Uummannap eqqaamiut ajunaarnersuarmik eqqugaasut ikiorniarlugit Kommune Kujallermit nunaqarfinni sanaartugassanut pilersaarut ukiumik ataatsimik kinguartippai

Avannaani pinngortitap aseruatitsinerata kingunerisaanik eqqugaasunut inissaqartitsinissamut atugassanik immikkut aningaasalersuisoqarnissamut tapersiinissamik julip qaammataani Kommune Kujalleq Naalakkersuisut Siulittaasuannit kaammattuummik tigusaqarpoq.
15. august 2017

Borgmester Kiista P. Isaksen (S) ingerlaannartumik ilaliivoq tamatumalu kingorna borgmesterip innersuussutaa aningaasaqarnermut ataatsimiititaliamit akuersaarneqarluni.

  • Nuannaarpunga aammalu tanngassimaarpunga, kommuniarannguarput taamaaliornermigut Nuugaatsiarmiunut Illorsuarmiunullu ajunaarnersuarmut eqqugaasimasunut inissaqartitsinissamik qulakkeerinneqataasinnaammat. Pisuni taamaattuni, tassa pinngortitap nukissuisa ajunaarnersuaqartitsinerini, ataatsimoorluta sukkasuumik sunniuteqarluartumillu ikioqatigiittussaavugut. Tamanna tunngavigalugu aningaasaqarnermut ataatsimiititaliap, Uummannap eqqaani nunaqarfimmiunut eqqugaasunut ersoqataalluni, toqqarpaa kommunip nunaqarfinni inissialiornermut pilersaarutit aappaagumut kinguartissallugit, taamaaliornikkullu 4,5 mio.koruunit illunut assigiinngitsunut atugassiassanut aammalu illunut kiffartuussinermut atugassianut ukioq manna atugassaagaluit Uummannap nunaqarfittaamiunut ajunaarnersuarmi eqqugaasunut atorneqarsinnaanngorput, borgmester Kiista P. Isaksen oqarpoq.

Taamaalilluni Kommune Kujalleq suliniutinut ukiunut arlalinnut siammarsimasunut aningaasaliissutit ukiumik ataatsimik kinguartippai, taamaaliornermigullu eqqugaasut angerlarsimaffeqaqqilernissaannut tapersersuilluni. Erseqqissaatigineqassaarlu kommunep illunik assigiinngitsunik atugassianut aammalu illunut kiffartuussivinnut pilersaarutini ukioq manna ingerlatiinnassavai, sanaartorneqarnissaali 2018-mi ukiunilu tulliuttuni aatsaat ingerlanneqalissapput.

 

Sukumiinerusumik paasisaqarusukkaanni attavissat:
Borgmester Kiista P. Isaksen +299 497672

Kommunaldirektøriugallartoq Kenneth Høegh +299 565604