Kommunimut qinersineq 2017

Nalunaarut

Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit Inatsisartut inatsisaanni nr. 27, 28. november 2016-imeersumi § 12 naapertorlugu matumuuna nalunaarutigineqassaaq ullormi 4. april 2017 nal. 9.00-miit nal. 20.00-mut kommunalbestyrelsimut, nunaqarfinni aqutsisunut kiisalu ilagiit sinniisaannut qinersisoqassammat.
24. januar 2017

Kommunalbestyrelsimut qinersineq:

Kommunalbestyrelsimut qinersinermut qinigassanngortittut kingusinnerpaamik 21. februar 2017 nal. 12.00 Qinersinermut siulersuisunut nalunaarutigineqareersimassapput.

 

Kommunalbestyrelsimut ilaasortat 15-it qinerneqassapput.

 

Qinigassanngortittut ataasiakkaarlutik, ataasiakkaarlutik kattusseqatigiillutik, imaluunniit partii qinigassanngortitsisinnaatitaasoq sinnerlugu qinigassanngortissinnaapput. Partiit qinigassanngortitsisinnaatitaasut avataatigut qinigassanngortittunik nalunaarutit qinersivimmi qinersisartunit minnerpaamik qulinit atsiorneqarsimassapput.

 

Kommunalbestyrelsimut qinersineq:

 Inatsisartut inatsisaanni nr. 27, 28. november 2016-imeersumi ima allassimasoqarpoq:

 

§ 1.  Kommunalbestyrelsimut qinersisinnaatitaavoq, taamaattorli tak. § 3, kinaluunniit ullormi qinersiffiusumi 18-inik ukioqalersimasoq qinersinissaq sioqqullugu sapaatip akunnerini arfinilinni kommunimi pineqartumi aalajangersimasumik najugaqarsimasoq, aammalu:
1) danskisut innuttaassuseqartoq aammalu qinersinissaq sioqqullugu sivikinnerpaamik qaammatini arfinilinni Kalaallit Nunaanni aalajangersimasumik najugaqarsimasoq, imaluunniit 
2) sivikinnerpaamik ukiuni pingasuni naalagaaffimmi najugaqarsimasoq qinersinissarlu sioqqullugu sivikinnerpaamik qaammatini arfinilinni Kalaallit Nunaanni aalajangersimasumik najugaqarsimasoq.


Imm. 2.
  Kalaallit Nunaanni aalajangersimasumik najugaqarneq pineqartillugu, tak. imm. 1, nr. 1 aamma nr. 2 Kalaallit Nunaata avataaniikkallartut aammattaaq § 2-mi ilaatinneqarput.


Imm. 3.
  Kommunalbestyrelsimut ilaasortaq kinaluunniit kommunalbestyrelsimut ilaasortaanerminut atatillugu nuna tamakkerlugu soqutigisaqaqatigiit kattuffiannut, kommunimi allami angerlarsimaffeqartumi, piffissaq tamaat siulittaasussatut toqqarneqartoq, kommunimi qimatamini taasisinnaatitaavoq.


§ 2.
 Inuit, Kalaallit Nunaata avataanii najugaqarallartut taakkulu inooqatigalugit aapparisaat imaluunniit inuit aallarnissartik sioqqullugu aappariinnermut assingusumik inooqatigiittut kommunalbestyrelsimut qinersisinnaanertik atatiinnarsinnaavaat, aalajangersimasumik najugaqarnissamik piumasaqaat eqqaassanngikkaanni § 1, imm. 1-imi piumasarineqartut naammassisimagunikkit, aamma
1) ilinniagaqarlutik Kalaallit Nunaata avataaniittut.
2) peqqinnissamut tunngasunik pissuteqarlutik Kalaallit Nunaata avataaniittut.
3) Kalaallit Nunaanni qinigaallutik folketingimi ilaasortatut suliaqarnerminnut atatillugu Danmarkimiittut.
4) Namminersorlutik Oqartussanut sinniisuullutik Kalaallit Nunaata avataaniittut.
5) Kalaallit Nunaata avataaniittut aammalu Kalaallit Nunaannut attuumassuteqarnikkut 1-4-mi taaneqartunut sanilliunneqarsinnaasut.

