Tusagassiuutitigut nalunaarut: Meeqqat tapersersorneqarnissaanut Inatsisartut inatsisissaata sapinngisamik pitsaanerpaamik timitalersorneqarnissaanut Kommune Kujalleq piareersarpoq

1. juni 2017-mi meeqqat ulluannut atatillugu aammalu ilaqutariit meerartallit toqqissisimasumik inuuneqarnissaminnut sinaakkutissaat pitsaanerpaatikkumallugit Kommune Kujallermit meeqqanut inuusuttunullu sullissinermi suliniutinik iliuutsinillu periarfissaq iluatsillugu kommune ersarissaateqalaarniarpoq.
1. juni 2017
Ilisimaneqartutut Kommune Kujalleq ukiuni kingullerni isumaginninnermik suliaqarnermini annertuumik eqqumaffigineqarpoq, matumani aamma Naalakkersuisunit. Nakkutilliiartortunit arlaleriarluni tikeraartoqarpoq aammalu nalunaarusiortoqarluni arlalitsigut kommunip meeqqanik sullissinera pillugu isorinnissutitaqartumik.

Kommune Kujallermit isertuunniarneqarnikuunngilaq isumaginninnikkut sullissinermut tunngatillugu ajornartorsiuteqarneq, naammattunik sulisussaqarniarnikkut ajornartorsiuteqarnermik aammalu aningaasatigut najummatsisimanerup kingunerisaanik sulisunik amerlanerusunik pissarsiniarsinnaanermut killeqarsimanera annertuumik pissutaaqataasimasut, pingaartumik meeqqanik inuusuttunillu sullissineq eqqorneqarsimalluni. Kommunilli aningaasatigut najummatsisimanartorsiornera 2015-mi 2016-milu anigorneqarpoq, kommunalbestyrelsillu aalajangiuppaa aningaasatigut nukittunerulerneq sulisussaqarniarnikkut sulisullu pigiinnarnissaannut ajornartorsiutinik aaqqiiniartoqassasoq, tassunga ilangullugu inunnik isumaginninnermut sullissiviup atorfilittai 70 procentimik amerleriartinneqassasut, taakkunannga amerlanerpaat meeqqanik inuusuttunillu sullissisut ilaneqarnissaannik siunnerfeqartoqarluni.

- Naliliivunga Kommune Kujallermi inunnik isumaginnittoqarfik ilaqutariinnik meerartalinnik sullissinissamut maanna nukissaqarluartoq, tamannali naammanngilaq – siunnerfeqaqqissaarluta pinaveersaartitsinermik suliaqarneq annertusassavarput. Annertusaanikkut siusissukkut iliuuseqarneq nukittorsarneqassaaq, taamaaliornikkut meeqqanik angerlarsimaffiup avataanut inissiisariaqartarnerup annikillisaavigineqarneranik inerneqarniartussaavoq. Tamatumalu ilutigisaanik isumaginninnikkut ajornartorsiutit qiterisai immikkut aallunneqassapput, tassalu imigassanik aalakoornartulinnik aammalu ikiaroornartumik atornerluisoqarnera, ajornartorsiutit taakkorpiaat ajoraluartumik ilaqutariinni amerlavallaani atugaapput. Taamatulli oqareerlunga erseqqissaatigissavara meeqqaanut tunngasunik pisortat akuliullutik suliaqartariaqartarnerat iluatsittumik annikillisarneqassappat, angajoqaat ajornartorsiulernerminni sapinngisamik siusissumik ikiorneqarnissaminnik ujartuisarnissaat aalajangiisooqataalluinnarmat - ajornartorsiornermullu atornerluisuuneq qitiusimappat - atornerluisuuneq nassuerutigalugu inuunermik allannguerusussasut, aammalu ikiortissarsiorneq sapinngisamik pisassasoq ilaqutariit toqqissisimasumik inuuneqarnissaannut tunngaviit innarlerneqarnissaannut aarlerinartorsiornerup annertusinnginnerani, Kommune Kujallermi borgmesteri Kiista P. Isaksen (S) oqarpoq.

Inunnik isumaginninnermut tunngatillugu Namminersorlutik Oqartussat tapertaalluarnerat kommunip iluaqutigilluarpaa. Ilaatigut tamatuma malitsigisaanik december 2016-mi isumasioqatigiittoqarpoq, isumasioqatigiinnermi qitiutinneqarluni meeqqanut tunngatillugu inunnik isumaginnittoqarfiup sullissisarnera aammalu suliassaqarfiit akimorlugit suleqatigiittarneq, isumasioqatigiinnerullu malitsigisaanik suleqatigiissitanik arlalissuarnik pilersitsisoqarpoq, taakkulu suliassaralugu suliassaqarfiit akimorlugit meeqqanik inuusuttunillu sullissinerup nukittorsarneqarnissaa.

