Pilersaarusiornermut pisortamik

Kalaallit Nunaanni kommune kujallersaat, Kommune Kujalleq, nutaamik Pilersaarusiornermut Pisortassarsiorpoq maannamut pilersaarusiornermut pisortarisimasarput ukiut 10 missaanni sulereerluni soraarninngortussanngormat.
Kingusinnerpaamik ulloq:
23. september 2016
Sumiiffik / immikkoortortaq:
Qaqortoq
Sivisussusaa:
Ataavartumik sulisussaq
Ulloq sulilerfissaq:
1. oktober 2016
Aningaasarsiat:
Isumaqatigiissutit atuuttut naapertorlugit

Pingaarnerpaatut makku suliassarisassavatit: 

Pilersaarusiornermut pisortaq kommunip pilersaarusiorneqarneranut allaffissornikkullu suliassanut tassunga atasunut akisussaavoq. Taamaammat pilersaarusiortutut suliassat kiisalu innuttaasunut attaveqarnerit naatsorsuutigisariaqarput. Piffissami pilersaarusiorfiusussami suliassat taaneqarsinnaasut tassaapput:

- Narsap Qaqortullu akornanni mittarfiliorneq, kiisalu ineriartornikkut periarfissat tassunga atasut,
- Kommune Kujallermi UNESCO-p silarsuarmiunut kingornutassiaqafissaanik inassuteqarneq,
- inuussutissarsiorfissanik nutaanik ineriartortitsineq,
- nunaqarfiit illoqarfiillu akornanni aqquserniortiterneq,
- aatsitassarsiorfinnik annerusunik inuussutissarsiutinillu allanik naleqqussaaneq, kiisalu
- illoqarfinnik nunaqarfinnillu ineriartortitsinermi periusissiat.

Pilersaarusiornermut pisortaq aaqqissugaanikkut Qaqortumi Teknikkeqarfimmi inissisimavoq, kisiannili kommunimi ingerlatsivinnik tamanik suleqateqartarpoq kiisalu illoqarfinni pingasuni nunaqarfinnilu 11-ini tamani suliassaqartarluni. Taamaammat kommunimi angalangaatsiartarnissaq naatsorsuutigisariaqarpoq.

Suliassat saniatigut Kujataani atorfeqarnermi aamma inuuniarnermi atugassarititaasut immikkuullareqisut atugassaapput:
- Illoqarfiit angivallaarujussuanngitsut "kikkut tamarmik ilisarisimaqatigiiffii"
- illoqarfinni avatangiisit oqaluttuarisaanikkut, qalipaatimikkut, timersornikkut kulturikkullu immikkuullarissut,
- pinngortitaq imaaliinaq tikitassaq
- angalaarnermut, aliikkutaralugu aalisarnermut, qajartornermut, sermersuarmi angalaarnermut allanullu periarfissalik

Pilersaarusiornermi suliassat tamakku imaluunniit inuttut periarfissat pilerigilluinnarukkkit immaqa pisortartaarisinnaaruttoritsigit?

Pilersaarusiornermi pisortatut pilersaarusiornermi naleqquttumik tunuliaqutaqassaatit aammalu siunnersuisarfinnit, pisortanit atorfeqarninnit misilittagaqaruit kiisalu inuiaqatigiit kalaallit pillugit ilisimasaqaruit iluaqutaassaaq. Naatsorsuutigaarput namminersorlutit aaqqissuulluakkamillu sulisinnaasutit kiisalu qarasaasiatigut atortut (allaatit, AutoCad imaluunniit GIS) atuisutut nalinginnaasutut atorsinnaagitit.

Innuttaasunut attaveqarneq eqqarsaatigalugu qinnuteqartut kalaallisut kiisalu danskisullu pigiinnaasaqarluartut salliutinneqassapput, tamatumalu saniatigut tuluttut oqaatsit qaffasissumik atorsinnaanissaat naatsorsuutigineqarpoq.

Naalakkerusisut aammalu sulisunngortussap kattuffiata isumaqatigiissutaat naapertorlugit atorfinitsitsisoqarluni akissarsiaqartitsisoqassaaq.

Inissaqartitsisoqarsinnaavoq malittarisassat qaqugukkulluunniit atuuttut malillugit sillimmatinut ineqarnermullu akilerneqartartussamik, aammattaaq atorfininninnermi angalanermut kiisalu minnerpaamik ukiut pingasut atorfeqareernermi malittarisassat atuuttut malillugit akiliussisoqartassaaq.

Atorfik pillugu sukumiinerusumik paasisaqarusukkuit Teknikkimut pisortaq Leif Baadh oqarasuaat +299 70 41 00, lokal nr. 5400 atorlugu paasiniaaffigisinnaavat, imaluunniit mailikkut: lewb@kujalleq.gl .

Qinnuteqarfissaq kingulleq 

Qinnuteqaat ilinniagarisimasanik, siusinnerusukkut suliffigisimasanik kiisalu ilaqutariit amerlassusiinik paasissutissartalik, soraarummeernermut uppernarsaatinik immaqalu oqaaseqaatinik ilalik kingusinnerpaamik 23. september 2016 kommunimit tiguneqareersimassaaq.
Qinnuteqaat uunga nassiunneqassaaq:

Kommune Kujalleq, HR-afdelingen, Postboks 514, 3920 Qaqortoq

Qinnuteqaat aamma faxerneqarsinnaavoq: 70 41 77 imaluunniit e-mail job@kujalleq.gl.

Kommune Kujalliup nittartagaani paasissutissanik sukumiinerusunik ujarlersinnaavutit: www.kujalleq.gl.