Aatsitassarsiornerup annertusinissaanut Kommune Kujalleq piareersarpoq aatsitassanik ujarlernermik pikkorissaalluni

Kommune Kujalleq aatsitassaqarfiuvoq aatsitassarsiorfissatullu periarfissarissaarluni. Ukiut qulit kingulliit ingerlanerini aatsitassaqarfiit angisoorsuit pingasut nassaarineqarsimapput. Innuttaasut nunap immikkoortuani najugaqartut aatsitassarsiortoqarsinnaaneranik sulissutiginninnermut annertuumik soqutiginnipput. Amerlasuut Nalunaq Gold Minemi sulisimanertik aqqutigalugu misilittagaqarluarput taamatuttaaq Aatsitassanut Ilinniarfimmi pikkorissartartut ilarpassui Kommune Kujallermeersuusarput.
8. juni 2017

Naak massa periarfissat annertugaluaqisut ukiuni arlalissuarni aatsitassarsiornermik ingerlataqarneq annikilliartornikuuvoq, taamaattorli piffissami matumani annertusiartoqqilerpoq, Kommune Kujallermillu naatsorsuutigineqarmat ukiuni aggertuni timitalimmik aatsitassarsiornissamik ingerlatsisoqaqqilissasoq, kommunip kissaatini malillugu, tassalu sulisussat nunaqavissut atorluarneqarnissaat pillugu kommune piareersaasiulerpoq.

 

Piffissap imaalinerani ilimanaateqarpoq, kuultisiorneq aammalu aqerluusassarsiorneq aallartissinnaanngungajalersut. Siunissamilu naatsorsuutigineqarpoq saffiugassat, soorlu nikkeli, kanngussat aammalu zinki sumiissusersiorneqalissasut.

 

Aatsitassarsiornermik suliaqarnerit annertusinissaat tunngavigalugit Kommune Kujalleq sapaatip akunneri arlallit qaangiuppata aatsitassarsiornermik ingerlatseqatigiiffiit sulisussaannik piareersaaniarluni ujarlernermik, misiliutissanik katersinermik aammalu aatsitassarsiornermik suliaqarnermi pisariaqartinneqartut allat piareersimaffigilluarneqaqqullugit pikkorissaalerpoq.

 

Aatsitassanik ujarlernermik pikkorissarnerit Nanortalimmi, Qaqortumi aammalu Narsami aallaaveqartinneqassapput, siunertarineqarpoq pikkorissartut 27-iussasut taakkulu holdinut pingasunut agguarneqarsimassallutik. Pikkorissarnissamut peqataanissamut nalunaarneq 15. juni killeqartinneqarpoq pikkorissarnerlu 22. juni 2017 aallartinneqassalluni.

  • Pikkorissaaniarnerput aatsitassarsiornermik ingerlatseqatigiiffinnit ilassilluarneqarpoq. Nunaqavissut aatsitaassarsiornermi ikiortigissallugit soqutigineqarluarpoq maannakkuinnaanngitsoq aammali ukiuni aggersuni. Ujarassiuut misiliutissanik assigiinngisitaartunik katersinissaminnut ikiortissaminnik atorfissaqartitsipput, amerlasuutigullu sumiiffinni tikikkuminaassinnaasuni suliaqartartussaapput. Aatsitassanik ujarlernissamik pikkorissartitsinerit aqqutigalugit inuussutissarsiummut inerisartumut kommune kiffartuussinissaminut piareersimanerulissaaq, Ole Christiansen, kommunip aatsitassanut tunngatillugu siunnersortaa oqarpoq.

Borgmesteri isumalluarpoq nuannaarutigalugulu aatsitassarsiorneq unittuuseqqareersimalluni aallarteqqissinnaanngulermat, pingaartumillu tanngassimaarpoq kommune nammineerluni pikkorissartitsisussanngormat:

  • Aatsitassarsiornermut periaasissaminik kommune 2014-mi aalajangersaavoq siunertarineqarluni sapinngisamik annerpaamik aatsitassarsiornerit aatsitassanillu piiaanerit kommunip ingerlatseqatigiillu peqatigiillutik iluaqutissarsiffigissagaat. Uagut suliassarput tassaavoq qulakkiissallugu piginnaasaqarfitsinni nunap immikkoortuani najugaqartut peqataanissaat. Pingaaruteqarpoq ingerlatseqatigiiffiit aatsitassarsiornermik suliaqartut pitsaasumik suleqatiginissaat sapinngisamik piaartumik isumannaassallugu, taamaaliornikkut illuatungeriit tamatta immitsinnut iluaqutississinnaanerput annerpaamik angusinnaaniassagatsigu. Aatsitassanik ujarlernermut pikkorissaaneq alloriarneruvoq eqqortoq, aammalu kommune inuusuttunik piginnaasaqarluartunik suliumalluartunillu peqarluarpoq, borgmester Kiista P. Isaksen oqarpoq. 

Sukumiinerusumik paasisaqarusukkaanni saaffigineqassaaq Ole Christiansen, telefon 64 53 12, e-mail olch@kujalleq.gl

Paasissutissat allat uani aanneqarsinnaapput kiisalu prospekt pillugu aamma uani