Annikitsumik misissuineq piiaanerlu – Nalinginnaasumik paasissutissiineq qinnuteqarnerlu

Annikitsumik misissuineq piiaanerlu – Nalinginnaasumik paasissutissiineq qinnuteqarnerlu 

Inatsisartut kissaatigaat sumiiffinni ujaqqanik pinnersaasiassanik aatsitassanillu annikitsumik atuinermik inuussutissarsiorsinnaanerup tapersersorneqarnissaa. Taamaattumik annikitsumik misissuineq aamma annikitsumik piiaaneq pillugit erseqqissunik malittarisassiortoqarpoq.

Annikitsumik misissuinissamut piiaanissamullu pisinnaatitsissutit Kalaallit Nunaanni aalajangersimasumik najugaqartunut atuuppoq. Sumiiffinni aalajangersimasuni annikitsumik misissuinissamut piiaanissamullu pisinnaatitsissutit assigiinngitsunik akuersissutitaqarput; katersisinnaaneq, suliareqqitassanngorlugu piiaaneq aamma ujaqqanik pinnersaatinik ujaqqanillu allanik tuniniaaneq.

Pisinnaatitsissutit
Annikitsumik misissuinissamut piiaanissamullu pisinnaatitsissutit assigiinngitsut marluupput:
  • Kisermaassilluni pisinnaatitsissut
  • Allanik peqateqarluni pisinnaatitsissut kisermaassisinnaatitaanani

Piumasaqaatit
Annikitsumik misissuisinnaanermut piiaasinnaanermullu pisinnaatitsissutit inunnut ataasiakkaanut kisiat tunniunneqassapput, suliffeqarfinnuunngitsoq.

Annikitsumik misissuisinnaanermut piiaasinnaanermullu pisinnaatitsissummik piniaruit, ikinnerpaamik ukiuni tallimani Kalaallit Nunaanni najugaqarsimassaatit akileraartussaatitaallutillu. Malittarisassamit tassannga immikkut pineqarnissat qinnutigisinnaavat, Kalaallit Nunaat qimakkallarlugu soorlu ilinniarnermut tunngatillugu aallaqqasimaguit.

Inuk ataaseq annikitsumik misissuinissamut pisinnaatitsissutit tallimat sinnerlugit ukiup ataatsip iluani pigisaqarsinnaanngilaq. Tassani pineqarput allanik peqateqarluni pisinnaatitsissutit kisermaassisinnaatitaanani aamma kisermaassilluni pisinnaatitsissutit. Tamanna assersuutigalugu isumaqarpoq allanik peqateqarluni pisinnaatitsissutinik kisermaassisinnaatitaanani marlunnik aamma kisermaassilluni pisinnaatitsissutinik pingasunik pigisaqartoqarsinnaasoq.

Qinnuteqarneq
Allanik peqateqarluni kisermaassisinnaatitaanani aamma imaluunniit kisermaassilluni pisinnaatitsissutinik qinnuteqarniaruit imaaliussaatit:
  • qinnuteqarnermi nalunaarsorneqarnermillu akiliut akilerneqassaaq. Akiliutissap angissusaa aamma konto akiliiffissaq qinnuteqarfimmi allassimapput
  • qinnuteqaat immersorneqassaaq

Annikitsumik misissuineq piiaanerlu kisermaassilluni

Annikitsumik misissuineq piiaanerlu allanik peqateqarluni kisermaassisinnaatitaanani

Ajornanngippat qinnuteqarfissamut immersugassaq elektronisk-iusoq immersoruk.

Qinnuteqaammut uppernarsaatit makku ilanngunneqassapput
  • ukiuni tallimani qaangiuttuni Kalaallit Nunaanni aalajangersimasumik najugaqarsimanermut uppernarsaat
  • ukiuni tallimani qaangiuttuni Kalaallit Nunaanni akileraartussaatitaanermut uppernarsaat
  • qinnuteqarnermi nalunaarsorneqarnermilu akiliutissamik akiliisimanermut uppernarsaat

Uppernarsaatit kommunip allaffiini aamma Akileraartarnermut Aqutsisoqarfimmi pissarsiarineqassapput.

Piiaaneq aamma tuniniaaneq
Aatsitassanik akisuunik (diamantit, safirit, rubinit, smaragd-it, chrysoberyl-it, opal-it) piiaaniaruit tuniniaarusukkuillu sumiiffimmut piiaaffiusussatut kissaatigineqartumut kisermaassisinnaatitaaffeqarluni annikitsumik aatsitassarsiornissamut akuersissummik aamma § 38 naapertorlugu akuersissummik qinnuteqassaatit. § 38 naapertorlugu akuersissut piiaanissamut matusinissamullu pilersaarusianut tunngasuuvoq.

§ 38 naapertorlugu akuersissut qinnutigineqarsinnaavoq qinnuteqarnermut allaffissiat ataani taaneqartut immersorlugit.

Piiaanissamut pilersaarut (ilanngussaq 5)

Matusinissamut pilersaarut (ilanngussaq 6)

Ukiumoortumik nalunaarusiaq
Annikitsumik aatsitassarsiornissamik akuersissummik peqaruit ukiummoortumik nalunaarusiamik nassiussisassaatit. Ukiumoortumik nalunaarusiami allaaserineqassapput ukiup pineqartup ingerlanerani suliniutit suut ingerlanneqarsimanersut, ujarassiornikkut nutaamik ilisimasaqalersimaguit misilittakkatit ilanngullugit allaaserissavatit. Aatsitassat piiarneqartut annertussusaat pitsaassusaallu kiisalu taakkua suliarineqarnerannut tunineqarnerannut avammullu tunineqarnerannullu paasissutissat ilanngunneqassapput.

Ukiummoortumik nalunaarusiaq uuma ataani nassaarisinnaavat:

Ukiummoortumik nalunaarusiaq (ilanngussaq 8)

Qinnuteqaat ilanngussallu sapinngisamik e-mail-inngorlugu Aatsitassanut Ikummatissanullu Aqutsisoqarfimmut nassiunneqarnissaa kissaatigineqarpoq

Malugiuk
Qinnuteqaasiorninni imaluunniit annikitsumik misissuinissamut piiaanissamullu akuersissummut tunngasumik apeqqutissaqaruit, Aatsitassanut Ikummatissanullu Aqutsisoqarfimmut saaffiginninnissannut tikilluaqqusaavutit.

Allaaserisat attuumassutillit

Aatsitassanut Ikummatissanullu Naalakkersuisoqarfik
Postboks 930
3900 Nuuk

Oqarasuaat: (+299) 34 68 00
Fax: (+299) 32 43 02
E-mail: mmr@nanoq.gl
Nittartagaq: www.naalakkersuisut.gl
Aatsitassanut Ikummatissanullu Aqutsisoqarfik
Postboks 930
3900 Nuuk

Oqarasuaat: (+299) 34 68 00
E-mail: mlsa@nanoq.gl
Nittartagaq: www.naalakkersuisut.gl