassarsiat nikerartumik erniallit aalajangersimasumillu erniallit akornanni pissutsit qanoq ittuussanersut.


Erniat aalajangersimasut
Taarsigassarsiat aalajangersimasumik erniallit pitsaaqutaapput ilimagigukku piffissap taarsigassarsiviusup ingerlanerani erniat qaffakkiartussasut. Erniat aalajangersimasuuppata siunissami ernianut aningaasartuutit nalussanngilatit aningaasallu tigoriaannaat missingersuusiorneranni naatsorsuutigereersinnaallugit. Erniat aalajangersimasut tupannartut quianaatsut pinngitsoortittarpaat, akerlianilli taarsigassarsiat nutaat aalajangersimasumik erniallit nikerartumik ernialinnit erniatigut akisunerulaarsinnaapput.


Erniat nikerartut
Erniat nikerartuugunik erniat nalinginnaasumik allanngorarnerat malittarpaat. Nikerartumik ernialinnik taarsigassarsineq iluaqutaasinnaavoq erniat apparpata, ernialli qaffappata ajoqutaasussaalluni.

Taarsigassarsiat nikerartumik ernialikkat erniaat aalajangersimasumik ernialikkanut minnerugajuttarput. Suliffeqarfimmut nutaamut aningaasatigut killeqartumik missingersuuteqartumut nikerartumik ernialinnik taarsigassarsinissaq iluaqutaassanngilaq, tassa erniat taamalu ernianut aningaasartuutit qaffaratarsinnaammata.


Piffissalersuineq
Aamma piffissalersortariaqarpatit assersuutigalugu soorlu taarsigassarsiat, aningaasaliissutit, sullitanut akiligassat, suliffeqarfinnut pisiffigisartakkanut piffissap akiligassaqarfiup sivisussusissaa.


Aningaasalersuineq
Taarsigassarsiat, nammineq aningaasalersukkat avataaniillu aningaasaliisinnaasunut akornanni pissutsit eqqortumik inissisimanissaat toqqartariaqarpat. Aningaasaliisut pisassaqartullu ataasiakkaat ajutoornissamut iluanaaruteqarnissamullu neriuutigisaat qulaajartariaqarput, kingusinnerusukkut neriuutigisimasat angusallu akornanni equngassuteqartoqaleqqunagu.

Suliffeqarfik taarsigassarsiat assigiinngitsut atorlugit aningaasalersorneqarsinnaavoq:

  • Illuutit aningaasalersorneqarajuttarput realkreditinstitut-iniit taarsigassarsiat aqqutigalugit, taakkualu neqeroorutigisarpaat aalajangersimasunik ernialinnik nikerartunilluunniit ernialinnik taarsigassarsinissaq. Taamaallaat Kalaallit Nunaanni illoqarfinni annerni Qaqortumi, Nuummi, Sisimiuni Ilulissanilu realkredit atorlugit taarsigassarsisoqarsinnaavoq
  • Aningaaseriviit nioqqutissiornermi atortussat ingerlatsinerlu aningaasalersorajuttarpaat. Nioqqutissiornermi atortussat aningaasalersorneqarsinnaapput taarsigassarsinikkut ataavartumillu ingerlatsineq aningaasanik tigusisinnaatitaanikkut. Tamatuma saniatigut assigiingitsunut aningaasaliinissamut assigiinngitsut isumaqatigiinniutigineqarsinnaapput pequtit, atortussat assigisaalluunniit pillugit

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl