Narsaq

Narsaq 

Peqqaataani asimioqarfik ”Narsatoqaq” illoqarfiup avannamut kitaaniippoq. Soorlu illoqarfiup aqqata nammineerluni ersersereeraa Narsaq narsaamanersuarmiippoq kangerlunnit qaqqanillu unguneqarsimasoq – Qaqqarsuaq 685 meterinik portutigisoq ilisarnaataalluartuuvoq.

1880-sikkut nalaani niuertarfiliortoqarpoq, kangerluullu qinnguani Kuukasiup akuata eqqaani talittarfiliortoqarluni, taanna illoqarfiup qiterilerpaa, piffissap ingerlanerani talittarfiup kangiani kingusinnerusukkullu avannaani illoqarfik pinngoriartorpoq.
1949-mi Kuukasiup kujataani illoqarfiup immikkoortua nutaaq sanaartorfigalugu aallartinneqarpoq toqoraavittalik aalisakkerivittalillu Saqqannguup imartaata sinaani.

Illoqarfiup ineriartornerata nassatarisaanik illoqarfiup qeqqa Kuukasiup akuaniit maanna Niels Bohrs Pladsip eqqaanut inigisaminut nuunneqarpoq. Kingusinnerusukkut illoqarfik Aaninnguanut oqaluffiullu tunuani narsaviarsuup avannaanut alliartuaartinneqalerpoq.

Narsaq ullutsinni nerisassanik suliaqarnermi kujataani qitiusumik inissisimavoq inuussutissalerinermik ilinniarfik Inuili tassaniippoq, aalisakkeriveqarpoq nersutinullu toqoraaveqarluni. Aamma illoqarfiup avatinnguani aatsitassarsiorfiusinnaasut pillugit annertuumik misissuinerit ingerlanneqarput. 2015-imi juulip aallaqqaataani innuttaasut katillutik 1522-upput.