Kiista P. Isaksen: ”Kommune Kujallermi amerlanerit namminneq najukkaminnik piginnittunngussapput”

Kommune Kujalliup "attartortumiit piginnittumut" aaqqissuussaq siuarsarusuppaa, taamaaliornikkut attartortut sapinngisamik amerlanerpaat najukkaminnik piginnittunngorsinnaassammata.
28. juli 2017

Taamaattumik kommune juulip naalernerani 2017-imi illoqarfinni ukunani attartortunut aalajanger-simasunut allakkanik 248-nik nassiussivoq: Qaqortoq, Narsaq, Nanortalik, nassiussarsisullu attartukkaminnut akimik pitsaasumik illunik tuniniaasartumit kalaaliusumit aalajangerneqartumik neqeroorfigineqassapput. Sanaartornermut akigititaq akip mianersortumik aalajangigaaneranut takussutissiivoq, akilu taanna illunik tuniniaasartut akigitittagaannit nalinginnaasunit appasinneruvoq. 

 

Borgmesterip Kiista P. Isaksenip najukkamik piginnittut amerlinissaat qilanaaraa.   Kiista P. Isaksenip ilisimatitsissutigaa: ”Isumaqarpunga nammineq najukkamik piginnittunngornissamut arlalinnut piffissaq pitsaasuusoq.  2020-mi Qaqortumi mittarfik ingerlalissaaq pitsaasumillu sunniuteqassalluni, ilanngullugulu aatsitassarsiornerup aallartinnissaa ilimanarluarpoq aammattaaq sanaartorneq, aalisarneq aalisakkanillu tunisassiorneq pitsaasumik

ineriartussallutik. ”.

 

"Attartortumiit piginnittumut" aaqqissuussami 40 procentit ernialerneqanngitsumik akilersuinertaqanngitsumillu ukiuni 20-ni kommunimit taarsigassarsiaapput. Sinneruttut 60%-ii ingerlaannaq akilerneqarsinnaapput, imaluunniit kreditforeningimiit bankimiilluunniit taarsigassarsinikkut akilerneqarsinnaallutik.  

 

Naatsorsuinitta takutippaat najugaqartut najugaqarfimminnik pisinermikkut "inigisaminnut akiliutaat" akikinnerulissasut.

 

Illumik piginnittunngoraanni "inigisamut akiliutaasartoq" piffissaq ungasinnerusoq eqqarsaatigalugu inimik pisinermik akilersuiutigaluni sipaarnermik imaqarpoq, attartortutullu inimut akiliutaasartut aningaasartuutaasarput ataavartut.

 

Kommune Kujalleq aggustip 22-iani 2017 Qaqortumi paasissutissiilluni ataatsimiisitsissaaq tassanilu najugaqartut neqeroorfigitinnikut paasissutissanik sukumiinerusunik paasiniaajartorsinnaajumaarlutik imaluunniit arlaannik apeqqutissaqarunik akissutissarsisinnaallutik.

 

Kingornatigut najugaqartut neqeroorummut tunngasunik qisuariaataannik nalileereerutta neqeroorutip illoqarfinni taakkunani annerusunngorlugu atuutilissanersoq Kommune Kujallermit naliliiffigineqassaaq.

 

”Attartortumiit piginnittumut” tunngasumik apeqqutissaqartoqarpat siunnersortimut Carsten Frank Hansenimut paasiniaasoqarsinnaavoq uunga sianerluni oqarasuaat 548667 imaluunniit

mailerluni cafh@kujalleq.gl