Imm. 2.
  Inuit imm. 1 naapertorlugu qinersisinnaanerminnik atatitsiinnarusuttut qinersisinnaasut allassimaffiannut tassunga allagartamut naleqquttumut Naalakkersuisunit atulersinneqartumut ilanngunneqarnissamik qinnuteqarsinnaapput.

Imm. 3.
  Taamaattoq inuit imm. 1-imi taaneqartut aatsaat nuunnginnerminni Kalaallit Nunaanni inuit aqqisa nalunaarsorsimaffianni nalunaarsorsimappata aamma sivikinnerpaamik katillugit ukiuni marlunni Kalaallit Nunaanni inuit aqqisa nalunaarsorsimaffiini allassimasimagunik qinersisinnaapput.

 

§ 3.  Inuit namminersorsinnaanermik inatsit naapertorlugu nammineersinnaajunnaarsitaasimasut qinersisinnaatitaanngillat.  

 

§ 4. Kinaluunniit qinersisussat allassimaffiannut ilanngunneqarsimatinnani qinersisinnaatitaanngilaq, tak. §§ 22-26.

 

§ 5.  Kommunalbestyrelsimut qinigaasinnaatitaavoq kinaluunniit § 1 imaluunniit § 2 naapertorlugit tassunga qinersisinnaatitaasoq, pineqartoq ukiut kingulliit tallimat ingerlaneranni inaarutaasumik eqqartuussinikkut akiliisitsissutissamilluunniit akuersinikkut pinerluttulerinermi inatsisit tunngavigalugit pineqaatissinneqarsimanngikkuni imaluunniit ukiut kingulliit pingasut ingerlaneranni pissutsimut nalinginnaasumik isigineqarnermi kommunalbestyrelsimut ilaasortaanissamut naleqqukkunnaarsitsisumik pinerluttulerinermi inatsisit tunngavigalugit pineqaatissinneqarsimanngikkuni. Piffissaliussat ullormit qinersivimmiit atuutissapput.

 

Imm. 2.  Taamaattoq kinaluunniit qinigassanngortissinnaavoq pinerluuteqarsimanermigut pineqaatissinneqarsimanini pissutigalugu qinigaasinnaannginnera pillugu akerliliisoqaraluarpalluunniit.

 

Nunaqarfinni aqutsisunut qinersineq:

Nunaqarfinni aqutsisunut qinersinermut qinigassanngortittut kingusinnerpaamik 21. marts 2017 nal. 12.00 Qinersinermut siulersuisunut nalunaarutigineqareersimassapput.

 

Narsarsuarmi, Qassiarsummi aammalu Igalikumi nunaqarfinni aqutsisunut ilaasortat pingasut qinerneqassapput, Qassimiuni, Eqalugaarsunni Saarlumilu nunaqarfimmi aqutsisunut ilaasortat pingasut, Alluitsup Paani Ammassivimmilu nunaqarfimmi aqutsisunut ilaasortat pingasut kiisalu Tasiusami, Narsarmijini aammalu Aappilattuni nunaqarfinni aqutsisunut ilaasortat pingasut qinerneqassallutik.

 

Qinigassanngortittut ataasiakkaarlutik, ataasiakkaarlutik kattusseqatigiillutik, imaluunniit partii qinigassanngortitsisinnaatitaasoq sinnerlugu qinigassanngortissinnaapput. Partiit qinigassanngortitsisinnaatitaasut avataatigut qinigassanngortittunik nalunaarutit qinersivimmi qinersisartunit minnerpaamik qulinit atsiorneqarsimassapput.

