Kujataa UNESCO-p nunarsuarmi eriagisassatut allattorsimaffianut akueritippoq

Tunulliarfimmi aamma Igalikup Kangerluani nunaminertat UNESCO-p nunarsuarmi eriagisassatut allattorsimaffianut ILANNGUNNEQARPUT
10. juli 2017

Ukiuni arlaqalersuni Kommune Kujallermit sukumiisumik sulissutigivarput Qassiarsummi, Igalikumi, Sissarluttumi, Tasikuluulimmi kiisalu Qaqortukuluumi nunaminertat UNESCO-p nunarsuarmi eriagisassatut allattorsimaffianut ilanngunneqarnissaat.

Ullumikkullu ulloq 9. juli 2017 Kommune Kujalleq sinnerlugu nuannaangaarlunga nalunaarutigissavara qinnuteqaaterput UNESCO-mit akuerineqarmat.

Assorsuaq tulluusimaarpunga siulivut, uagullu ullumikkut inuusugut ukiut 1000-it sinnerlugit siulitta aammalumi qallunaatsiat nunatsinni najugaqarsimanerinut uppernarsaatit paarilluarsinnaasimagatsigit, tanngassimaangaarlungalu oqarsinnaavunga tamanna ullumikkut akissarsissutigigipput naleqangaartumik.

 

Tassami UNESCO-p allattorsimaffianiinneq, taamaalillunilu nunarsuarmiut kingornussassaannik peqartutut oqarsinnaalerneq ataqqinaataavoq annertooq atorluaraannilu kommunimut, kommunimi inuussutissarsiornermik ingerlataqartunut, matumani pingaartumik takornariaqarnermik inuussutissarsiuteqartunut aammalumi nunatsinnut tamarmut sutigut tamatigut iluaqutissiisussaq. Taamaammat ullumikkut qinnuteqaatitta akuerineqarnera aallaavigalugu annertuumik inerisaassaagut uagutsinnut kingulissatsinnullu annerpaamik iluaqutaasinnaaqqullugu.

 

Ullumikkut taamak kusanartigisumik angusaqarsimanavianngikkaluarpugut nunatsinni Kultureqarnermut Naalakkersuisoqarfik, Nunatta Katersugaasivia Allagaateqarfialu, Danskit Kultureqarnermut Naalakkersuisoqarfiat suliniummullumi attuumassuteqarsimasut tamaasa suleqatigilluinnarsimanngitsuugutsigit, taamaammat periarfissaq manna iluatsillugu uummammit pisumik suleqatigisimasavut qujaffigingaarpakka.

 

 

Inussiarnersumikinuulluaqqusillunga,

 

Kiista P. Isaksen (S)
Borgmesteri