Qaqortoq

Qaqortoq 

Niuertoqarfik "Julianes Haab" 1775-imi niuertumit Anders Olsenimit tunngavilerneqarpoq. Kuup akuani eqqaani kangerlunnguaq illuliorfigineqarpoq ullumikkullu illoqarfiup qiteralugu.

1935 tikivillugu illoqarfik kuup akuata qoorortaaniiginnarpoq. Kingusinnerusukkut kuup sinai sivinganerit atuarlugit illoqarfik alliartulerpoq. Ullumikkut Qaqortoq Kujataani illoqarfiit pingasuusut annersaraat, soorlumi oqaluttuarisaanerup ingerlanerani taamaattuarsimasoq. Qaqortoq 2015-imi juulip aallaqqaataani katillugit 3119-inik innuttaqarpoq.

Qaqortumi inuussutissarsiortut umiarsualiviup eqqaanut, aalisarnermut tunngasunik suliaqarfiusumut, Great Greenlandip ammeriviata mersortarfiatalu inigisaanut kiisalu sanaatornermut tunngasunik suliffeqarfiit angisuut inissisimaffigisaannut annermik eqitersimapput. Aamma Qaqortoq kommunip allaffissorneranut kiffartuussineranullu qitiusoqarfittut atuuppoq, taakkununnga ilanngullugit taaneqarsinnaallutik nunap immikkoortortaani napparsimmavik, ilinniarnertuunngorniarfik, niuernermik ilinniarfik aamma højskoli.