Tusagassiuutitigut nalunaarut

Matumuuna nalunaarutigissavarput Kommune Kujallermi Kommunalbestyrelsemut qinigaaffimmi 2017-2021 Partii Siumut aamma Partii Atassut suleqatigiinnissamik isumaqatigiissusioratta. Tassungalu ilutigitillugu ilanngullugu nalunaarutigissavarput Inuit Ataqatigiit suleqatigiinnissamut peqataajumanatik nalunaarnerat tusaatissatut tigugatsigu.
12. april 2017

Suleqatigiinnissamut isumaqatigiissusiornitsinni qulequtaraarput: Piffinni tamani suleqatigiinneq aqqutigalugu Nunatta Kujataa inerisaqqissavarput!

Qineqqusaarnermi innuttaasut peqataatinneqarnerunissaminnik tusaaneqarnerunissaminnik aammalu sunniuteqaqataanerunissaminnik kissaateqarnerat tusaaniarlugu pingaartillugulu isumaqatigiissut ilusilersorparput.

Taamaalilluta innuttaasut inuussutissarsiornermillu ingerlataqartut peqatigalugit qanimullu suleqatigalugit Kommune Kujalliup aningaasaqarnikkut patajaatsumik inissisimanissaa, aningaasatigut nammineq napatinnissaa, inuussutissarsiornikkut  periarfissarissaarnissaa aammalu suliffissaaleqiffiunnginnissaa anguniassavarput.

Suleqatigiinnikkut anguneqassaaq Kommune Kujalleq najugaqarfigissallugu nuannersoq, ineriartortoq, suliffigissallugu orniginartoq, ilaqutariinnut toqqissisimanartoq, inuusuttortaminut piginnaanngorsaalluartoq, utoqqaliffigissallugulu kajungertartoq, tatiginartumik ingerlatsiffiusoq.

Tigussaasumik ilaatigut makku sulissutigineqassapput:

  • Akissaqartitsinerput naapertorlugu akileraarutip appartinneqarnissaa.
  • Nunaqarfinni Aqutsisut pisinnaatitaaffii annertusarniarneqassapput.
  • Nunap immikkoortuani nukittuffiit atorluarlugit imminut pilersorneq annertusarneqassaaq.
  • Kommune Kujalliup ilinniartoqarfittut inissisimanera siuarsaavigineqassaaq.
  • Nunamut tulaassisussaatitaaneq iluaqutigalugu aalisarneq suliffissuaqarnerlu inerisarneqassapput.
  • Neqi A/S ukioq naallugu tunisassiorsinnaalersarneqassaaq, ilaatigut umimmaat tuttullu tunineqarsinnaalernissaannik periarfissarsiuussinikkut.
  • Nunalerineq uumasuuteqarneq, aalisakkanillu tunisassiorneq siuarsaavigineqassapput, taamaalilluni naatitanik, kukkukuunik kukkukuullu manniinik, nersussuit, puulukit, puisillu neqaannik aalisakkanillu tunisassiorneq toqqammaviginiarneqassallutik.
  • Ilaasut inuussutissarsiornermillu ingerlataqartut eqqarsaatigalugit Qaqortup Narsallu akornanni mittarfissap piaartumik naammassineqarnissaa Naalakkersuisunut Inatsisartunullu tinnersaatigiuarneqassaaq, taamatuttaaq Narsami, Nanortalimmi Alluitsup Paanilu mittarfeerassat pilersaarutit malillugit naammassineqarnissaat sulissutigineqassaaq.
  • Takornariaqarnermik inuussutissarsiuteqarneq siuarsaavigineqassaaq, ilaatigut Destination South Greenland (DSG) qanimut suleqatigalugu nunaqavissut takornarialeriumallutik aallarnisaasut tapersersorneqassapput.
  • Aatsitassarsiornermik pilersaarutit siuarsaavigineqarnissaat sulissutigineqassaaq.
  • Kommunip ingerlatai namminersortunngorsarneqarsinnaasut namminersortunngorsarneqarnissaat sulissutigineqassaaq.
  • Pisortat suliffeqarfiutaat ingerlatsiviilu suliffissanik pilersitsisut amerlanerusut Kommune Kujallermut nussorneqarnissaat sulissutigineqassaaq.
  • Illoqarfinni tamani nunaqarfinnilu aqquserngit puttasuliallu aserfallatsaaliorneqassapput.
  • Nunaqarfinni illut sulliviit tulleriaarlugit iluarsartuunneqassapput.
  • Eqqagassalerineq, ikuallaaveqarneq, eqqakkanik immikkoortiterisarneq assartuisarnerlu tulleriaarinermi pingaartillugit siunnerfilimmik pilersaarusiorfigineqassapput.
  • Innuttaasut pisinnaasut angerlarsimaffigisaminnik namminneq piginnittuunissaat nangittumik siuarsaavigineqassaaq.
  • Sanaartornermi atortussiat nunatsinneersut atorluarneqarnerunissaat siuarsaavigineqassaaq.
  • Nukissiuutit ataavartut angerlarsimaffinni suliffeqarfinnilu nukissiuutigineqarnerat siuarsaavigineqassaaq.
  • Nunaqarfinni atuarfiit nutarteriffigineqarnerat nangittumik sulissutigineqassaaq.
  • Illoqarfinni tamani meeqqat atuarfiini isumaginninnermut siunnersorteqalissaaq.
  • Ilinniartitsisut nunaqarfinnut angalasartut pilersinniarneqassapput taamatuttaaq alimmasissumik atuartitsisarneq siuarsaavigineqassaaq.
  • Meeqqerivinni atuarfinnilu nerisaqarneq pillugu ersarissumik politikkeqartoqassaaq.
  • Kulturitsinnik tammatsaaliineq meeqqerivinni atuarfinnilu ilinniartitsissutigineqartassapput.
  • Meeqqerivimmiittuuteqarnermut akiliut apparsarneqartoq nanginneqassaaq, qinigaaffimmi matumani 1.000 kr.-inngortinneqassalluni.
  • Meeqqat nunaqarfinniit illoqarfinnut atuariartortartut atuariartunnginnerminni sungiusarluarneqartassapput.
  • Ilinniartut ilinniarnerminnut atatillugu sungiusarfeqarluarnissaat Kommune Kujalliup siuttuuffigissavaa.
  • 1. januar 2017-mi isumaginninnerup iluani pilersaarusiaq aaqqissuussaanerlu nutaaq naapertorlugu sullissineq ingerlanneqassaaq.
  • Meeqqanik sumiginnaaneq, kanngutsaatsuliornerit allatigullu atugarliortitsinerit suleqatigiinniit akuerineqanngilluinnarput, inatsisitigut illersugaasumik kiffartuusineq ingerlanneqassaaq.
  • Psykologinik aalajangersimasunik atorfinitsitsisoqassaaq taamatuttaaq Kommune Kujalleq tamakkerlugu angalasartunik.
  • Kommune Kujallermi ulloq unnuarlu angerlarsimaffimmik pisariaqartitsineq malillugu pilersitsisinnaanissaq aqqutissiuunneqassaaq.
  • Pitsaaliuineq, siusissukkut iliuuseqarnerit pinaveersaartitsinissallu ukiut tamaasa  pilersaaruteqarfigineqassapput. Attuumassutilit ataatsimiititaliallu suleqatigiillutik immersueqataassapput.
  • Innarluutilinnut pitsaanerusumik neqerooruteqarfiunerusumik, assigiissaagaanerusunillu kommuuni neqerooruteqartariaqartoq suleqatigiit isumaqarput.
  • Meeqqat diagnosillit piaarnerusumik sullinneqarlutillu aqqutissiuunneqartariqarput.
  • Illoqarfinni tamani Utoqqarnut siunnersorteqalissaaq.
  • Suliffissaaleqisut sulilerseqqinniarneqartut pillugit ataatsimiititaliat attuumassutillit suleqatigiillutik, politikkiliussapput.
  • Kulturi Kommune Kujallermi innuttaasut katinngatigissavaat.
  • Kulturip illorsuanik pilersitsisoqassaaq.
  • Kulturikkut, timersornikkut nipilersornikkullu suliallit isumasioqatigiisinneqassapput.
  • Peqatigiiffinnik pikkorissaanerit annertusarneqassapput
  • Piginnaanilittagut illoqarfinniit nunaqarfinniillu paarlaaqatigiittassapput.
  • Nipilersornikkut sungiusarfiusinnaasunik pilersitsisoqassaaq
  • kiisalu Savaateqarnermik nunalerinermik katersugaasivimmik pilersitsisoqassaaq.