Suleqatigiissitat makkuninnga suliassaqarlutik sulipput:

1. Suliassaqarfiit akimorlugit suleqatigiinneq – Suleriaatsit/siunnersuisarneq
2. Attaveqaqatigiit ataatsimiittarneri – isumakuluuteqarnissamut uuttuutit periaatsimut ilaatinnissaat
3. Suleriaatsit – ilaqutariinnut sullissivimmut innersuussisarneq
4. Nunaqarfiit
5. Angajoqqaarsiat/kommunip nakkutiginnittarnera/ sulisussaqarneq /pikkorissartarnerit/sulianik ineriartortitsinermi isumasioqateqartarnerit (supervision) il.il.
6. Suliassaqarfimmi piginnaasat ineriartortinneqarneri – ilinniarneq/pikkorissarnerit
7. Nalunaaruteqartarneq – periaatsit il.il.

Piffissami 22. aamma 23. maj 2017 Namminersorlutik Oqartussat Qitiusumik Siunnersuisarfiata, ilaatigut immikkut siunnersortimit Andu S. Olsen-imit siulersorneqartumik Kommunip aammalu Namminersorlutik Oqartussat sulisui, toqqaannartumik meeqqanik sullissinermut attuumassuteqartut isumasioqatigiissippaat, tassani suleqatigiissitat suliaannik malitseqartitsilluni aammalu suliassaqarfiit akimorlugit suleqatigiittarneq pillugit isumasioqatigiinneq ingerlanneqarluni.

- Naak massa unammilligassasi annertugaluaqisut, sulinersi eqqortumik ingerlavoq. Isumaqarpunga isumasioqatigiinneq iluatsilluartoq, suleqatigiissitat sulilluarsimaqaat, isumasioqatigiinnermilu peqataasut akunnissinni suleqatigiinnersi assut kusanarpoq. Peqatigalusi assut qiimmassimaarnarpoq ilorrisimaarnarlunilu aammalu decemberimut sanilliullugu allaaneroqaaq. Takusinnaavara tusaasinnaallugulu akunnissinni suleqatigiinneq aammalu avataaneersunik suleqateqarnersi pitsanngoriangaatsiarsimasoq, taamatuttaaq inunnik isumaginninnermut sullissivimmi aaqqissugaanissi pitsaasup tungaanut saatinnissaanik sulissutiginnilluarsimavusi. Taamaammat sulinersi annertooq pillugu pilluaritsi, immikkut siunnersorti Andu S. Olsen isumasioqatigiinnerup kingorna inerniliilluni oqarpoq.

Immikkulli suliniutit tassunga killissanngillat. Pilersaarutaavormi ukioq manna kingusinnerusukkut malitseqartitsilluni isumasioqatigiittoqaqqissasoq, tamatumuuna qinikkat peqataassallutik, siunnerfigneqarpormi Kommune Kujalleq siunissami, meeqqat tapersersorneqarnissaannut Inatsisartut inatsisaat atuutsinneqartussanngorlugu aalajangiunneqareerpat, meeqqanut inuusuttunullu ataqatigiisumik kommune politikkissaminik ilusiliissasoq, matumani ilanngullugit pinaveersaartitsinermik suliaqartut malitassaminnik upalungaarsussasut, meeqqat sumiginnarneqartillugit siusissukkut ilisimasaqalerneq aammalu sullissineq ingerlanneqartassasoq, taamatuttaaq meeqqat inuusuttuaqqallu 15-it 18-illu akornanni ukiullit tigusarineqarsimatillugit isumannaallisakkamik angerlarsimaffiup avataani angerlarsimaffimmiluunniit eqqartuussisoqarnermi inatsisit malillugit tigummigallarneqarfigisassaannik isumannaarinninnissaq.

- Maannangaaq malussarniarnarpoq, suliassat matumani eqqartorneqartut ilaat assorsuaq unamminassasut Nunatsinni kommunit minnersaannut, innuttaqassutsimigut unammillernartumik inissisimareersumut aammalu sulisussanik pissarsiniartarnerup sulisullu pioreersut aalaakkaasutinniarnerinut unammilligassaqareeqisumut, taamaattorli inunnik isumaginninnermut ingerlatsiviup kommunalbestyrelsemit eqeersimaarfigineqarnera tusaaniarneqarneralu annertuvoq, taamaammat unammilligassat pioreersut takkukkaluttuartullu sillimaffigilluarpavut, inunnik isumaginnittoqarfimmi pisortaagallartoq, Peter Sonberg oqarpoq.

Kommunalbestyrelsi Kommune Kujallerlu tamaat sinnerlugu Borgmester Kiista P. Isaksen (S) meeqqanik ilaqutaannillu kissaassivoq 1. juni 2017-mi meeqqat ulluanni ullorsiorluarumaartut.