Tusagassiuutitigut nalunaarut: Arsaattarfiit ivigaasanik qallikkat

Narsami, Qaqortumi Nanortalimmilu arsaattarfiit ivigaasanik qallikkat sanaartorlugit aallartinneqarsinnaanngorput
28. juni 2017

Kommune Kujallermut innuttaanullu arsaannermik arsaattulerinermillu nuannarisaqartunut ullumikkut ulloq nuannersuuvoq, kommunimmi sivisuumik kissaatigisimavaa innuttaasuminut inuusuttunut allanullu isikkamik arsaannermik nuannarisalinnut periarfissarititaasut pitsanngorsarneqarnissaat, maannalu tamanna iluatsittussanngorpoq, borgmesteri Kiista P. Isaksen (S) nuannaarluni unnersiorpoq.

 

Kommunip arsaattarfinnik ivigaasanik qallikkanik Narsami, Qaqortumi Nanortalimmilu arsaattarfittaarnissaanut suliariumannittussarsiuussineq ullumi naammassineqarpoq. Suliariumannittussarsiuussinermi ajugaasuuvoq suliffeqarfik sanaartugassanik suliaqartartoq HEE Entreprise A/S, taassumalu naatsorsuutigaa sanaartorneq ukioq manna augustimi aallartissinnaassasoq.

 

Arsaattarfik siulleq ukioq manna naammassineqassangatinneqartoq tassaavoq Narsami arsaattarfissaq, tamatumalu kingorna tullissai sanaartorlugit aallartinneqassapput, naarsorsuutigineqarporlu ukioq manna aput takkutsinnagu tamarmik naammassineqarsinnaassasut.

 

Arsaattarfiit tamarmik arsaattarfinni pioreersuni sanaartorneqassapput 11-mandsbaninullu piumasaqaatinut tamarmik naammassinnissinnaasunngorlugit angissuseqartinneqassallutik. Taamaattorlu arsaattarfik Qaqortumiittoq sangutinneqarlunilu nikisinneqalaassaaq, taamaalilluni oqquunerulersinneqassalluni niggertarneranut (kujasik-kangisik) oqquunerusunngortinneqassalluni.

 

Sanaartornerup nalaani arsaattarfiit atorneqarsinnaassanngillat, kommunimiillu kissaatigineqarpoq atuisartut naammagittarlutik tamanna tigusinnaajumaaraat.

 

 

Sukumiinerusumik paasisaqarusuttut attavissaat:

Teknikkimut avatangiisunullu ingerlatsivimmi pisortaq Leif W. Baadh

Tlf. 64 54 00  - Mobil: 53 19 30 - e-mail: lewb@kujalleq.gl