Anguniakkatut taasassat suli ilaqaraluarput, taamaattorli taakku kingusinnerusukkut isumaqatigiissummi tamakkiisumi kingusinnerpaamik inissititernermut atatillugu saqqummiunneqartussami atuarneqarsinnaalissapput.

Suleqatigiilersugut assut nuannaarluta isumalluarlutalu sulilernissarput ilusilersorparput, ataatsimoorlutalu Borgmesterissarput katersuuffigaarput aammalu ataatsimiititaliani agguataarnissarput isumaqatigiissutigaarput.

Ilanngullugu nalunaarutigissavarput Kommune Kujallermi inuusuttortatta peqataanerat annerulersinniarlugu, inuunermik peqqinnartumik akisussaaqataanerup aqqani peqataanerat annertusaaviginiarlugu siunissaminnillu ilusilersuineranni timitalimmik tapersersorniarlugit ataatsimiititaliat ataavartut saniatigut inuusuttunut suliniaqatigiiffimmik pilersitsissagatta toqqaannartumik oqaluuserisassanik siunnersuuteqarsinnaanngikkaluarlutik innersuussuteqarsinnaasunik.

Kiisalu oqaatigissavarput soorunami Inuit Ataqatigiit suleqatigiinnissamut toqqaannartumik peqataajumanngikkaluartut inissaqartikkusukkatsigit, ilaatigut ataatsimiititaliami makitsiffiusussaagaluartumi inissilluarnissaat isumannaarniarsimallutigu, Inuit Ataqatigiillu apeqqutaaginnalerput neqeroorut tigorusussanerlugu aalajangernissaat.

Naggataatigut oqaatigissavarput Borgmesterinngortussaq ataatsimiititaliallu siulittaasoriligassai Kommune Kujallermi nunaqarfinnut illoqarfinnullu tamanut angalajumaarmata innuttaasunik oqaloqatiginninnissaq aammalu Kommunalbestyrelsip suliniutissai pillugit nassuiaanissaq siunertaralugit.

Suleqatigiinnissatsinnut isumalluarluta qilanaarlutalu,

inussiarnersumik inuulluaqqusilluta, 

Kîsta P. Isaksen                                                                                 Bentiaraq Ottosen 
Siumut                                                                                               Atassut