 

Nunaqarfinni aqutsisunut qinersisinnaatitaasut qinigaasinnaatitaasullu:

Inatsisartut inatsisaanni nr. 27, 28. november 2016-imeersumi ima allassimasoqarpoq:

 

§ 61.  Nunaqarfimmi aqutsisunut ataatsimoorussanut qinersisinnaatitaavoq kinaluunniit § 1 malillugu kommunalbestyrelsimut qinersisinnaatitaanermut piumasarisaasunik eqquutitsisoq, aammalu qinersinissaq kingusinnerpaamik ullunik 14-inik sioqqullugu nunaqarfimmi aalajangersimasumik najugaqarsimasoq kiisalu § 2-mi inuit taaneqartut.

 

Imm. 2.  Qinersinissaq ullunik 14-inik sioqqullugu qinersinermik siulersuisut suliarissavaat inuit ullormi qinersivissami qinersisinnaatitaallutik nunaqarfimmi najugallit allattorsimaffiat.

 

Imm. 3.  Qinersisussat allassimaffiat suliarineqarnermi kinguninngua ulluni marlunni nalinginnaasuni saqqumitinneqassaaq.

 

Imm. 4.  Inuk qinersisussat allassimaffiannut ilanngunneqarsimasoq qinersisussat allassimaffiata suliarineqareernerata kingorna nunaqarfiup avataani aalajangersimasumik najugaqalersimasoq qinersisussat allassimaffiannit peerneqassaaq.

 

Imm. 5.  Kinaluunniit qinersisussat allassimaffiannut ilanngunneqarsimatinnani qinersisinnaatitaanngilaq.

 

Imm. 6.   Qinersisussat allassimaffii pillugit aalajangersakkat §§ 22 - 26-mi maleruagassat pineqartut atorneqassapput.

 

§ 62.  Nunaqarfimmi aqutsisunut ataatsimoorussanut qinigaasinnaatitaavoq kinaluunniit § 61, imm. 1, tak. § 1, naapertorlugu tassunga qinersisinnaatitaasoq, qinersivimmilu kingusinnerpaamik ullut 14-it sioqqullugu aalajangersimasumik najugaqartoq, pineqartoq ukiut kingulliit tallimat ingerlaneranni inaarutaasumik eqqartuussinikkut akiliisitsissutissamilluunniit akuersinikkut pinerluttulerinermi inatsisit tunngavigalugit pineqaatissinneqarsimanngikkuni imaluunniit ukiut kingulliit pingasut ingerlaneranni pissutsimut nalinginnaasumik isigineqarnermi nunaqarfimmi aqutsisunut ilaasortaanissamut naleqqukkunnaarsitsisumik pinerluttulerinermi inatsisit tunngavigalugit pineqaatissinneqarsimanngikkuni.  Piffissaliussat ullormit qinersivimmiit atuutissapput.

Imm. 2.  Taamaattoq kinaluunniit qinigassanngortissinnaavoq pinerluuteqarsimanermigut pineqaatissinneqarsimanini pissutigalugu qinigaasinnaannginnera pillugu akerliliisoqaraluarpalluunniit


Ilagiit sinniisaannut qinersineq:

Ilagiit sinniisaannut qinersinermut qinigassanngortittut kingusinnerpaamik 7. marts 2017 nal. 12.00 Qinersinermut siulersuisunut nalunaarutigineqareersimassapput.

 

Ilagiit sinniisaat ima amerlassuseqartassapput:

 

Narsaq: 6, Igaliku: 3, Narsarsuaq: 3, Qassiarsuk: 3, Qaqortoq: 7, Saarloq: 3, Eqalugaarsuit: 3, Qassimiut: 3, Nanortalik: 5, Aappilattoq: 4 Narsaq Kujalleq: 3, Tasiusaq: 3, Ammassivik: 3, Alluitsup Paa: 4.

Ilagiit sinnisaannut qinigassanngortittut minnerpaamik inunnit tallimanit ilagiit sinnisaannut qinersisinnaatitaasunit innersuussutigineqarsimassapput.

 

Ilagiit sinnisaannut qinersinnaatitaasut:

Inatsisartut inatsisaanni nr. 27, 28. november 2016-imeersumi ima allassimasoqarpoq:

 

§ 68.  Kalaallit Nunaanni Ilagiinnut ilaasortat ilagiit sinniisaannut qinersisinnaatitaapput kommunalbestyrelsimut qinersisinnaanermut piumasaqaatit naammassisimagunikkit, tak. § 1 imaluunniit § 2-mi piumasaqaatit naammassineqarpata. 

Imm. 2.  Ilagiit sinniisaannut qinersineq kommunalbestyrelsimut qinersineq peqatigalugu pissaaq.

Imm. 3.  Kinaluunniit qinersisussat allassimaffiannut ilanngunneqarsimatinnani qinersisinnaatitaanngilaq.

Imm. 4.  Qinersisussat allassimaffii pillugit §§ 22 – 26-mi malittarisassat ilagiit sinniisaannut qinersinermi  aamma atorneqassapput. 

 

§ 69.  Immikkoortoq 3-mi taaneqartut eqqaassanngikkaanni ilagiit sinniisaannut kinaluunniit qinigaasinnaatitaavoq § 68, imm. 1, tak. § 1, naapertorlugu tassunga qinersisinnaatitaasoq, qinersivimmilu kingusinnerpaamik sapaatit akunneri arfinillit qinersinissaq sioqqullugu aalajangersimasumik najugaqartoq, pineqartoq ukiut kingulliit tallimat ingerlaneranni inaarutaasumik eqqartuussinikkut akiliisitsissutissamilluunniit akuersinikkut pinerluttulerinermi inatsit tunngavigalugit pineqaatissinneqarsimanngikkuni imaluunniit ukiut kingulliit pingasut ingerlaneranni pissutsimut nalinginnaasumik isigineqarnermi ilagiit sinniisaanni ilaasortaanissamut naleqqukkunnaarsitsisumik pinerluttulerinermi inatsisit tunngavigalugit pineqaatissinneqarsimanngikkuni.  Piffissaliussat ullormit qinersivimmiit atuutissapput.

 

Imm. 2.  Taamaattoq kinaluunniit qinigassanngortissinnaavoq pinerluuteqarsimanermigut pineqaatissinneqarsimanini pissutigalugu qinigaasinnaannginnera pillugu akerliliisoqaraluarpalluunniit.

Imm. 3.  Inuit Ilageeqarneq pillugu Inatsisartut inatsisaat naapertorlugu atorfitsik tunngavigalugu ilagiit sinniisaanni ilaasortaasut tassunga qinigaasinnaanngillat.

 

 

Tamanut atuuttut:

 

Kommunalbestyrelsimut, nunaqarfinni aqutsisunut kiisalu ilagiit sinnisaannut qinigassanngortittut nalunaarutigineqarnerannut immersuiffissat Narsami, Qaqortumi kiisalu Nanortalimmi kommunip allaffiini innuttaasunut sullissivinnut aammalu nunaqarfiit allaffiini tamanut saaffiginninnikkut pissarsiarineqarsinnaapput.

 

Qinersiviit qinersisitsisullu:

 

Illoqarfik /nunaqarfik:               Qinersivik:                                                                 Qinersisitsisoq

Narsaq                                        Katersortarfik                             

Igaliko                                         Nunaqarfiup allaffia                                              

Qassiarsuk                                  Nunaqarfiup allaffia                                              

Narsarsuaq                                  Nunaqarfiup allaffia                                              

Qaqortoq                                      Katersortarfik                             

Eqalugaarsuit                               Illu sullivik                                                                 

Saarloq                                         Atuarfik                                                                      

Qassimiut                                     Nunaqarfiup allaffia                                              

Nanortalik                                     Katersortarfik                             

Ammassivik                                  Nunaqarfiup allaffia                                              

Alluitsup Paa                                Illu sullivik                                                                 

Tasiusaq                                      Nunaqarfiup allaffia                                              

Narsaq Kujalleq                           Nunaqarfiup allaffia                                              

Aappilattoq                                  Nunaqarfiup allaffia                                              

 

Kommune Kujallermi qinersinermut siulersuisut

Qinersisinnaasut allattorsimaffianiikkumalluni qinnuteqarfissaq immersugassaq uani aanneqarsinnaavoq