Nammineq piginnittuuneq

Nammineq piginnittuuneq 

Suliffeqarfiit qanorluunniit ilusiligaagaluarunik Erhvervs- og Selskabsstyrelsen-imi nalunaarsorsimasussaapput. Tassanngaanniit pissavaat CVR-nummer (CVR: Suliffeqarfiit qitiusumiit nalunaarsorneqarfiat). Tamatuma saniatigut Grønlands Ervhervs Register-imi (GER) nalunaarsorneqarsimasussaapput.

Suliffeqarfinni nammineq pigisani illit piginneqateqarsimaguit piginneqatitillu tamassi pigisasi nalillit tamaasa ilanngullugit akisussaavusi. Tamatuma kingunerissavaa, soorlu nammineq sipaakkat namminerluunniit illugisaq akiliutigineqarsinnaammata suliffeqarfik amigartooruteqarluni matusariaqalissappat.

Suliffeqarfiup nammineq pigisatut aallartinnerani pitsaaqutaavoq allanit aningaasaliiffigisariaqanngimmat.

Suliffeqarfiit nammineq pigisat assigiinngitsut pingasuupput: Suliffeqarfik kisimiilluni pigisaq, soqutigisaqaqatigiit ingerlatseqatigiiffiat (interessentskab) aamma ingerlatseqatigiiffik tassunga aningaasaleeqataassutaannarminnik annaasaqarfigisinnaasaat (kommanditselskab).


Suliffeqarfik kisimiilluni pigisaq
Suliffeqarfimmi kisimiillutit pigisanni pigisatit nalillit tamaasa akiliutissarissavatit.

Suliffeqarfiit kisimiilluni pigisat ataasiinnarmik piginnittoqarput immaqalu aapparisaq (ikiortaappat) ilanngullugu.

Suliffeqarfimmik kisimiilluni pigisamik pilersitsineq akeqanngilaq.


Soqutigisaqaqatigiit ingerlatseqatigiiffiat (Interessentskab (I/S))
Soqutigisaqaqatigiit ataasiakkaat ataasiakkaarlutik tamarmik pigisatik nalillit tamaasa suliffeqarfiup akiitsuinut tamanut akileeqataassutigisussaavaat.

Soqutigisaqaqatigit ingerlatseqatigiiffianni marluk amerlanerilluunniit piginnittuusarput. Piginnittuusut tassaasinnaapput inuit ataasiakkaat aamma/imaluunniit suliffeqarfiit.

Soqutigisaqaqatigiit ingerlatseqatigiiffiannik pilersitsineq akeqanngilaq.

Soqutigisaqaqatigiit ingerlatseqatigiiffiat immini akileraartussaanngilaq, peqataasulli ataasiakkaat akileraartussaapput akileraarutissanut nalunaarsorneqarnertik malillugu. Taamaattoq toqqarneqarsinnaavoq suliffeqarfiup aaqqissugaanera iluanaarutilluunniit aaqqissugaanerat malillugu akileraartinneqarnissaq.


Kommanditselskab (K/S)
Kommanditselskab assigiinngitsunik marlunnik piginnittoqarpoq: Pigisaqavissut piginneqataasullu.

Pigisaqavissoq nammineq killiligaanngitsumik akiliisussaatitaavoq. Pigisaqavissut arlaqarunik naligiimmik akiliisussaatitaapput.

Piginneqataasut aningaasaleeqataassutitik kisiisa akileeqataassutigisinnaavaat, annerusumik pisussaaffilersimanngikkunik soorlu akiliisussamaatitut.

Peqataasut tassaasinnaapput inuit ataasiakkaat aamma/imaluunniit ingerlatseqatigiiffiit. Pigisaqavissut tassaagajuttarput A/S imaluunniit ApS.

Kommanditselskab-iliorneq akeqanngilaq.

Pigisaqavissoq ingerlatseqatigiiffik sinnerlugu aqutsisuuvoq. Pigisaqavissut arlaqarunik aalajangiinerni isumaqatigiittariaqarput. Piginneqataasut taamaallaat aqutseqataasinnaapput tamanna immikkut isumaqatigiissutigineqarsimappat.

Pigisaqavissoq ingerlatseqatigiiffiusimappat kommanditselskab-i siulersuisoqassaaq.

Kommanditselskab-i immini akileraartussaatitaanngilaq. Isertitat aningaasatigullu sillimmatit pigisaqavissunit piginneqataasunillu akileraarutaasarput.

Kommanditselskab-i suliffeqarfiup aallartinnerani pitsaaqutaasinnaavoq pilersitsisoq pigisaqavissutut ApS-imut aningaasaliisinnaammat, tamatumuunakkut ingerlatseqatigiiffiup aningaasaataanut akisussaaneq minnerpaamik 125.000 kruuninut killilerneqarsinnaalluni. Tamatuma kinguneranik piginneqataasuuguit amigartoorutaajunnartut isertitannit allanit ilanngaatigalugit akileraarutissannut ilanngaatigisinnaassavatit.

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl