Ukioq 2016 atuarfeqarnerup ukiuatut Kommune Kujallermiit nalunaarutigineqarpoq

Kommunalbestyrelsi 2015-imi kingullermeerluni ataatsimiinnermini ukioq 2016-iip "meeqqat atuarfiannut ukioritinneqarnissaanik" akuersissuteqarpoq.
"Ukioq manna kissaatigaarput angusat pitsanngorsarniarlugit meeqqat atuarfiat sukumiinerusumik sammineqalissasoq, aammalu aalajangiisarneq nukittorsarniarlugu Kommunalbestyrelsimi immikkut atuarfeqarnermut ataatsimiititalialiortoqalerpoq", borgmester Jørgen Wæver Johansen oqarpoq.
Benjamin Kielsen (Siumut), Kommune Kujallermi kommunalbestyrelsimi atuarfeqarnermut ataatsimiititaliap siulittaasua: "atuartut angusaat pitsanngorsarniarlugit sulissaagut tamatumanilu angajoqqaat, atuarfiit siulersuisui kiisalu ilinniartitsisut tamarmik akisussaaffimmik tiguseqataassapput.
Neriuppunga atuarfeqarnermut ataatsimiititaliaq atuarfeqarnermik ingerlatsivimmik atuarfinnilu pisortanik suleqateqarluni meeqqat atuarfiannik nukittunerulersitsissasoq. "

Kommunalbestyrelsimi Siumup ilaasortaatitai siunnersuuteqarput kommunip aaqqissugaanera allanngortinneqassasoq atuarfeqarnermut tunngasut Meeqqanut Kulturimullu Ataatsimiititaliamiit immikkoortillugit immikkut ataatsimiititaliuunneqassasut atuarfeqarnerup immikkut politikkikkut sammineqarnerulernissaa siunertaralugu.
Tamatuma peqatigisaanik Meeqqanut Kulturimullu Ataatsimiititaliaalersussap ilaasortai arfineq-marlunniit tallimanut ikilineqassapput, Atuarfeqarnermullu Ataatsimiititalianngortoq tallimanik ilaasortaqassalluni.

Ingerlatsiviup pisortaa ingerlatsiviit aaqqissugaanerannik allanngortitsinissaq pillugu nassuiaammik nassiussaqarpoq, tassanilu pingaartumik atuarfeqarneq, aammali kultureqarneq annertunerusumik ineriartortitsivigineqalissapput kiisalu ingerlatsiviup pisortaata aqutsisutut suliassavii aallunneqalissallutik.
Taamaammat atuarfeqarneq ineriartortinniarneqarpoq ilaatigut ilinniartitsisunik kajungilersitsinikkut atuarfiillu aqutsisuinik piginnaanngorsaanikkut.

Allannguineq aappassaaneerinninnermi akuersissutigineqarpoq, tamatumalu kingunerisaanik ataatsimiititaliami ima inissitsitertoqarpoq:
Atuarfeqarnermut Ataatsimiititaliaq tallimanik ilaasortalik sinniisulillu
Meeqqanut Kulturimullu Ataatsimiititaliaq tallimanik ilaasortalik sinniisulillu
Inuussutissarsiornermut Suliffeqarnermullu Ataatsimiititaliaq tallimanik ilaasortalik sinniisulillu
Teknikkimut Avatangiisinullu Ataatsimiititaliaq tallimanik ilaasortalik sinniisulillu
Isumaginninnermut Ataatsimiititaliaq tallimanik ilaasortalik sinniisulillu

Borgmester Jørgen Wæver Johansen ukioq aallarnerlugu illoqarfiit atuarfiinut pingasunut angalavoq ilinniartitsisullu suliassaat pingaarutilik pillugu oqaloqatigisarnissaat aallarnerlugu. Maannamut borgmesterip Narsap atuarfik pulaareersimalerpaa, qaammatillu naajartornerani Nanortalik tullinnguuteriarlugu Qaqortumi Tasersuup atuarfia naggataarutigissavaa.